ନୂଆଦିଲ୍ଲୀ,୫-୮: ସୁରକ୍ଷା କାରଣରୁ ଜମ୍ମୁ-କଶ୍ମୀରରୁ ଅମରନାଥ ତୀର୍ଥଯାତ୍ରୀ ତଥା ଅନ୍ୟ ପର୍ଯ୍ୟଟକଙ୍କୁ ଫେରି ଆସିବାକୁ ନିର୍ଦ୍ଦେଶ ଦିଆଯାଇଛି। ଏଥିପାଇଁ ବିମାନ ସେବା ଉପଲବ୍ଧ କରାଇବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ସମସ୍ତ ବିମାନ କମ୍ପାନୀଙ୍କୁ କୁହାଯାଇଛି। ତେବେ ଚାହିଦା ବୃଦ୍ଧି କାରଣରୁ ବିମାନ ଭଡ଼ା ଚଢ଼ା ହୋଇଛି। ଏ ସମ୍ପର୍କରେ ଅଭିଯୋଗ ହେବା ପରେ ରାଷ୍ଟ୍ରାୟତ୍ତ ବିମାନ କମ୍ପାନୀ ଏୟାର ଇଣ୍ଡିଆ ଏବଂ ଘରୋଇ କମ୍ପାନୀ ଗୋଏୟାର ଶ୍ରୀନଗର-ଦିଲ୍ଲୀ ଫ୍ଲାଇଟ୍ର ସର୍ବାଧିକ ବିମାନ ଭଡା ହ୍ରାସ ଘୋଷଣା କରିଛନ୍ତି। ଅଗଷ୍ଟ ୧୫ ପର୍ଯ୍ୟନ୍ତ ଏୟାର ଇଣ୍ଡିଆ ଭଡ଼ା ସର୍ବାଧିକ ୬୭୧୫ ଟଙ୍କା ରଖାଯାଇଛି। ତେବେ ଦିଲ୍ଲୀ-ଶ୍ରୀନଗର ବିମାନ ଭଡା ସର୍ବାଧିକ ୬୮୯୯ ଟଙ୍କାରେ ସୀମିତ ରହିବ ବୋଲି ଏହାର ମୁଖପାତ୍ର ଧନଞ୍ଜୟ କୁମାର ପ୍ରକାଶ କରିଛନ୍ତି। ସେହିପରି ଅଗଷ୍ଟ ୧୫ ପର୍ଯ୍ୟନ୍ତ ଗୋଏୟାର ଏହାର ବିମାନ ଭଡ଼ା ୧୦ହଜାର ଟଙ୍କାରେ ସୀମିତ ରଖିଛି। ତେବେ ଅନ୍ୟ ବିମାନ କମ୍ପାନୀ ଇଣ୍ଡିଗୋ, ସ୍ପାଇଶ୍ଜେଟ୍, ଭିଷ୍ଟାରା ଏବଂ ଏୟାରଏସିଆ ଇଣ୍ଡିଆ ଅଦ୍ୟାବଧି ସେମାନଙ୍କ ଭଡ଼ା ହ୍ରାସ ନେଇ ଘୋଷଣା କରିନାହାନ୍ତି। ସୂଚନାଥାଉ କି, ଅମରନାଥ ଯାତ୍ରୀଙ୍କୁ ତୁରନ୍ତ ଉପତ୍ୟକା ଛାଡ଼ିବା ଲାଗି ଜମ୍ମୁ-କଶ୍ମୀର ସରକାର ଶୁକ୍ରବାର ନିର୍ଦ୍ଦେଶ ଦେବା ପରେ ବିମାନ ଭଡ଼ା ଅଚାନକ ବୃଦ୍ଧି ପାଇଥିଲା। ତେବେ ଭଡ଼ା କମାଇବା ଲାଗି ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଗୋଏୟାର ମୁଖପାତ୍ର କହିଛନ୍ତି ଯେ, ବିମାନ ଚଳାଚଳ ମନ୍ତ୍ରଣାଳୟର ଆହ୍ବାନକୁ କମ୍ପାନୀ ସର୍ବଦା ଗୁରୁତ୍ୱ ଦେଇଛି। କେରଳ ବନ୍ୟା, ଓଡ଼ିଶାରେ ଫନୀ ବାତ୍ୟା, ବାଲାକୋଟ ବିମାନ ଆକ୍ରମଣ ବେଳେ କମ୍ପାନୀ ଯାତ୍ରୀଙ୍କୁ ବିମାନ ସେବା ଯୋଗାଇବା ସହ ଭଡାକୁ ନିୟନ୍ତ୍ରଣରେ ରଖିଛି।
