ପୁରୀ ଅଫିସ,୨୦।୪: ଜୁନ୍ ୨୩ରେ ମହାପ୍ରଭୁଙ୍କ ରଥଯାତ୍ରା। ଏହାକୁ ନେଇ ଏବେ ବି ଅନିଶ୍ଚିତତା ଲାଗିରହିଛି। କରୋନାର ଭୟାବହତାକୁ ଦେଖି ଏ ପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇନାହିଁ। ସମସ୍ତଙ୍କ ମନରେ ଗୋଟିଏ ପ୍ରଶ୍ନ ବଡ଼ଦାଣ୍ଡରେ ମହାପ୍ରଭୁଙ୍କ ରଥ ଗଡ଼ିବ ନା ରୁକୁଣା ରଥ ଭଳି ରୋକ୍ ଲାଗିବ। ତେବେ ଏସବୁ ଭିତରେ ରଥଯାତ୍ରା ଆୟୋଜନ ଲାଗି ସମସ୍ତ ପ୍ରକ୍ରିୟା ଜାରି ରହିଛି। ରଥଯାତ୍ରାକୁ ନେଇ ଶ୍ରୀଜଗନ୍ନାଥ ସେନା ପକ୍ଷରୁ ରବିବାର ରାଜ୍ୟ ସରକାରଙ୍କୁ କେତେକ ପ୍ରସ୍ତାବ ଦିଆଯାଇଛି। ଏ ସମ୍ପର୍କରେ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ କହିଛନ୍ତି, ଯଦି କରୋନାକୁ ନେଇ କିଛି ସମସ୍ୟା ନ ଥିବ ତେବେ ଚିରାଚରିତ ପ୍ରଥାନୁସାରେ ଜନଗହଳିରେ ରଥଯାତ୍ରା ହୋଇପାରେ। ଠିକଣା ସମୟକୁ ଯଦି କରୋନା ସଂକ୍ରମଣ କମି ନ ଥିବ ତେବେ କେବଳ ସ୍ଥାନୀୟ ପୋଲିସ ଓ ସେବାୟତଙ୍କୁ ନେଇ ବିନା ଭକ୍ତରେ ରଥଯାତ୍ରା ହେଉ। କାହାକୁ ଶ୍ରୀକ୍ଷେତ୍ର ଏବଂ ବଡ଼ଦାଣ୍ଡକୁ ଛଡ଼ାଯିବ ନାହିଁ। ଏପରି କି ସ୍ଥାନୀୟ ଲୋକଙ୍କ ଉପରେ କଟକଣା ଲଗାଯିବା ଦରକାର। ନଚେତ ସ୍ଥାନୀୟ ଲୋକଙ୍କ ଛଦ୍ମବେଶରେ ବାହାର ଲୋକ ଆସିଲେ କରୋନା ବ୍ୟାପିବାର ସମ୍ଭାବନା ରହିବ। ଏହାଦ୍ୱାରା ସ୍ଥାନୀୟ ଲୋକ ଦିଲ୍ଲୀ ନିଜାମୁଦ୍ଦିନ ଭଳି ବଦ୍ନାମ ହେବେ। କେବଳ ମୁଖ୍ୟମନ୍ତ୍ରୀ, ରାଜ୍ୟପାଳ ଓ ମୁଖ୍ୟ ବିଚାରପତିଙ୍କ ବ୍ୟତୀତ ଅନ୍ୟ କୌଣସି ଭିଆଇପି କିମ୍ବା ରାଜନେତାଙ୍କୁ ଛଡ଼ା ନ ଯାଉ। ସାମାଜିକ ଦୂରତା ପାଇଁ ରଥଖଳାକୁ ଆହୁରି ବଡ଼ କରାଯିବା ଦରକାର। କେବଳ ଦୂରଦର୍ଶନକୁ ପ୍ରସାରଣ ଦାୟିତ୍ୱ ଦିଆଯାଉ ଓ ତା’ ମାଧ୍ୟମରେ ଅନ୍ୟ ଚ୍ୟାନେଲଗୁଡ଼ିକ ପ୍ରସାରଣ କଲେ ବାହାରୁ ବଡ଼ ଭ୍ୟାନ୍ କିମ୍ବା ଟେଲିଭିଜନ କର୍ମଚାରୀ ଆସିବେ ନାହିଁ। ଏହାଦ୍ୱାରା ଅଯଥା ଗହଳି ହେବନି। ତେବେ ମହାପ୍ରଭୁଙ୍କ କରୁଣାରୁ ଠିକଣା ସମୟକୁ କରୋନା ଦୂରୀଭୂତ ହୋଇଯାଇଥିବ ବୋଲି ସମସ୍ତଙ୍କ ଆସ୍ଥା ଓ ବିଶ୍ୱାସ ରହିଛି। ଏଭଳି ସମୟରେ ଭକ୍ତମାନେ ସାମାନ୍ୟ ତ୍ୟାଗ କରିବା ଦରକାର ଏବଂ ଗଜପତି ମହାରାଜା ସହଯୋଗ ପାଇଁ ସମସ୍ତଙ୍କୁ ଅନୁରୋଧ କରନ୍ତୁ ବୋଲି ଜଗନ୍ନାଥ ସେନା ନିବେଦନ କରିଛି।
