ଭୁବନେଶ୍ୱର,୨୪ା୧୨(ବ୍ୟୁରୋ): କାର୍ଯ୍ୟ ଅନ୍ବେଷଣରେ ରାଜ୍ୟ ବାହାରକୁ ଓ ବିଦେଶକୁ ଯାଉଥିବା ଶ୍ରମିକମାନଙ୍କୁ ସୁରକ୍ଷା ଯୋଗାଇ ଦେବାକୁ ପ୍ରସ୍ତୁତ ହେବ ଆକ୍ସନ ପ୍ଲାନ। ଖୁବ୍ଶୀଘ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏ ନେଇ ଘୋଷଣା କରିବେ। ସୋମବାର ଭୁବନେଶ୍ୱର ପାନ୍ଥନିବାସର କଳିଙ୍ଗ ସମ୍ମିଳନୀ କକ୍ଷରେ ଅନୁଷ୍ଠିତ ରାଜ୍ୟସ୍ତରୀୟ କର୍ମଶାଳାରେ ଯୋଗ ଦେଇ ଶ୍ରମ ଓ ନିୟୋଜନ ମନ୍ତ୍ରୀ ସୁଶାନ୍ତ ସିଂ ଏହି ସୂଚନା ଦେଇଛନ୍ତି। ଅନେକ ସମୟରେ ଠିକାଦାରମାନେ ଗରିବ ଶ୍ରମିକମାନଙ୍କୁ ଲୋଭ ଦେଖାଇ ରାଜ୍ୟ ବାହାର ଓ ବିଦେଶକୁ ନେଇ ଯାଉଛନ୍ତି। ସେମାନଙ୍କୁ ପଞ୍ଜୀକୃତ କରାଯାଉ ନାହିଁ। ସେହି ଶ୍ରମିକମାନେ ଅସୁବିଧାର ସମ୍ମୁଖୀନ ହେଲେ ତାଙ୍କୁ ସୁରକ୍ଷା ଯୋଗାଇ ଦେବା କାଠିକର ପାଠ ହେଉଛି। ଏଣିକି ବିଦେଶକୁ ଯାଉଥିବା ଶ୍ରମିକମାନଙ୍କୁ ପଞ୍ଜୀକୃତ କରାଯିବ। ବୈଦେଶିକ ମନ୍ତ୍ରଣାଳୟ ଓ ଭିଜା କାର୍ଯ୍ୟାଳୟ ସହ ବରାବର ଯୋଗାଯୋଗ ରକ୍ଷା କରାଯିବ। ବିଦେଶ ଯାଉଥିବା ଶ୍ରମିକମାନଙ୍କର ସମସ୍ତ ତଥ୍ୟ ରାଜ୍ୟ ଶ୍ରମ ବିଭାଗ ନିକଟରେ ରହିବ। ସେମାନେ କେଉଁ ଦେଶକୁ ଯାଉଛନ୍ତି। କାହା ସହିତ ଯାଉଛନ୍ତି। ସେମାନେ ପଞ୍ଜୀକୃତ କି ନାହିଁ ସେ ସମସ୍ତ କଡ଼ାକଡ଼ି ଭାବେ ଯାଞ୍ଚ କରାଯିବ। ଶ୍ରମ ବିଭାଗ ପକ୍ଷରୁ ସେସବୁର ନିୟମିତ ତଦାରଖ କରାଯିବ। ଏଥିସହିତ ଦେଶ ଭିତରେ ଥିବା ଶ୍ରମିକମାନଙ୍କୁ ସହାୟତା କରିବାକୁ ଆନ୍ଧ୍ରପ୍ରଦେଶ, କର୍ନାଟକ, ତେଲଙ୍ଗାନା ଓ ଦିଲ୍ଲୀରେ ୪ଟି ହେଲ୍ପ ଡେସ୍କ ରହିଥିବାବେଳେ କେରଳ ଓ ଗୁଜରାଟରେ ଆଉ ଦୁଇଟି ନୂତନ ହେଲ୍ପ ଡେସ୍କ ସ୍ଥାପନ କରାଯିବ। ଦିଲ୍ଲୀରେ ଥିବା ହେଲ୍ପ ଡେସ୍କକୁ ଆହୁରି ଆଧୁନିକୀକରଣ କରାଯିବ। ଏ ନେଇ ଏକ ବୁଝାମଣାପତ୍ର ସ୍ବାକ୍ଷର କରାଯିବ।
ରାଜ୍ୟରେ ଏବେ ସୁଦ୍ଧା ୨୯ ଲକ୍ଷ ୬୦ ହଜାର ପରିବାରର ୧ କୋଟି ଲୋକଙ୍କୁ ନିର୍ମାଣ ଶ୍ରମିକ କଲ୍ୟାଣ ବୋର୍ଡରେ ପଞ୍ଜୀକୃତ କରାଯାଇଛି। ବୋର୍ଡ ଏ ପର୍ଯ୍ୟନ୍ତ ନିର୍ମାଣ ଶ୍ରମିକମାନଙ୍କ କଲ୍ୟାଣ ପାଇଁ ୧୮୫୦ କୋଟି ଟଙ୍କା ସେସ୍ ଆଦାୟ କରିଛି। ସେଥିରୁ ୧୬୫୦ କୋଟି ଟଙ୍କା ଶ୍ରମିକମାନଙ୍କ ବିକାଶ ପାଇଁ ଖର୍ଚ୍ଚ କରାଯାଇଛି ବୋଲି ବୋର୍ଡର ଅଧ୍ୟକ୍ଷ ସୁବାସ ସିଂ କହିଛନ୍ତି। ଶ୍ରମିକମାନଙ୍କ ବିକାଶକୁ ଦୁର୍ନୀତି ମୁକ୍ତ ଏବଂ ଉନ୍ନତ ଜ୍ଞାନ କୌଶଳ ଜରିଆରେ କରିବାକୁ ସମ୍ପୂର୍ଣ୍ଣ ଉଦ୍ୟମ କରାଯାଉଛି। ମଧ୍ୟସ୍ଥଙ୍କଠାରୁ କିପରି ଦୂରରେ ରହି ପାରିବେ ସେ ନେଇ ଶ୍ରମିକଙ୍କ ମଧ୍ୟରେ ସଚେତନତା ସୃଷ୍ଟି କରାଯାଉଛି। ଶ୍ରମ ବିଭାଗକୁ ଆସନ୍ତା ୨୦୨୦ ଜାନୁୟାରୀ ମାସରେ ମୋ ସରକାର ପରିସର
ଶ୍ରମିକଙ୍କ…
ଭୁକ୍ତ କରାଯିବ। ଏଥିପାଇଁ ୧୫୦ ଜଣ ଅଧିକାରୀଙ୍କ ସହ ଦିନ ତମାମ ଆଲୋଚନା କରାଯାଇଛି ବୋଲି ସିଂ କହିଛନ୍ତି। ରାଜ୍ୟ ସରକାରଙ୍କ ୫-ଟି ଅନୁଯାୟୀ କାର୍ଯ୍ୟ କରିବାକୁ ଶ୍ରମ ଓ ରାଜ୍ୟ କର୍ମଚାରୀ ବୀମା ବିଭାଗ ସଚିବ ଅନୁ ଗର୍ଗ ସମସ୍ତ ଅଧିକାରୀମାନଙ୍କୁ ପରାମର୍ଶ ଦେଇଥିଲେ।
ଶ୍ରମ କମିଶନର ନିରଞ୍ଜନ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କର୍ମଶାଳାରେ ସ୍ବତନ୍ତ୍ର ସଚିବ ଲକ୍ଷ୍ମୀକାନ୍ତ ମିଶ୍ର, ଯୁଗ୍ମ ସଚିବ ଲକ୍ଷ୍ମୀକାନ୍ତ ସେଠୀଙ୍କ ସମେତ ବିଭାଗୀୟ ଅଧିକାରୀମାନେ ଯୋଗ ଦେଇଥିଲେ। ଏହି ଅବସରରେ ଶ୍ରମିକ କଲ୍ୟାଣ ବୋର୍ଡ ୨୦୧୮-୧୯ର ବାର୍ଷିକ ବିବରଣୀକୁ ଉନ୍ମୋଚନ କରାଯାଇଥିଲା।
