ପୁରୀ ଅଫିସ,୧୮ା୫:-ସମ୍ଭାବ୍ୟ ବାତ୍ୟା ଅମ୍ଫନକୁ କିପରି ମୁକାବିଲା କରାଯାଇପାରିବ ସେନେଇ ପୁରୀ ଜିଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଯଦିଓ ଏହାର ପ୍ରଭାବ ସିଧାସଳଖ ପୁରୀ ଉପରେ ପଡ଼ିବ ନାହିଁ ବୋଲି କୁହାଯାଉଛି ତେବେ ବର୍ଷା, ପବନ ହେବାର ସମ୍ଭାବନା ରହିଛି। ତେଣୁ ଏହାକୁ ଦୃଷ୍ଟିରେ ରଖି ଶ୍ରୀମନ୍ଦିର ପ୍ରଶାସନ ବି ଆଗୁଆ ସତର୍କ ହୋଇଛି। ପ୍ରବଳ ବର୍ଷା, ପବନ ହେଲେ ମଙ୍ଗଳବାର ଓ ବୁଧବାର ଦୁଇଦିନ ରଥ ନିର୍ମାଣ କାମ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ କହିଛି। ଏ ନେଇ ରଥ ନିର୍ମାଣରେ ନିୟୋଜିତ ସମ୍ପୃକ୍ତ ସେବକମାନଙ୍କୁ ସୋମବାର ଅବଗତ କରିଦିଆଯାଇଛି। ସେମାନେ ଏହି ଦୁଇଦିନ ରଥଖଳାକୁ ଆସିବେ ନାହିଁ, ପୂର୍ବପରି ଭକ୍ତ ନିବାସ ପରିସରରେ ରହିବେ ବୋଲି କୁହାଯାଇଛି। ଅନ୍ୟପକ୍ଷରେ ରଥଖଳାରେ ବର୍ଷା ନ ପଡ଼ିିବା ପାଇଁ ପକାଯାଇଥିବା ଜରିପାଲକୁ ସୋମବାର ଖୋଲି ଦିଆଯାଇଛି। ପାଣିପାଗ ବିଭାଗର ଆକଳନ ଅନୁଯାୟୀ ପୁରୀକୁ ଯଦି ଜୋର୍ ପବନ ହୁଏ ତେବେ ପାଲ ରହିବ ନାହିଁ। ତେଣୁ ଦୁଇଦିନ କାମ ବନ୍ଦ ଥିବାରୁ ପାଲକୁ ଖୋଲାଯାଇଛି। ସେହିପରି ନିର୍ମାଣ ସରିଥିବା ରଥ ଚକଗୁଡ଼ିକରେ ପାଲ ଗୁଡ଼ାଯାଇ ଭଲ ଭାବେ ବାନ୍ଧି ଦିଆଯାଇଛି। ଏଥିରେ ଯେପରି ବର୍ଷା ପାଣି ନ ପଡ଼ିବ ସେଥିଲାଗି ଏଭଳି ପଦକ୍ଷେପ ନିଆଯାଇଛି।
