ଭୁବନେଶ୍ୱର, ୧୨।୪(ବ୍ୟୁରୋ): କରୋନା ପାଇଁ ସବୁ କ୍ଷେତ୍ର ପ୍ରଭାବିତ ହୋଇଛି। ଏଥିପଯୋଗୁ ସ୍କୁଲ୍, କଲେଜ ବନ୍ଦ ରହିଥିବାରୁ ପିଲାଙ୍କ ପାଠପଢ଼ା ଓ ପରୀକ୍ଷା ଗୁରୁତର ବାଧାପ୍ରାପ୍ତ ହୋଇଛି। ଅନେକ ପରୀକ୍ଷାକୁ ବନ୍ଦ କରାଯିବା ସହିତ କିଛି ପରୀକ୍ଷାକୁ ସ୍ଥଗିତ ମଧ୍ୟ ରଖାଯାଇଛି। ଲକ୍ଡାଉନ୍ ଅବଧିକୁ ୩୦ତାରିଖ ପର୍ଯ୍ୟନ୍ତ ଘୁଞ୍ଚାଇ ଦିଆଯିବାପରେ ଚିନ୍ତା ବଢ଼ିଛି। ନବମ ଶ୍ରେଣୀର ବାକିଥିବା ଇତିହାସ-ଭୂଗୋଳ ବିଷୟ ପରୀକ୍ଷାକୁ ବନ୍ଦ କରିବା ପାଇଁ ନିଷ୍ପତ୍ତି ହୋଇସାରିଛି। ତେବେ ଯେଉଁସବୁ ବିଷୟଗୁଡ଼ିକର ପରୀକ୍ଷା ସରିଛି ସେସବୁ ଖାତା କିପରି ଦେଖାହେବ ସେଥିପାଇଁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଯୋଜନା କରୁଛି। ଘରେ ରହି ଶିକ୍ଷକମାନେ ଖାତା ଦେଖିବେ। ଆସନ୍ତା ୩୦ତାରିଖ ଭିତରେ ସେମାନଙ୍କ ଘରକୁ ପରୀକ୍ଷା ଖାତା ପଠାଇବାକୁ ନିଷ୍ପତ୍ତି ନେଇଛି ଗଣଶିକ୍ଷା ବିଭାଗ।
ସୂଚନାଯୋଗ୍ୟ, ନବମ ଶ୍ରେଣୀ ପରୀକ୍ଷା ଚାଲୁଥିବା ସମୟରେ ରାଜ୍ୟରେ କରୋନାର ପ୍ରଭାବ ଦେଖିବାକୁ ମିଳିଥିଲା। ତେଣୁ ବାକିଥିବା ଇତିହାସ-ଭୂଗୋଳ ପରୀକ୍ଷାକୁ ପ୍ରଥମେ ସ୍ଥଗିତ ରଖାଯାଇଥିଲା। ଲକ୍ଡାଉନ୍ ହଟିବା ପରେ ପରୀକ୍ଷା ସମ୍ପର୍କରେ ନିଷ୍ପତ୍ତି ନିଆଯିବ ବୋଲି ବିଭାଗ ପକ୍ଷରୁ କୁହାଯାଇଥିଲା। ତେବେ ଚଳିତ ମାସ ୧୪ ତାରିଖ ପର୍ଯ୍ୟନ୍ତ ଥିବା ଲକ୍ଡାଉନ୍ ଅବଧିକୁ ପୁଣି ବୃଦ୍ଧି କରାଯିବା ପରେ ଏହି ପରୀକ୍ଷା ନ କରିବା ପାଇଁ ବିଭାଗ ନିଷ୍ପତ୍ତି ନେଇଥିଲା। ସେପଟେ ଯେଉଁ ବିଷୟଗୁଡ଼ିକର ପରୀକ୍ଷା ଶେଷ ହୋଇଛି ତା’ର କିପରି ଖାତା ଦେଖାହେବ ତାହାକୁ ନେଇ ସରକାରଙ୍କ ଚିନ୍ତା ବଢ଼ି ଯାଇଥିଲା। କାରଣ ନବମ ଶ୍ରେଣୀ ପିଲା ପାସ୍ ହେଲେ ଦଶମ ଶ୍ରେଣୀକୁ ଉତ୍ତୀର୍ଣ୍ଣ ହୋଇ ପାଠପଢ଼ିବେ। ସେଥିପାଇଁ ଉକ୍ତ ପରୀକ୍ଷା ଖାତା କିପରି ଶୀଘ୍ର ଦେଖାଯାଇପାରିବ ସେ ନେଇ ବିଭାଗ ପକ୍ଷରୁ ଆଲୋଚନା ହୋଇଥିଲା। ଘରେ ରହି ଶିକ୍ଷକ ଖାତା ଦେଖିବେ। ତେଣୁ ଶିକ୍ଷକଙ୍କ ଘରକୁ ଖାତା ପଠାଯିବ ବୋଲି ମନ୍ତ୍ରୀ ସମୀର ରଞ୍ଜନ ଦାସ କହିଛନ୍ତି। ଏନେଇ ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ, ବିଭାଗୀୟ ସଚିବ ଚିତ୍ରା ଅରୁମୁଗମଙ୍କ ସହିତ ଆଲୋଚନା ହୋଇସାରିଛି। ତେବେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ଅପେକ୍ଷା ରହିଛି ବେଲି ମନ୍ତ୍ରୀ କହିଛନ୍ତି।
ସେପଟେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ କିପରି ବହି ଦିଆଯିବ ସେଥିପାଇଁ ବିଭାଗ ପକ୍ଷରୁ ଯୋଜନା ଚାଲିଛି। ପୂର୍ବରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ସମସ୍ତେ ପାସ୍ ବୋଲି ମନ୍ତ୍ରୀ କହିଥିଲେ। ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ବହି ଦେବା ପାଇଁ ସବୁଠି ବହି ପହଞ୍ଚତ୍ ଯାଇଥିଲେ ମଧ୍ୟ ଲକ୍ଡାଉନ୍ ଯୋଗୁ ପିଲାମାନଙ୍କୁ ବଣ୍ଟନ କରାଯାଇପାରିନି। ପିଲାଙ୍କୁ କିପରି ବହି ଦିଆଯିବ ସେନେଇ ଶନିବାର ବିଭାଗ ପକ୍ଷରୁ ଏକ ବୈଠକ ହୋଇଥିଲା। ସ୍କୁଲରେ ବହି ବଣ୍ଟନ କରାଯିବ। ତେବେ ପିଲାମାନେ ନୁହେଁ, ଅଭିଭାବକଙ୍କ ଜରିଆରେ ପିଲାଙ୍କୁ ବହି ଦିଆଯିବ ବୋଲି ବିଭାଗ ପକ୍ଷରୁ ନିଷ୍ପତ୍ତି ହୋଇଥିବା ସୂଚନା ମିଳିଛି।
