ଖୋର୍ଦ୍ଧା ଅଫିସ,୧୬ା୫: ଖୋର୍ଦ୍ଧା ଜିଲା ଜଟଣୀ ନିକଟ ତରାବୋଇର ଏକ ଘରୋଇ ସଂସ୍ଥାରେ କାର୍ଯ୍ୟରତ ୧୦ଜଣ ଶ୍ରମିକ ଗୁରୁବାର ବିଳମ୍ବିତ ରାତିରେ ପରିବାର ସହ ଛତିଶଗଡ ଚାଲିଚାଲି ଯାଇଛନ୍ତି। ସେମାନେ କାନ୍ଧରେ ଶିଶୁ ଓ ମୁଣ୍ଡରେ ଆସବାବପତ୍ର ଧରି ଯାଉଥିବା ଦୃଶ୍ୟ ସୋସିଆଲ ମିଡିଆରେ ଭାଇରାଲ ହୋଇଛି। ସୂଚନା ଅନୁଯାୟୀ, ଶ୍ରମିକମାନେ ଜଣେ ଠିକାଦାରଙ୍କ ଅଧୀନରେ ରହି ଉକ୍ତ ଅଞ୍ଚଳରେ କାର୍ଯ୍ୟ କରୁଥିଲେ। ଲକ୍ଡାଉନ୍ରେ କାମ ବନ୍ଦ ହୋଇଯିବାରୁ ଠିକାଦାର ସେମାନଙ୍କୁ ଦରମା ଦେବାକୁ ମନା କରିଦେଇଥିଲେ। ଫଳରେ ପରିବାର ଚଳାଇବା କଷ୍ଟକର ହୋଇପଡିଥିଲା। ପ୍ରଶାସନ ଏବଂ ବିଭିନ୍ନ ଅନୁଷ୍ଠାନ ପକ୍ଷରୁ ମିଳିଥିବା ଶୁଖିଲା ଖାଦ୍ୟରେ କିଛି ଦିନ ପରିବାର ଚଳିଯାଇଥିଲା। ପରେ ପରିବାର ଚଳାଇବା କଷ୍ଟକର ହେବାରୁ ନିଜ ଗ୍ରାମକୁ ଫେରିବା ଲାଗି ସରକାରଙ୍କ ଓ୍ବେବ୍ସାଇଟରେ ଗତ ୧୦ତାରିଖରେ ନାମ ପଞ୍ଜୀକରଣ କରିଥିଲେ। ଫେରିଯିବା ଲାଗି ପ୍ରଶାସନକୁ ବାରମ୍ବାର ଅନୁରୋଧ ସତ୍ତ୍ୱେ ନିରାଶ ହେବା ପରେ ଚାଲିଚାଲି ଯିବାକୁ ନିଷ୍ପତ୍ତି ନେଇଥିଲୁ। ପିଲାଙ୍କୁ ଖାଇବାକୁ ଦେବାକୁ ପାଖରେ ଟଙ୍କା ନାହିଁ, ପୁଣି ଲମ୍ବା ରାସ୍ତା ଯିବାକୁ ପଡିବ। ଯେଉଁ ପର୍ଯ୍ୟନ୍ତ ଚାଲି ପାରିବୁ ଚାଲିବୁ ବୋଲି ଶ୍ରମିକମାନେ କହିଛନ୍ତି। କୌଣସି ସୂତ୍ରରୁ ଖବରପାଇ ଖୋର୍ଦ୍ଧା ବିକାଶ ପରିଷଦ କର୍ମକର୍ତ୍ତା ଶୋଭନ ଘୋଷ, ସୁଜନ ମିଶ୍ର ସେମାନଙ୍କୁ ସହାୟତାର ହାତ ବଢାଇବା ସହ କିଛି ଟଙ୍କା ପ୍ରଦାନ କରିଥିବା ଜଣାପଡିଛି। ସୂଚନାଥାଉକି, ପଞ୍ଜାବରୁ ଉତ୍ତରପ୍ରଦେଶ ଯାଉଥିବା ଜଣେ ଶ୍ରମିକ ମା’ ଥକିପଡ଼ିଥିବା ଶିଶୁକୁ ସୁଟକେଶରେ ଶୁଆଇ ଦୌଡି ଯୋଗେ ଟାଣି ଟାଣି ନେଉଥିବା ଦୃଶ୍ୟ ଭିଡିଓ ଭାଇରାଲ ହୋଇଥିଲା।
