ଭଞ୍ଜନଗର/ପୋଲସରା,୮ା୫(ଡି.ଏନ୍.ଏ.) : ଲକ୍ଡାଉନ୍ ଯୋଗୁ ଶ୍ରମିକମାନଙ୍କ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି। ଏହିଭଳି ଗଞ୍ଜାମ ଜିଲା ପୋଲସରା ନିକଟସ୍ଥ ହାତୀଓଟ ଏବଂ କେନ୍ଦୁବାଡ଼ି ଅଞ୍ଚଳର ଇଟାଭାଟିରେ କାମ କରୁଥିବା ବଲାଙ୍ଗୀର ଜିଲାର ଶ୍ରମିକମାନେ ଶୁକ୍ରବାର ନିଜ ଭିଟାମାଟି ଅଭିମୁଖେ ଚାଲିଚାଲି ବାହାରିଛନ୍ତି। ପୋଲସରା, ବେଲଗୁଣ୍ଠା, ଭଞ୍ଜନଗର ବ୍ଲକ ଓ ଏନଏସି ଅତିକ୍ରମ କରିବା ପରେ ସେମାନେ ସୋରାଦେବୀ ମନ୍ଦିର ରାସ୍ତାରେ ରୋଷେଇ କରିବା ପାଇଁ ଅଟକିଛନ୍ତି। ବାଟରେ ସେମାନଙ୍କ ଯାତାୟାତ ସମ୍ପର୍କରେ ପ୍ରଶାସନ ଜାଣିଥିଲେ ମଧ୍ୟ ସାହାଯ୍ୟ କରିନାହିଁ। ଏନେଇ ପାଟଣାଗଡ଼ ସାଳପଦର ଗ୍ରାମର ଜଣେ ଶ୍ରମିକ କହିଛନ୍ତି, ଲକ୍ଡାଉନ୍ ପୂର୍ବରୁ ଆମେ ଆସି ହାତୀଓଟ ଇଟାଭାଟିରେ କାମ କରୁଥିଲୁ। ୨ମାସ ହେବ କାମ ବନ୍ଦ ହୋଇଯାଇଛି । ଖାଇବା ପାଇଁ ପାଖରେ ଟଙ୍କାଟିଏ ନାହିଁ। ପ୍ରଶାସନକୁ ସହଯୋଗ ମାଗିଥିଲୁ ଭିଟାମାଟିକୁ ଫେରାଇ ଦେବା ବ୍ୟବସ୍ଥା କରିବା ପାଇଁ। କିନ୍ତୁ ୧୫ଦିନ ହେଲା କେହି ତାଙ୍କ କଥା ନ ଶୁଣିବାରୁ ଶୁକ୍ରବାର ସକାଳୁ ଭିଟାମାଟିକୁ ଫେରିବା ପାଇଁ ନିଷ୍ପତ୍ତି ନେଇଛନ୍ତି। ଏମାନଙ୍କ ମଧ୍ୟରେ ୧୨ଜଣ ପୁରୁଷ ଓ ମହିଳା ଥିବାବେଳେ ୬ଜଣ ଶିଶୁ ଅଛନ୍ତି। ପ୍ରଚଣ୍ଡ ଖରାରେ ବହୁତ କଷ୍ଟରେ ଶ୍ରମିକମାନେ ସେମାନଙ୍କ ଶିଶୁମାନଙ୍କୁ ଧରି ଯାତାୟାତ କରୁଛନ୍ତି। ଭଞ୍ଜନଗରରେ ଆଜି ତାପମାତ୍ରା ୪୦ ଡିଗ୍ରୀ ଥିବା ଜଣାପଡ଼ିଛି। ଏନେଇ ପୋଲସରା ବିଡିଓ ଶମ୍ଭୁନାଥ ନନ୍ଦୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଏନେଇ ତାଙ୍କୁ କେହି ଅବଗତ କରାଇନାହାନ୍ତି । ଯଦି ସୂଚନା ମିଳିଥାନ୍ତା ତେବେ ପ୍ରଶାସନ ପକ୍ଷରୁ ଆବଶ୍ୟକ ସାହାଯ୍ୟ ସହଯୋଗ ଯୋଗାଇ ଦିଆଯାଇଥାନ୍ତା।
