କେହିଜଣେ କହିଥିଲେ ଏକଥା, ପ୍ରେମ ଗୋଟେ ଇଚ୍ଛାମତୀ ନଈର ନଁା। ତେଣୁ କେତେବେଳେ ପ୍ରେମ ହେବ ସେକଥା କେହି ବି ଜାଣି ନ ଥାଏ। ଠିକ୍ ଯେମିତି ଟିକିଲି ଟିକିଏ ବି ଜାଣି ନ ଥିଲେ, ସାଗରଙ୍କୁ ଦେଖୁ ଦେଖୁ ତାଙ୍କ ଭିତରେ ଖେଳିଯିବ ପ୍ରେମର ଫଗୁଣ। ଯାତ୍ରାନୁଷ୍ଠାନ ଇଷ୍ଟର୍ନ ବ୍ଲୁ’ର ମୁଖ୍ୟ ଡ୍ୟାନ୍ସର ଥିଲେ ସାଗର। ପାର୍ବତୀ ଗଣନାଟ୍ୟରେ ଡ୍ୟାନ୍ସ କରୁଥିଲେ ଟିକିଲି। ବାଘମାରୀରେ ଦୁଇପାର୍ଟିର ଯାତ୍ରା ହେଉଥାଏ। ଆଗରୁ ତ ଟିକିଲି ସାଗରଙ୍କ ବିଷୟରେ ଜାଣିଥିଲେ। ସେଇଠି ହିଁ ପ୍ରଥମେ ସେ ଭେଟିଲେ ସାଗରଙ୍କୁ। ବାସ୍, ଆରମ୍ଭ ହେଲା ସାଗର-ଟିକିଲି ଲଭ୍ଷ୍ଟୋରି।
ଟିକିଲିଙ୍କ ଜୀବନ ଯାତ୍ରା ଥିଲା ଭାରି ଦୁଃଖମୟ। ବାପାମା’ ଦୁହେଁ ଯାତ୍ରା କଳାକାର ଥିଲେ। ସେ ଥିଲେ ସେମାନଙ୍କର ଏକମାତ୍ର ସନ୍ତାନ। ଅକାଳରେ ବାପାମା’ ଚାଲିଗଲେ ଆରପାରିକୁ। ଏକୁଟିଆ ହୋଇଗଲେ ଟିକିଲି। ନା ରହିଲା ବାପାଙ୍କର ଭଲପାଇବା ନା ରହିଲା ମା’ର ମମତା। ପିଲାଟିବେଳୁ ବାପାମା’ଙ୍କ ପ୍ରଭାବ ପଡ଼ିଥିଲା ଟିକିଲି ଉପରେ। ସେ ଭଲ ଡ୍ୟାନ୍ସ କରୁଥିଲେ। ତେଣୁ ବାପାମା’ ଚାଲିଗଲା ପରେ ସେ ଆସି ଯୋଗଦେଲେ ଯାତ୍ରାରେ। ଆଉ ମନେ ମନେ ଖୋଜୁଥିଲେ ଏମିତି ଜଣେ ଜୀବନ ସାଥୀ ଯିଏ ବାପାଙ୍କ ପରି ତାଙ୍କର ଯତ୍ନ ନେଇପାରିବ ଆଉ ମା’ ପରି ସ୍ନେହ, ଭଲ ପାଇବା ଦେଇପାରିବ। କହିବା ଅନାବଶ୍ୟକ ଟିକିଲିଙ୍କ ସେଇ ସ୍ବପ୍ନର ପୁରୁଷ ଥିଲେ ସାଗର। ଉଭୟ ସାଗର ଏବଂ ଟିକିଲିଙ୍କ କହିବା ଅନୁଯାୟୀ, ଡ୍ୟାନ୍ସ ସେମାନଙ୍କର ଥିଲା ପ୍ରଥମ ପ୍ରେମ। ଆଉ ସେଇ ଡ୍ୟାନ୍ସ ହିଁ ସେମାନଙ୍କୁ ସଜେଇଦେଲା ପ୍ରେମିକ ପ୍ରେମିକା।
ସାଗରଙ୍କର ଆଉ ଏକ ବଡ଼ ପରିଚୟ ଥିଲା। ତାହା ହେଉଛି ତାଙ୍କର ମଉସା ହେଉଛନ୍ତି ଓଡ଼ିଶାର ଖ୍ୟାତନାମା ନାଟ୍ୟକାର ତଥା ପରିଚାଳକ ବଙ୍କିମ ସ୍ବାଇଁ। ବଙ୍କିମ ବାବୁଙ୍କର ମଧ୍ୟ କୌଣସି ଆପତ୍ତି ନ ଥିଲା ଟିକିଲିଙ୍କୁ ବୋହୂ କରିବା ପାଇଁ। ବାସ୍, ସାଗର ଟିକିଲି ପ୍ରେମିକ ପ୍ରେମିକାରୁ ପାଲଟିଗଲେ ସ୍ବାମୀ ସ୍ତ୍ରୀ। ଟିକିଲିଙ୍କ ପାଇଁ ସାଗର ହେଉଛନ୍ତି ସବୁକିଛି। ଷ୍ଟେଜରେ ଥିଲେ ବି ସେ ସାଗରଙ୍କ କଥା ଭାବୁଥାନ୍ତି। ସାଗର କୋଉଠି ଅଛନ୍ତି, ଖାଇଛନ୍ତି କି ନାହିଁ ଏସବୁ କଥା ତାଙ୍କ ମନ ଭିତରେ ଖେଳୁଥାଏ। ଏ ସମ୍ପର୍କରେ ଟିକିଲି ବେଶ୍ ଭାବପ୍ରବଣ ହୋଇ କହନ୍ତି: ବାପାମା’ଙ୍କୁ ହରେଇବା ପରେ ମୋର ଆଉ କିଏ ଅଛି? ଏକୁଟିଆ ସେଇ ସାଗର! ମୋର ସାହାଭରସା ସବୁକିଛି ସାଗର। ସେ ମୋ ଆଗରେ। ପୁଣି ସେ ବି ମୋ ପଛରେ। ଏ ଦୁନିଆରେ ଯଦି କେହିଜଣେ ମୋର ପ୍ରିୟ ଥାଏ ତା’ହେଲେ ସେ ହେଉଛନ୍ତି ସାଗର।
ଦିନେ ଡ୍ୟାନ୍ସର ଭାବରେ କ୍ୟାରିୟର ଆରମ୍ଭ କରିଥିବା ଟିକିଲି ଏବେ ଜଣେ ଆଗଧାଡ଼ିର ଅଭିନେତ୍ରୀ। ଉଭୟ ପଜିଟିଭ୍ ଓ ନେଗେଟିଭ୍ କରିବାରେ ସେ ଧୁରନ୍ଧର। ସେଇଭଳି ସାଗର ମଧ୍ୟ ଏବେ ଓଡ଼ିଶା ଯାତ୍ରା ଜଗତର ଜଣେ ନମ୍ବର ଓ୍ବାନ୍ କୋରିଓଗ୍ରାଫର। କେବଳ ଡ୍ୟାନ୍ସ କିମ୍ବା କୋରିଓଗ୍ରାଫିରେ ସାଗର ସୀମିତ ନାହାନ୍ତି; ସେ ମଧ୍ୟ ଅଭିନୟରେ ପାଦ ଥାପିଛନ୍ତି। ଚଳିତ ବର୍ଷ ‘ସ୍ବପ୍ନମହଲ’ ପ୍ରଯୋଜିତ ନାଟକ ‘ସିଆଇଡି ଦୟା’ରେ ଟିକିଲି ଖଳନାୟିକା ଭୂମିକାରେ ଅଭିନୟ କରୁଥିବା ବେଳେ ସାଗରଙ୍କୁ ମଧ୍ୟ ଏକ ଦମଦାର ଭୂମିକା ମିିଳିଛି। କ୍ୟୁଟ୍ ଝିଅ ଐଶ୍ୱର୍ଯ୍ୟାଙ୍କୁ ନେଇ ସୁଖର ସଂସାର ବିତାଉଥିବା ଏହି ଜଲିଉଡ୍ କପୁଲଙ୍କ ପାଇଁ ମଉସା ବଙ୍କିମ୍ ସ୍ବାଇଁ ହେଉଛନ୍ତି ପ୍ରେରଣା ତଥା ପଥ ପ୍ରଦର୍ଶକ।
