‘ଲଘୁ ବନଜାତ ଦ୍ରବ୍ୟ ସଂଗ୍ରହ, ବିକ୍ରୟ ବ୍ୟବସ୍ଥା ଜାରି ରଖ’
11:41 amApril 9, 2020 / 41

ଭୁବନେଶ୍ୱର,୯ା୪(ବ୍ୟୁରୋ): ମହାମାରୀ କରୋନା ଜନସାଧାରଣଙ୍କ ଜନଜୀବନକୁ ବହୁଳ ଭାବେ ପ୍ରଭାବିତ କରିଛି। ବିଶେଷକରି ଅନୁସୂଚିତ ଜନଜାତି(ଏସ୍‌ଟି) ବର୍ଗ ବହୁଳ ଭାବେ ପ୍ରଭାବିତ ହେଉଛନ୍ତିି। ଜଙ୍ଗଲରେ ମିଳୁଥିବା ବିଭିନ୍ନ ଲଘୁଦ୍ରବ୍ୟ ଉତ୍ତୋଳନ ପ୍ରାୟତଃ ଏହି ସମୟରେ ହୋଇଥାଏ। ଜନଜାତିମାନଙ୍କ ଦ୍ୱାରା ମହୁ, ନିମ୍ବ ମଞ୍ଜି, ତେଜପତ୍ର, ମହୁଆ ମଞ୍ଜି, ଶାଳପତ୍ର, କରଞ୍ଜ ମଞ୍ଜି ଓ ଅନ୍ୟାନ୍ୟ ଦ୍ରବ୍ୟ ସଂଗୃହୀତ ହୋଇଥାଏ। ହେଲେ କରୋନା ସଂକ୍ରମଣକୁ ପ୍ରତିହତ କରିବା ପାଇଁ କରାଯାଇଥିବା ଲକ୍‌ଡାଉନ ଏଥିରେ ବାଧା ସୃଷ୍ଟି କରିଛି। ଗତ ୬ ତାରିଖରେ ୧୫ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଆଦିବାସୀ କଲ୍ୟାଣ ମନ୍ତ୍ରୀ ଅର୍ଜୁନ ମୁଣ୍ଡାଙ୍କ ଦ୍ୱାରା ଚିଠି ଲେଖାଯାଇଛି। ଏଥିରେ ଉଲ୍ଲେଖ କରାଯାଇଛି ଯେ, ଆଦିବାସୀମାନଙ୍କ ଜୀବିକାର୍ଜନରେ ପ୍ରଧାନମନ୍ତ୍ରୀ ବନ ଧନ ଯୋଜନା(ପିଏମ୍‌ଭିଡିୱାଇ) ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଦେଶର ୧୨୦୫ ପିଏମ୍‌ଭିଡିୱାଇ କେନ୍ଦ୍ର ଦ୍ୱାରା ୩ ଲକ୍ଷ ୬୦ ହଜାର ଆଦିବାସୀ ଏକାଠି ହୋଇ କାର୍ଯ୍ୟ କରିବା ସହ ଜୀବିକାର୍ଜନ କରିପାରିଥାନ୍ତି। କରୋନା ଦ୍ୱାରା ଏ ସବୁ କାର୍ଯ୍ୟ ବହୁଳ ଭାବେ ପ୍ରଭାବିତ ହୋଇଛି। ତେଣୁ ଜନଜାତିମାନେ ଯେପରି ସୁରୁଖୁରୁରେ ଲଘୁ ବନଜାତ ଦ୍ରବ୍ୟ ସଂଗ୍ରହ କରିପାରିବେ, ସେଥିପ୍ରତି ରାଜ୍ୟ ସରକାର ଦୃଷ୍ଟି ଦିଅନ୍ତୁ ବୋଲି କେନ୍ଦ୍ର ମନ୍ତ୍ରୀ କହିଛନ୍ତି। ସେହିଭଳି ନିର୍ଦ୍ଦିଷ୍ଟଭାବେ ରାଜ୍ୟ ସରକାର ସ୍ବତନ୍ତ୍ର ନୋଡାଲ ଏଜେନ୍ସି ଜରିଆରେ ଏହି ଲଘୁ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରନ୍ତୁ। ଏଥିସହିତ ସଂଗ୍ରହ କରୁଥିବା ବର୍ଗକୁ ସର୍ବନିମ୍ନ ସହାୟକ ମୂଲ୍ୟ(ଏମ୍‌ଏସ୍‌ପି) ପ୍ରଦାନ କରନ୍ତୁ। ମନ୍ତ୍ରଣାଳୟ ପକ୍ଷରୁ ଓଡ଼ିଶା ପାଇଁ ପ୍ରାୟ ୪୬୨୧.୧୭ କୋଟି ଟଙ୍କାର ଅନୁଦାନ ରହିଥିବା ଜଣାପଡ଼ିଛି। ଏଥିପାଇଁ ଅଧିକ ଅର୍ଥ ଆବଶ୍ୟକ ପଡ଼ିଲେ ମନ୍ତ୍ରଣାଳୟ ପକ୍ଷରୁ ଯୋଗାଇ ଦିଆଯିବ ବୋଲି କେନ୍ଦ୍ରମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି।
ଆଦିବାସୀମାନଙ୍କ ଆର୍ଥିକ, ସାମାଜିକ ଜୀବନ ଉପରେ ଗବେଷଣା କରୁଥିବା ଚିତ୍ତରଞ୍ଜନ ପାଣି କୁହନ୍ତି ଯେ, ଲକ୍‌ଡାଉନ ଯୋଗୁ ସାପ୍ତାହିକ ହାଟ ବନ୍ଦ ରହିିଛି। ଦ୍ରବ୍ୟ ସଂଗ୍ରହ ହେବା ପରେ ତାହାର ବିକ୍ରୟ ପାଇଁ ତୃଣମୂଳସ୍ତରେ ବ୍ୟବସ୍ଥା ରହିବା ଆବଶ୍ୟକ। ଏହି କାର୍ଯ୍ୟ କରିବା ପାଇଁ ୧୨୦୦ରୁ ଅଧିକ ସଂଗ୍ରହକାରୀ ସଂସ୍ଥା ବିପଣନ ନିଗମ ଦ୍ୱାରା ଚିହ୍ନଟ ହୋଇଛନ୍ତି। ଏହି ସଂସ୍ଥାଗୁଡ଼ିକ ସହଯୋଗରେ ତୁରନ୍ତ ଲଘୁ ବନଜାତ ଦ୍ରବ୍ୟ ସଂଗ୍ରହ ଓ ବିକ୍ରୟ କରାଯାଉ ବୋଲି ଚିତ୍ତରଞ୍ଜନ କହିଛନ୍ତି।