ଶିକ୍‌ଲା ବଁଧା ଜୀବନ୍‌ ଘଟନା: ସନିକଟ୍‌କେ ଉଧାର କଲା ପରଶାସନ
8:53 amAugust 8, 2019 / 21

ବିଜେପୁର, ୮।୮ (ଡି.ଏନ୍‌.ଏ):  ବରଗଡ଼ ଜିଲା ଟି.ଗଣ୍ଡପାଲି ପଁଚେତ୍‌ ସଦର ଗାଁ ର ସନିକଟ୍‌ ସାହୁ(୪୮) ଗଲା ୪ ବଛର ହେଲା ଶିଁକ୍‌ଲା ବଁଧା ଜୀବନ୍‌ ବିତଉଥିଲେ। ଇ ବାବ୍‌ଦେ ଗଲା ମଙ୍ଗଲବାର ଧରିତ୍ରୀ ସମ୍ବଲପୁର ସଂସ୍କରଣରେ ‘ଶିଁକ୍‌ଲା ବଁଧା ଜୀବନ୍‌ ବିତଉଛନ୍‌ ସନିକଟ୍‌’ ଶୀରଷକ୍‌ରେ ଖବର ବାହାରିଥିଲା। ଖବର ବାହାରଲା ଉତାରୁ ଘଟ୍‌ନାକେ ଗୁରୁତ୍‌ ଦେଇଥିଲା ଜିଲା ପରଶାସନ। ଜିଲାପାଲ ଇନ୍ଦ୍ରମଣି ତ୍ରିପାଠୀକଁର ପରାମଶ୍‌ରେ ଜିଲା ସୁଆସ୍‌ତିଅ ଅଧ୍‌କାରୀକଁର ନିରଦେଶରେ ଥାନୀୟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର କରମ୍‌ଚାରୀମାନେ ବୁଧୁବାର ଟି.ଗଣ୍ଡପାଲିରୁ ସନିକଟକେ ଉଧାର କରିଥିଲେ। ଚିକିଛା ଲାଗି ସନିକଟ୍‌କୁଁ ବୁର୍ଲା ଡାକ୍‌ତରଖାନାର ମାନସିକ୍‌ ରୋଗ୍‌ ବିଭାଗର ୧୧ ନମର ଓ୍ବାର୍ଡରେ ଭରତି କରାଯାଇଥିବାର ଜନାପଡ଼ିଛେ। ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିସତ୍ା ଅଧ୍‌କାରୀ ଡା.ଶାନ୍ତନୁ ସାହୁକଁର ଦେଖ୍‌ରେଖ୍‌ଥି ଚିକିଛା ଦଲ ବୁଧୁବାର ବେଲାକେ ଟି.ଗଣ୍ଡପାଲି ଯାଇଥିଲେ। ଡା.ସାହୁ ସନିକଟର ଦିହିପା ଯଁାଚ୍‌ କଲା ଉତାରୁ ଫାର୍ମାସିଷ୍ଟ ବିଜେତା ମିଶ୍ର ତାକର ପରିବାର ଲୁକ୍‌କର ସଂଗେ ବୁର୍ଲା ଡାକ୍‌ତରଖାନା ଯାଇଥିଲେ।
ପୂରବର ସୂଚନା ଅନ୍‌ସାରେ ଦିନ୍‌ଥିଲା ସନିକଟ ବାହା ଜାଂଗଲ ମାଜି ସାତ୍‌ ପରାନୀ କୁଟୁମ୍‌ ପୁଷୁଥିଲେ। ହେଲେ ଆଏଜ୍‌କେ ୧୫ ବଛର୍‌ ତଲେ ସନିକଟ୍‌ର ଦିହିପା ବନେ ବିଗଡି ଗଲା। ଏନ୍‌ତାଥି କମିହା ପୁଓକେ ଭଲ କରବାକେ ବାପ୍‌ ମୂରଲି ସାହୁ ମାଗିଯାଚି ତାହାକୁ ବୁର୍ଲା ଡାକ୍‌ତରଖାନା ନେଲେ। ଡାକ୍‌ତର କହେବାର ହିସାବେ ସନିକଟ୍‌ ମାନସିକ୍‌ ରୋଗ୍‌ରେ ପୀଡ଼ିତ ଅଛନ୍‌। ଉଷୋକଷା କରି ଭଲ କରବାକେ ହେଲେ ଉଚ ଧରନ୍‌ର ଚିକିଛା ଦରକାର। ହେଲେ ଟଁକା ପଏସା ଅଭାବୁ ମୂରଲି ମୁଡ଼କାନ ସୁଅଁାଲି ପୁଓକେ ଧରି ଘରକେ ଫିରିଆଏଲେ। ଦିନୁ ଦିନ୍‌କେ ସନିକଟ୍‌ର ଆଚାର ବେଭାର, ଚାଲିଚଲନ ବଦଲି ଗଲା, ଘରୁ ଯହିଁତହିଁ ପଲେଇ ବସଲେ। ଏନ୍‌ତାଥି ପରିବାର ଲୋକ୍‌ ଉପେ ଶୂଇନ୍‌ ହେଇ ସନିକଟ୍‌ର ଗୁଟେ ଲୁହା ଶିଁକ୍‌ଲା ବଁାଧିଦେଲେ। ଆଏଜ୍‌କେ ୪ ବଛର ହେଲା ଶନିକଟ୍‌ ଶିଁକ୍‌ଲା ବଁଧା ଜୀବନ୍‌ ବିତଉଥିଲେ। ହେଲେ ଇ ବାବ୍‌ଦେ ଧରିତ୍ରୀରେ ଖବର ବାହାରଲା ଉତାରୁ ପରଶାସନ ଘଟନାକେ ଗୁରୁତ୍‌ ଦେଇ ସନିକଟ୍‌କେ ଉଧାର କରି ଚିକିଛା ଲାଗି ବୁର୍ଲା ଡାକ୍‌ତରଖାନାରେ ଭରତି କରିଛେ। ଟି.ଗଣ୍ଡପାଲିବାସୀ ପରଶାସନର ଇ ମହତ୍‌ କାଯ୍‌କେ ଗୁରୁଦୁ ପରଶଁସା କରିଛନ୍‌।