ସଡ଼କ ଦୁର୍ଘଟଣାରେ ଗୁରୁତରଙ୍କ ପାଇଁ ବ୍ୟବସ୍ଥା: ଘରୋଇ ହସ୍ପିଟାଲରେ ମିଳିବ ମାଗଣା ଚିକିତ୍ସା
09 ଭୁବନେଶ୍ୱର,୨୯ା୧୦(ବ୍ୟୁରୋ): ସଡ଼କ ଦୁର୍ଘଟଣାର ସମ୍ମୁଖୀନ ହେଉଥିବା ବ୍ୟକ୍ତିଙ୍କୁ ତୁରନ୍ତ ଚିକିତ୍ସା ଯୋଗାଇ ଦିଆଯିବ। ଏ ନେଇ ସୋମବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏକ ଗାଇଡଲାଇନ ପ୍ରସ୍ତୁତ କରାଯାଇଛି। ଗୁରୁତର ଭାବେ ଦୁର୍ଘଟଣାଗ୍ରସ୍ତ ହୋଇଥିବା ବ୍ୟକ୍ତିଙ୍କୁ ମେଡିକାଲ/ ସର୍ଜିକାଲ ଏବଂ ଗୁରୁତର ସ୍ବାସ୍ଥ୍ୟ ସେବା ଘରୋଇ ହସ୍ପିଟାଲରେ ମାଗଣାରେ ଯୋଗାଇ ଦିଆଯିବ। ଏହି ଖର୍ଚ୍ଚ ରାଜ୍ୟ ସରକାରଙ୍କ ମାଗଣା ଚିକିତ୍ସା ଟ୍ରମା ପାଣ୍ଠି(ଏଫ୍ଟିଟିଏଫ୍)ରୁ ଯୋଗାଇ ଦିଆଯିବ। ସରକାରୀ ଡାକ୍ତରଖାନା ଛଡା କଟକ ଓ ଭୁବନେଶ୍ୱରରେ ଥିବା ଘରୋଇ ହସ୍ପିଟାଲରେ ମଧ୍ୟ ଦୁର୍ଘଟଣା ଘଟିବାର ୪୮ ଘଣ୍ଟା ମଧ୍ୟରେ ମାଗଣା ଚିକିତ୍ସା ସୁବିଧା ମିଳିପାରିବ। ପ୍ରଥମ ପର୍ଯ୍ୟାୟରେ କଟକଠାରେ ଥିବା ଅଶ୍ୱିନୀ, ଭୁବନେଶ୍ୱରରେ ଥିବା ଆମ୍ରି ଓ ଆପୋଲୋ ହସ୍ପିଟାଲରେ ଏହି ସୁବିଧା ଉପଲବ୍ଧ ହେବ। ଆସନ୍ତା ୬ ମାସ ମଧ୍ୟରେ ଏହି ହସ୍ପିଟାଲଗୁଡ଼ିକରେ ଚିକିତ୍ସିତ ହୋଇଥିବା ବ୍ୟକ୍ତିମାନଙ୍କର ଖର୍ଚ୍ଚ ସମ୍ପର୍କରେ ସମୀକ୍ଷା କରାଯିବ। ଏହା ପରେ ରାଜ୍ୟର ଅନ୍ୟାନ୍ୟ ହସ୍ପିଟାଲରେ ଏହି ସୁବିଧା ଉପଲବ୍ଧ କରିବା ନେଇ ନିଷ୍ପତ୍ତି ନିଆଯିବ।
ଦୁର୍ଘଟଣାଗ୍ରସ୍ତ ବ୍ୟକ୍ତି ପହଞ୍ଚିବା ମାତ୍ରେ ଘରୋଇ ହସ୍ପିଟାଲ ସମସ୍ତ ଜରୁରୀ ଚିକିତ୍ସା ଯୋଗାଇ ଦେବେ। ଏଥିସହିତ ମେଡିକାଲ ଶିକ୍ଷା ନିର୍ଦ୍ଦେଶକ(ଡିଏମଇଟି)ଙ୍କୁ ଆହତ ବ୍ୟକ୍ତିଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ଓ କି ପ୍ରକାର କ୍ଷତି ହୋଇଛି ସେ ନେଇ ୪୮ ଘଣ୍ଟା ମଧ୍ୟରେ ସୂଚନା ଦେବେ। ଯଦି ୪୮ ଘଣ୍ଟା ମଧ୍ୟରେ ଅନ୍ୟ ହସ୍ପିଟାଲକୁ ରୋଗୀଙ୍କୁ ସ୍ଥାନାନ୍ତର କରିବାକୁ ପଡେ ତେବେ ପ୍ରଥମେ ଆସିଥିବା ହସ୍ପିଟାଲର ବିଲ୍ ସହିତ ତାହାକୁ ହିସାବକୁ ନିଆଯିବ। ଯଦି ୪୮ ଘଣ୍ଟା ପରେ ଟ୍ରମା କେୟାର ଆରମ୍ଭ ହେବ ତେବେ ସେହି ଆହତ ବ୍ୟକ୍ତି ଏଫ୍ଟିଟିଏଫ୍ରୁ ସହାୟତା ପାଇଁବା ପାଇଁ ଯୋଗ୍ୟ ବିବେଚିତ ହେବେ ନାହିଁ। ସେଭଳି କ୍ଷେତ୍ରରେ ସ୍ବାସ୍ଥ୍ୟ ବିଭାଗର ବୈଷୟିକ କମିଟିକୁ ଜଣାଇବାକୁ ହେବ। ଏଭଳି କ୍ଷେତ୍ରରେ ରୋଗୀ ଯଦି ଓଡ଼ିଶା ରାଜ୍ୟ ଚିକିତ୍ସା ପାଣ୍ଠି(ଓଏସ୍ଟିଏଫ୍)ରୁ ସହାୟତା ପାଇବାକୁ ଯୋଗ୍ୟ ବିବେଚିତ ହେବେ ତାଙ୍କୁ ଘରୋଇ ହସ୍ପିଟାଲରେ ଚିକିତ୍ସା ସୁବିଧା ଯୋଗାଇ ଦିଆଯାଇ ପାରିବ। ଯଦି କୌଣସି ସମସ୍ୟା ହେବ ତେବେ ଡିଏମ୍ଇଟି ଅନିଲ କୁମାର ସାହୁ (୯୪୩୭୦୫୪୯୩୦), ମଣିଲାଲ ଗୁପ୍ତା(୯୪୩୯୯୯୮୧୫୩) ଏବଂ ଦିଲ୍ଲୀପ କୁମାର ନନ୍ଦ(୯୩୪୮୬୭୭୧୩୩)ଙ୍କ ସହ ଯୋଗାଯୋଗ କରିବାକୁ କୁହାଯାଇଛି। ଚିକିତ୍ସାର ୪୮ ଘଣ୍ଟା ପରେ ସମ୍ପୃକ୍ତ ଘରୋଇ ହସ୍ପିଟାଲ ଏକ ନିର୍ଦ୍ଦିଷ୍ଟ ଫର୍ମାଟରେ ସମସ୍ତ ଖର୍ଚ୍ଚ ପ୍ରମାଣ ପତ୍ର ସହ ଆବେଦନ କରିବାକୁ ହେବ। ଡିଏମଇଟି ଉପଯୁକ୍ତ ପରୀକ୍ଷା ନିରୀକ୍ଷା ପରେ ସେହି ହସ୍ପିଟାଲକୁ ଚିକିତ୍ସାର ସମସ୍ତ ଖର୍ଚ୍ଚ ପ୍ରଦାନ କରିବେ।