ସିଙ୍ଗାପୁର: ବଲିଉଡ ସୁପରଷ୍ଟାର ତଥା ସ୍ବର୍ଗୀୟା ଅଭିନେତ୍ରୀ ଶ୍ରୀଦେବୀଙ୍କ ମହମ ପ୍ରତିମୂର୍ତ୍ତି ବୁଧବାର ସ୍ଥାନୀୟ ମାଡାମ ଟୁସାଡ୍ସରେ ଅନାବରଣ ହୋଇଛି। ଏଥିପାଇଁ ଆୟୋଜିତ ଏକ ଉତ୍ସବରେ ଯୋଗଦେଇଥିଲେ ଅଭିନେତ୍ରୀଙ୍କ ସ୍ବାମୀ ବୋନି କପୁର ଏବଂ ତାଙ୍କର ଦୁଇ କନ୍ୟା ଜାହ୍ନବୀ ଓ ଖୁସି। ୧୯୮୭ର ସୁପରହିଟ୍ ଫିଲ୍ମ ‘ମିଷ୍ଟର ଇଣ୍ଡିଆ’ର ଲୋକପ୍ରିୟ ହିନ୍ଦୀ ସଙ୍ଗୀତ ‘ହାଓ୍ବା ହାଓ୍ବାଇ’ ଗାଇ ଶ୍ରୀଦେବୀ ଯେଉଁ ଚାହାଣି ମାରିଥିଲେ ତାହାର ଅବିକଳ ରୂପ ଏହି ପ୍ରତିମୂର୍ତ୍ତିରେ ଦେଖିବାକୁ ମିଳୁଛି। ଏହି କାର୍ଯ୍ୟକ୍ରମରେ ବୋନି ଖୁବ୍ ଅଳ୍ପ ସମୟ ପାଇଁ ବକ୍ତୃତା ଦେଇ ଶ୍ରୀଦେବୀଙ୍କୁ ସ୍ମରଣକରି ସାମାନ୍ୟ ଭାଙ୍ଗି ପଡ଼ିଥିଲେ। ଏ ସମ୍ପର୍କରେ ବୋନି ଟୁଇଟ୍ କରିଛନ୍ତି, ‘ଶ୍ରୀଦେବୀ କେବଳ ଆମ ହୃଦୟରେ ନୁହଁ, ବରଂ ତାଙ୍କର ଲକ୍ଷ ଲକ୍ଷ ପ୍ରଶଂସକଙ୍କ ହୃଦୟରେ ବଞ୍ଚତ୍ ରହିଛନ୍ତି।’
ସୁପରଷ୍ଟାର ଶ୍ରୀଦେବୀ ୮୦ଦଶକରେ ବଲିଉଡ ବକ୍ସ ଅଫିସରେ ବେଶ୍ ରାଜୁତି କରୁଥିଲେ। ଶ୍ରୀଦେବୀ ଅଭିନୟ କରିବା ସହିତ ଫିଲ୍ମ ପ୍ରଯୋଜନା କରୁଥିଲେ। ସେ ତାମିଲ, ହିନ୍ଦୀ, ତେଲୁଗୁ, ମାଲାୟଲମ ଏବଂ କନ୍ନଡ ଫିଲ୍ମରେ କାମ କରିଛନ୍ତି। ସେ ୧୯୬୩ ଅଗଷ୍ଟ ୧୩ରେ ଶିବକାଶିଠାରେ ଜନ୍ମଗ୍ରହଣ କରିଥିଲେ। ଦୁବାଇ ଗସ୍ତ କରିଥିବାବେଳେ ୨୦୧୮ ଫେବୃୟାରୀ ୨୪ରେ ଏକ ହୋଟେଲର ଗାଧୁଆକୁଣ୍ଡରେ ବୁଡ଼ିଯାଇ ସେ ପ୍ରାଣ ହରାଇଥିଲେ।
