ଭଦ୍ରକ ଅଫିସ, ୧୭ା୨- ସୋମବାର ଜିଲାପାଳଙ୍କ କାର୍ଯ୍ୟାଳୟରେ ଚାଲିଥିବା ଅଭିଯୋଗ ଶୁଣାଣିରେ କର୍କଟ ରୋଗରେ ପୀଡ଼ିତ ଭଦ୍ରକ ବ୍ଲକ ବେଲଦା ଗ୍ରାମର ରାଜନ ଯେନା ଆର୍ଥିକ ସହାୟତା ପାଇଁ ନିବେଦନ କରିଛନ୍ତି। ଭଦ୍ରକ ସୋସିଆଲ ସର୍ଭିସ ସଂଗଠନ ସହାୟତାରେ ରୋଗୀଙ୍କ ଗାଁରୁ ଅଣାଯାଇ ପ୍ରଶାସନର ଦ୍ୱାରସ୍ଥ କରାଯାଇଛି। ପ୍ରାଥମିକ ଚିକିତ୍ସା କଟକ ମେଡିକାଲରେ କରିବା ପରେ ଲକ୍ଷାଧିକ ଟଙ୍କାର ଆବଶ୍ୟକ ଥିବା ସେ ଜାଣିବାକୁ ପାଇଥିଲେ। ଏହାପରେ ଆର୍ଥିକ ଦୁରାବସ୍ଥା କାରଣରୁ ସେ ଘରେ ରହି ରୋଗରେ ପୀଡ଼ିତ ଥିଲେ। ସଙ୍ଗଠନର କର୍ମକର୍ତ୍ତା ମାନେ ପହଞ୍ଚି ତାଙ୍କୁ ଜିଲା ପ୍ରଶାସନ ନିକଟରେ ଦ୍ୱାରସ୍ଥ କରାଇ ଆର୍ଥିକ ସହାୟତା ଦାବି କରିଛନ୍ତି। ତାଙ୍କ ଘରେ ସେ ଏକା ରୋଜଗାରିଆ ଓ ୨ ଟି କୁନି କୁନି ପିଲା ମଧ୍ୟ ତାଙ୍କର ଅଛନ୍ତି। ଆର୍ଥିକ ଅବସ୍ଥା ଦୁର୍ବଳ ଥିବାରୁ ସେ ଗ୍ରାମବାସୀଙ୍କ ଠାରୁ ଟଙ୍କା ମାଗି କରି ମେଡିକାଲ ଚିକିତ୍ସା ହେବା ପାଇଁ ଯାଆନ୍ତି। ବର୍ତ୍ତମାନ ସୁଦ୍ଧା ୩୦,୦୦୦ ରୁ ଅଧିକ ଟଙ୍କା ତାଙ୍କ ସ୍ତ୍ରୀ ଖର୍ଚ୍ଚ କରିସାରିଲେଣି। ଜିଲା ପ୍ରଶାସନ ମେଡିକାଲ ସହିତ ଯୋଗାଯୋଗ କରି କିଭଳି ନିଃଶୁଳ୍କ କେମୋ ନେବା ସହିତ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ସହାୟତା ପ୍ରଦାନ ପାଇଁ ସେ ଦାବି କରିଛନ୍ତି।
