ନୂଆଦିଲ୍ଲୀ,୧୨ା୫(ପି.ଟି.): ପଶ୍ଚିମବଙ୍ଗର ୩୧ଟି ନିର୍ବାଚନମଣ୍ଡଳୀରେ ସଦ୍ୟସମାପ୍ତ ନିର୍ବାଚନରେ ବିଜୟ ବ୍ୟବଧାନ ଭୋଟର ତାଲିକାର ସ୍ବତନ୍ତ୍ର ସଘନ ସଂଶୋଧନ (ଏସ୍ଆଇଆର୍)ରେ କଟିଥିବା ଭୋଟର ସଂଖ୍ୟାଠାରୁ କମ୍ ବୋଲି ଦାବି ହୋଇଥିଲା। ଏହା ଉପରେ ସାନି ଆବେଦନ କରିବାକୁ ସୁପ୍ରିମକୋର୍ଟ ସୋମବାର ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ଅନ୍ୟମାନଙ୍କୁ ନିର୍ଦ୍ଦେଶ ଦେଇଛନ୍ତି।
ଏସ୍ଆଇଆର୍ରେ ବାଦ୍ ପଡ଼ିଥିବା ଭୋଟର ସଂଖ୍ୟାଠାରୁ ବିଜୟ ବ୍ୟବଧାନ କମ୍ ହେଲେ ଅଦାଲତ ଏହାର ବିଚାର କରିବେ ବୋଲି ପୂର୍ବରୁ ଜଷ୍ଟିସ୍ ଜୟମାଲ୍ୟ ବାଗ୍ଚୀ ଟିପ୍ପଣୀ ଦେଇଥିବାରୁ ବରିଷ୍ଠ ଆଇନଜୀବୀ ତଥା ଟିଏମ୍ସି ଏମ୍ପି କଲ୍ୟାଣ ବାନାର୍ଜୀ ଏହାକୁ ଆଧାର କରି ୩୧ଟି ନିର୍ବାଚନ ମଣ୍ଡଳୀରେ ଏଭଳି ହୋଇଥିବା ଅଭିଯୋଗ କରିଥିଲେ। ପ୍ରଧାନ ବିଚାରପତି ସୂର୍ଯ୍ୟ କାନ୍ତ ଏବଂ ଜଷ୍ଟିସ୍ ବାଗ୍ଚୀଙ୍କ ଖଣ୍ଡପୀଠ କଲ୍ୟାଣଙ୍କୁ ଯୁକ୍ତିକୁ ଗ୍ରହଣ କରିବା ସହ ସାନି ଆବେଦନ କରିବାକୁ କହିଛନ୍ତି। ଅନ୍ୟପକ୍ଷରେ ନିର୍ବାଚନ କମିଶନଙ୍କ ପକ୍ଷରୁ ବରିଷ୍ଠ ଆଇନଜୀବୀ ଡି.ଏସ୍. ନାଇଡୁ ଉପସ୍ଥିତ ରହି କଲ୍ୟାଣଙ୍କ ଦାବିକୁ ବିରୋଧ କରିଥିଲେ। କେବଳ ଏସ୍ଆଇଆର୍ ସମ୍ପର୍କିତ ବିଷୟ ଏବଂ ଭୋଟର ତାଲିକା ସଂଶୋଧନ ବେଳେ ଭୋଟରଙ୍କ ନାମ ସଂଯୋଗ କିମ୍ବା ବାଦ୍ ପଡ଼ିବା ସମ୍ପର୍କିତ ଅଭିଯୋଗ ଉପରେ ନିର୍ବାଚନ କମିଶନଙ୍କୁ ଉତ୍ତରଦାୟୀ କରାଯାଇପାରିବ ବୋଲି ନାଇଡୁ କହିଥିଲେ। ଏହାର ଜବାବରେ କଲ୍ୟାଣ ଜଷ୍ଟିସ୍ ବାଗ୍ଚୀଙ୍କ ପୂର୍ବ ଟିପ୍ପଣୀକୁ ମନେ ପକାଇଦେଇ କହିଥିଲେ, ତାଙ୍କର ଜଣେ ପ୍ରାର୍ଥୀ ମାତ୍ର ୮୫୨ ଭୋଟ ବ୍ୟବଧାନରେ ପରାଜିତ ହୋଇଛନ୍ତି। ଏସ୍ଆଇଆର୍ ବେଳେ ଉକ୍ତ ନିର୍ବାଚନମଣ୍ଡଳୀରେ ୫,୫୫୦ ଭୋଟରଙ୍କ ନାମ ବାଦ୍ ପଡ଼ିଥିଲା। ଏଭଳି ୩୧ଟି ଆସନରେ ବାଦ୍ ପଡ଼ିଥିବା ଭୋଟର ସଂଖ୍ୟାଠାରୁ କମ୍ ବ୍ୟବଧାନରେ ବିଜୟ ହୋଇଥିବା କଲ୍ୟାଣ କହିଥିଲେ। ଏଥିପାଇଁ ଏକ ଅଲଗା ଆବେଦନ କରାଯିବା ଆବଶ୍ୟକ ବୋଲି ଜଷ୍ଟିସ୍ ବାଗ୍ଚୀ କହିଛନ୍ତି।
