ସମ୍ବଲପୁର,୨୭ା୫ (ବ୍ୟୁରୋ): ଗୁଜରାଟ ସୁରଟରେ ଏକ କୋଚିଂ ସେଣ୍ଟରରେ ନିଆଁ ଲାଗି ୨୦ ଜଣ ଛାତ୍ରଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ଦେଶ ଓ ରାଜ୍ୟର ବିଭିନ୍ନ ଶିକ୍ଷାନୁଷ୍ଠାନ ପ୍ରତି ସରକାରୀ ଓ ପ୍ରଶାସନିକ ସ୍ତରରେ ଦୃଷ୍ଟି ପଡିଛି। ଏଭଳି ଘଟଣାର ଯେଭଳି ପୁନରାବୃତ୍ତି ନ ଘଟେ ସେଥିପ୍ରତି ଏବେ ସମସ୍ତଙ୍କ ନଜର ରହିଛି। ଏହିକ୍ରମରେ ଦେଖିଲେ ସମ୍ବଲପୁର ସହରରେ ଅନେକ ସ୍କୁଲ, କଲେଜ ସହିତ କୋଚିଂ ସେଣ୍ଟର ରହିଛି । ହେଲେ ଏଗୁଡିକ ମଧ୍ୟରୁ ଅଧିକାଂଶ ଅନୁଷ୍ଠାନ ସରକାରୀ ନିୟମ ପାଳନ କରୁ ନ ଥିବା ଅଭିଯୋଗ ହେଉଛି । ଅଧିକାଂଶ ଭଡା ଘର ଓ ନିଜ ବାସଗୃହରେ ବିଭିନ୍ନ ନାମଦେଇ କୋଚିଂ ସେଣ୍ଟର, ହଷ୍ଟେଲ ଓ ଚ୍ୟାମ୍ବରମାନ ଚଳାଉଛନ୍ତି । ଛାତ୍ରୀଛାତ୍ରଙ୍କଠାରୁ ମୋଟା ଅଙ୍କର ଟଙ୍କା ନେଉଥିବା ବେଳେ ସେମାନଙ୍କ ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ୱ ଦେଉ ନ ଥିବା ଅଭିଯୋଗ ହେଉଛି । ନିୟମ ଅନୁସାରେ କୌଣସି ଜନଗହଳି ବସ୍ତି କିମ୍ବା ପଡାରେ ବ୍ୟବସାୟିକ ଭିତ୍ତିକ ଅନୁଷ୍ଠାନ କଲେ ଅଗ୍ନିଶମ ବିଭାଗ ପକ୍ଷରୁ ସାର୍ଟିଫିକେଟ ନେବା ନିହାତି ଆବଶ୍ୟକ ରହିଛି ା ହେଲେ ସମ୍ବଲପୁରରେ ଥିବା ଶିକ୍ଷାନୁଷ୍ଠାନଗୁଡିକର ଚାରି ପାଖରେ ଜନବସତି ରହିଛି। ଚଉଡା ରାସ୍ତା ନାହିଁ। ଘରଦ୍ୱାର ରହିଛି । ଫଳରେ କୌଣସି ଅଘଟଣ ଘଟିଲେ ଅଗ୍ନିଶମ ବିଭାଗର ଗାଡି ଯାଇ ପାରିବ ନାହିଁ। ଏପରିକି ନିଅଁାକୁ ଆୟତ୍ତ କରିବାରେ ସ୍ଥାନୀୟ ଲୋକ ମଧ୍ୟ ସହଯୋଗ କରି ପାରିବେ ନାହିଁ । ଅନ୍ୟପଟେ ଘର ଗୁଡିକ ମଧ୍ୟ ବାସଗୃହ ଢାଞ୍ଚାରେ ତିଆରି ହୋଇଛି। ତେଣୁ ନିଅଁା ଲାଗିଲେ ଅଧିକ କ୍ଷତି ହେବା ଆଶଙ୍କା ରହୁଛି ା ଅନେକ କୋଚିଂ ସେଣ୍ଟର, ଚ୍ୟାମ୍ବର, ହଷ୍ଟେଲ ଭଳି ଅନୁଷ୍ଠାନ ଅଗ୍ନିଶମ ବିଭାଗ ପକ୍ଷରୁ ଏନଓସି ନେଇ ନ ଥିବା ଜଣା ପଡିଛି। ଏଣୁ ପ୍ରଶାସନ ଓ ଅଗ୍ନିଶମ ବିଭାଗ ପକ୍ଷରୁ ବେଆଇନ ଭାବେ ଚାଲିଥିବା ଏହି ସବୁ ହଷ୍ଟେଲ ଓ ଚ୍ୟାମ୍ବର ଉପରେ ଚଢାଉ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ। ନ ହେଲେ ସୁରଟ ଭଳି ଅଘଟଣ ଘଟିପାରେ ଏଥିରେ ତିଳେମାତ୍ର ସନ୍ଦେହ ନାହିଁ ।
ସମ୍ବଲପୁର ସହରରେ ଗଙ୍ଗାଧର ମେହେର ବିଶ୍ୱ ବିଦ୍ୟାଳୟ (ଜିଏମୟୁ), ମହିଳା କଲେଜ ଓ ବଡ ବଡ ନାମି ଘରୋଇ କଲେଜ ଓ କୋଚଂ ସେଣ୍ଟର ଗୁଡିକ ରହିଛି ଏହି ଶିକ୍ଷାନୁଷ୍ଠାନ ଗୁଡିକରେ ପାଠ ପଢ଼ିବା ପାଇଁ ଜିଲା ଓ ଜିଲା ବାହାରୁ ଛାତ୍ରୀଛାତ୍ର ଆସୁଛନ୍ତି । କଲେଜରେ ପଢିବା ସହ କୋଚିଂ ସେଣ୍ଟରରେ ନାମ ଲେଖାଇଥାନ୍ତି । ଏହାର ସୁଯୋଗ ନେଇ ଚ୍ୟାମ୍ବର କରିଥିବା ମାଲିକମାନେ ଅଧିକ ଫି ନିଅନ୍ତି । ହେଲେ ଆବଶ୍ୟକ ସୁବିଧା ଦେଇ ନ ଥାନ୍ତି । ସେହିଭଲି ଝିଅମାନଙ୍କ ପାଇଁ ହଷ୍ଟେଲ ଓ ଚ୍ୟାମ୍ବରରେ ସ୍ବତନ୍ତ୍ର ସୁରକ୍ଷା ବ୍ୟବସ୍ଥା କରାଯାଉ ନାହିଁ । ସିକ୍ୟୁରିଟି ଗାର୍ଡ, ମହିଳା ୱାଡେନ୍ ନିୟୋଜିତ କରାଯାଇ ନାହିଁ । ଘର ମାଲିକ ନିଜେ ୱାଡେନ ଭାବେ କାମଚଳା ଦାୟିତ୍ୱ ତୁଲାଉଛନ୍ତି । ଏହି ଚ୍ୟାମ୍ବରଗୁଡିକରେ ବିଜୁଳି, ପାଣିର ସମସ୍ୟା ରହୁଛି । ଏପରିକି ଭଡା ଆଶାରେ ଗୋଟିଏ କୋଠରୀରେ ଅଧିକ ସଂଖ୍ୟାରେ ଛାତ୍ରୀଛାତ୍ରଙ୍କୁ ରଖାଯାଉଛି । ଗୋଟିଏ ବେଡ୍ରେ ୨ଜଣ ରହୁଛନ୍ତି। ପଢ଼ିବା ପାଇଁ ଟେବୁଲ ଚେୟାର ଯୋଗାଇ ଦିଆ ଯାଉନି। ଫଳରେ ପିଲାଙ୍କ ପାଠ ପଢ଼ାରେ ବାଧା ସୃଷ୍ଟି ହୋଇଥାଏ । ତେବେ ଏ ସମ୍ପର୍କରେ ଅଗ୍ନିଶମ ବିଭାଗ ଅଧିକାରୀ ଜିତେନ୍ଦ୍ର କୁମାର ଦାସ କହିଛନ୍ତି ଯେ, ଅଗ୍ନିଶମ ବିଭାଗ ପକ୍ଷରୁ ପ୍ରାୟ ୩୦ଟି କୋଚିଂ ସେଣ୍ଟରର ତାଲିକା କରାଯାଇଛି । ୩ ଜଣଙ୍କୁ ନୋଟିସ ମଧ୍ୟ କରାଯାଇଛି । ସମସ୍ତଙ୍କୁ ନୋଟିସ୍ ଜାରି କରାଯିବ । କୋଚିଂ ସେଣ୍ଟର ଗୁଡିକୁ ଯାଇ ଯାଞ୍ଚ କରାଯିବ । ସେହପରି ହଷ୍ଟେଲ ଓ ବେଇନଭାବେ ଚାଲୁଥିବା ଚ୍ୟାମ୍ବର ଗୁଡିକରେ ମଧ୍ୟ ଅଗ୍ନିଶମ ବିଭାଗ ଅଗ୍ନି ନିରାପତ୍ତା ବ୍ୟବସ୍ଥା ଉପରେ ଯାଞ୍ଚ କରିବ । ଏହାର ବ୍ୟତିକ୍ରମ ଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
