ଭୁବନେଶ୍ୱର,୧୭।୧୨(ବ୍ୟୁରୋ): ଗଣମାଧ୍ୟମ ଗଣତନ୍ତ୍ରର ୪ର୍ଥ ସ୍ତମ୍ଭ ନୁହେଁ। ଆମ ଦେଶର ଗଣତନ୍ତ୍ର ୩ଟି ସ୍ତମ୍ଭ ଉପରେ ଛିଡ଼ାହୋଇଛି। ହେଲେ ଦେଶର ଏବେକାର ପରିସ୍ଥିତିରେ ଗଣମାଧ୍ୟମର ଭୂମିକା ବଢ଼ିଯାଇଛି। ଯେଉଁଠି ଖୋଦ୍ ସରକାର ଇଣ୍ଟରନେଟ୍ ସେବା ବନ୍ଦ କରି କଶ୍ମୀର ଓ ଆସାମ ଭଳି ଦେଶର ବିଭିନ୍ନ ଅଙ୍ଗକୁ ମୂଳଭୂମିଠାରୁ ବିଚ୍ଛିନ୍ନ କରିଦେଉଛନ୍ତି, ସେଭଳିସ୍ଥଳେ ନିରପେକ୍ଷ ଗଣମାଧ୍ୟମର ଦାୟିତ୍ୱ ବଢିଯାଇଛି ବୋଲି ‘ଧରିତ୍ରୀ’ ଏବଂ ‘ଓଡ଼ିଶା ପୋଷ୍ଟ’ର ସମ୍ପାଦକ ତଥାଗତ ସତପଥୀ କହିଛନ୍ତି। ‘ମୁଖ୍ୟଧାରାର ଗଣମାଧ୍ୟମ ବନାମ ସାମାଜିକ ଗଣମାଧ୍ୟମ’ ଶୀର୍ଷକକୁ ନେଇ ଅନୁଷ୍ଠିତ ଆଲୋଚନାଚକ୍ରରେ ବକ୍ତାଭାବେ ଯୋଗଦେଇ ସତପଥୀ କହିଥିଲେ, ଭାରତ ସହ ସମସ୍ତ ଏସୀୟ ରାଷ୍ଟ୍ରରେ ଆଜି ବି ଛାପା ଗଣମାଧ୍ୟମର ଚାହିଦା ରହିଛି। ଆଗାମୀ ଏକ ଦଶନ୍ଧି ପର୍ଯ୍ୟନ୍ତ ଲୋକେ ଛାପା ଗଣମାଧ୍ୟମକୁ ଭରସା କରିବେ। ଦେଶର ଅର୍ଥନୀତି ଓ ରାଜନୈତିକ ପରିସ୍ଥିତିରେ ଏବେ ବଡ଼ ସଂକଟ ଦେଖାଦେଇଛି। ଏଭଳି ଘଡ଼ିସନ୍ଧି ସମୟରେ ବୈଦ୍ୟୁତିକ ଗଣମାଧ୍ୟମ ଉପରୁ ଲୋକଙ୍କ ଭରସା ଉଠିଯାଇଥିବାବେଳେ ଛାପା ଗଣମାଧ୍ୟମକୁ ଲୋକେ ପୁଣିଥରେ ବିଶ୍ୱାସ କରିଛନ୍ତି। ସାମାଜିକ ଗଣମାଧ୍ୟମ ଧୀରେ ଧୀରେ ବୈଦ୍ୟୁତିକ ଗଣମାଧ୍ୟମର ଶୂନ୍ୟସ୍ଥାନକୁ ପୂରଣ କରୁଥିବା ବେଳେ ଆଗାମୀ ଭବିଷ୍ୟତରେ ପରସ୍ପରର ସହଯୋଗ ମାଧ୍ୟମରେ ଛାପା ଓ ସାମାଜିକ ଗଣମାଧ୍ୟମ ତିଷ୍ଠି ରହିବେ ବୋଲି ସେ କହିଥିଲେ।
ମାସିକ ପତ୍ରିକା ‘ଅଧିକାର’ ପକ୍ଷରୁ ସୋମବାର ଜୟଦେବ ବିହାରସ୍ଥିତ ଉତ୍କଳମଣି ହଲ୍ରେ ଆୟୋଜିତ ଏହି ଆଲୋଚନାଚକ୍ରରେ ଅନ୍ୟତମ ବକ୍ତାଭାବେ ଯୋଗଦେଇ ନ୍ୟୁଜ୍କ୍ଲିକ୍ର ସମ୍ପାଦକ ପ୍ରବୀର ପୁରକାୟସ୍ଥ ମିଥ୍ୟା ଖବର ବର୍ତ୍ତମାନ ସାମାଜିକ ଗଣମାଧ୍ୟମର ସବୁଠାରୁ ବଡ଼ ସମସ୍ୟା ବୋଲି କହିଥିଲେ। କମ୍ ସମୟ ମଧ୍ୟରେ ଅଧିକ କ୍ଲିକ୍ ହେଉଥିବା ଖବର ଅଧିକ ଲାଭ ଦେଉଥିବାରୁ ଜାଣିଶୁଣି ମିଥ୍ୟା ଖବରର ପ୍ରସାରଣ କରାଯାଏ। ଉଭୟ ଗଣମାଧ୍ୟମ ଓ ଗଣତନ୍ତ୍ର ପାଇଁ ଏହା ଏକ ବଡ଼ ବିପଦ ହୋଇଥିବାରୁ ଲୋକେ ଏହାକୁ ବିରୋଧ କରିବା ଉଚିତ ବୋଲି ସେ କହିଥିଲେ। ଲୋକଙ୍କ ବ୍ୟକ୍ତିଗତ ତଥ୍ୟ ଚୋରି କରି ଭାଜପା ତାକୁ ନିର୍ବାଚନୀ ଫାଇଦା ପାଇଁ ବ୍ୟବହାର କରିବା ସହ ଉକ୍ତ ତଥ୍ୟକୁ ବିକ୍ରି ଏବଂ ନିଲାମ କରାଯାଉଛି। ଇଲେକ୍ସନ ବଣ୍ଡ୍ ଜରିଆରେ ଭାଜପା ସର୍ବାଧିକ ଲାଭବାନ୍ ହୋଇଥିବାବେଳେ ନିଜ ଆଇଟି ସେଲ୍ର ଦୁରୁପଯୋଗ କରି ସୋସିଆଲ ମିଡିଆରେ ବିଷ ବାଣ୍ଟୁଛି ବୋଲି ସେ କହିଥିଲେ। ଆଲୋଚନାଚକ୍ରରେ ଈପ୍ସିତା ପତି ପ୍ରାରମ୍ଭିକ ସୂଚନା ଦେଇଥିବା ବେଳେ ‘ଅଧିକାର’ର ସମ୍ପାଦକ ଜନାର୍ଦ୍ଦନ ପତି ଗଣମାଧ୍ୟମ ଏବଂ ସାମାଜିକ ଗଣମାଧ୍ୟମ ମଧ୍ୟରେ ରହିଥିବା ତଫାତ୍ ସମ୍ପର୍କରେ ଆଲୋଚନା କରିଥିଲେ।