ଭୁବନେଶ୍ୱର,୨୪ା୯(ବ୍ୟୁରୋ)/ କଟକ ଅଫିସ: ବର୍ତ୍ତମାନ ଦ୍ୱେତନଗରୀ କଟକ ଓ ଭୁବନେଶ୍ୱରରେ କରୋନା ସଂକ୍ରମଣ ଅଧିକ ରହୁଛି। ଲୋକେ ନିୟମ ଉଲ୍ଲଂଘନ କରୁଥିବାରୁ ଏ ପରିସ୍ଥିତି ଉପୁଜୁଛି। କଟକଣା ଓ ନିୟମକୁ କଡ଼ାକଡ଼ି କରାଯାଇଥିଲେ ମଧ୍ୟ ଅମାନିଆ ସାବାଡ୍ ହେଉନାହାନ୍ତି। ଠିକ୍ ଭାବେ ମାସ୍କ ପିନ୍ଧୁ ନ ଥିବାବେଳେ ସାମାଜିକ ଦୂରତ୍ୱ ରଖୁନାହାନ୍ତି। ମୁଖ୍ୟମନ୍ତ୍ରୀ ଓ ଡିଜିପିଙ୍କ ନିର୍ଦ୍ଦେଶ ପରେ କମିଶନରେଟ ପୋଲିସ କଠୋର ଆଭିମୁଖ୍ୟ ଗ୍ରହଣ କରୁଛି। ହେଲେ ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଉଥିବାରୁ କମିଶନରେଟ ପୋଲିସ ନୂଆ ପଦକ୍ଷେପ ଆପଣାଇଛି। ଗୁରୁବାର ଦୁଇ ସହରର ସମସ୍ତ ବ୍ୟବସାୟୀ ସଂଘ ସହ କମିଶନରେଟ ପୋଲିସ ପୃଥକ ଆଲୋଚନା କରି କିଛି ପ୍ରସ୍ତାବ ଗ୍ରହଣ କରିବା ସହ ନୂଆ ପ୍ରସ୍ତାବ ଦେଇଛି।
ପୋଲିସ ଯେଉଁଭଳି ଭାବେ ଜରିମାନା କାଟୁଛନ୍ତି ତାହାକୁ ବ୍ୟବସାୟୀ ସଂଘ ନାପସନ୍ଦ କରିଥିଲେ। ସଂଘ କର୍ମକର୍ତ୍ତାମାନେ କହିଥିଲେ, ସନ୍ଧ୍ୟାରେ ବଜାରରେ ଭିଡ଼ ହେଉଛି। ଏହି ସମୟରେ ଲୋକେ ସାମାଜିକ ଦୂରତା ରକ୍ଷା କରୁନାହାନ୍ତି। ଲୋକଙ୍କୁ ବୁଝାଇବା ମଧ୍ୟ କଷ୍ଟକର ହୋଇପଡ଼ୁଛି। ଫଳରେ ଜରିମାନା ଦେବା ସହିତ ଦୋକାନଗୁଡ଼ିକୁ ସିଲ କରାଯାଉଛି। ଏଭଳି ସ୍ଥଳେ ସନ୍ଧ୍ୟା ୬ଟାରୁ ବଜାର ବନ୍ଦ କରାଯାଉ ବୋଲି ବଜାର କମିଟି ପକ୍ଷରୁ ପୋଲିସ କମିଶନରଙ୍କ ନିକଟରେ ପ୍ରସ୍ତାବ ଦିଆଯାଇଛି।
ଅନ୍ୟପକ୍ଷରେ ବଜାର କମିଟିମାନେ ନିଜର ସୁରକ୍ଷା ପାଇଁ ଦୋକାନ ଆଗରେ ବ୍ୟକ୍ତିଗତ ସୁରକ୍ଷା କର୍ମୀ ନିୟୋଜିତ କରିପାରିବେ। ଏହାସହ କମିଟିମାନେ ମାଇକ ଲଗାଇ ଲୋକଙ୍କୁ ସାମାଜିକ ଦୂରତ୍ୱ ରଖିବା ପାଇଁ ସଚେତନ କରିପାରିବେ। ଯେଉଁଠି ଭିଡ଼ ଅଧିକ ହେଉଛି, ଗ୍ରାହକମାନେ କଥା ମାନୁନାହାନ୍ତି, ସେ କ୍ଷେତ୍ରରେ ଦୋକାନୀମାନେ ଟୋଲ୍ ଫ୍ରି ନଂ.୧୦୦କୁ ଫୋନ୍ କରି ପୋଲିସର ସାହାଯ୍ୟ ନେଇପାରିବେ। ପୋଲିସ ପହଞ୍ଚତ୍ ଗ୍ରାହକଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ନେବ। ଆହୁରି ମଧ୍ୟ ଦୋକାନ ଆଗରେ ଭିଡ଼ ନିୟନ୍ତ୍ରଣ ପାଇଁ ଦୋକାନୀମାନେ ବ୍ୟାରିକେଡ଼ ବ୍ୟବସ୍ଥା ମଧ୍ୟ କରିପାରିବେ ବୋଲି କମିଶନରେଟ ପୋଲିସ ପକ୍ଷରୁ ସଂଘକୁ ପରାମର୍ଶ ଦିଆଯାଇଛି। ବ୍ୟବସାୟୀ ସଂଘ ଦୋକାନୀମାନଙ୍କୁ ଡାକି ଆଉଏକ ବୈଠକ କରି ବୈଠକରେ ହୋଇଥିବା ଏସବୁ ପ୍ରସ୍ତାବକୁ କାର୍ଯ୍ୟକାରୀ କରିବେ। ଏହାପରେ ବି ଯଦି ଦୋକାନ ଆଗରେ ଗ୍ରାହକ ଭିଡ଼ କରିବେ ଦୃଢ଼ କାର୍ଯାନୁଷ୍ଠାନ ନିଆଯିବ ବୋଲି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି। ସେ କହିଛନ୍ତି, ଆଲୋଚନା ଅତ୍ୟନ୍ତ ସକରାତ୍ମକ ରହିଛି। ଆମେ ବ୍ୟବସାୟୀ ସଂଘର ପ୍ରତିନିଧିଙ୍କୁ ଅନୁରୋଧ କରିଛୁ ଏହି ବ୍ୟବସ୍ଥା କରିବାକୁ। ଆମେ ଆଶା କରୁଛୁ ସେମାନେ ପୋଲିସକୁ ସହଯୋଗ କରିବେ। ବିଶେଷ କରି ସାମାଜିକ ଦୂରତ୍ୱ ଓ ମାସ୍କ ଉପରେ ଆମେ ଅଧିକ ଗୁରୁତ୍ୱ ଦେଇଛି। ଆଗକୁ ମଧ୍ୟ ପଦକ୍ଷେପ ଜାରି ରହିବ ବୋଲି ସେ ସୂଚନା ଦେଇଛନ୍ତି।
ପ୍ରଥମେ ଭୁବନେଶ୍ୱରସ୍ଥିତ କମିଶନରେଟ ପୋଲିସ ମୁଖ୍ୟାଳୟରେ ବୈଠକ ବସିଥିଲା। ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଏଥିରେ ଅଧ୍ୟକ୍ଷତା କରିଥିବାବେଳେ ଡିସିପି ଉମାଶଙ୍କର ଦାଶ, ଟ୍ରାଫିକ ଡିସିପି ସୌମ୍ୟା ମିଶ୍ର ସହ ଅନ୍ୟ ବରିଷ୍ଠ ପୋଲିସ ଅଧିକାରୀ ଓ ସମସ୍ତ ବ୍ୟବସାୟୀ ସଂଘର କର୍ମକର୍ତ୍ତା ଉପସ୍ଥିତ ଥିଲେ। ପରେ କଟକରେ ବ୍ୟବସାୟୀ ସଂଘ ସହ ଆଲୋଚନା କରିଥିଲେ ପୋଲିସ କମିଶନର। କଟକ ଡିସିପି ପ୍ରତୀକ ସିଂ, ଏସିପି ସେଖ୍ ସରିଫୁଦ୍ଦିନ, ଟ୍ରାଫିକ ଏସିପି ଦିବ୍ୟଜ୍ୟୋତି ଦାଶ ଉପସ୍ଥିତ ଥିଲେ।
