ଜର୍ମାନୀର ଜିଆଇ୍ଜେଡ ପ୍ରତିଷ୍ଠାନ, ଓଡିଶା ସରକାରଙ୍କ ମଧ୍ୟରେ ଚୁକ୍ତି ସ୍ବାକ୍ଷରିତ ରାଜ୍ୟର ସହରାଞ୍ଚଳ ବିକାଶରେ ହେବ ସହାୟକ
21 ଭୁବନେଶ୍ୱର,୨୫।୬(ବ୍ୟୁରୋ): ସହରାଞ୍ଚଳ ବିକାଶକୁ ଦୃଷ୍ଟିରେ ରଖି ଗୃହ ନିର୍ମାଣ ଓ ନଗର ଉନ୍ନୟନ, ପଞ୍ଚାୟତିରାଜ ଓ ପାନୀୟଜଳ, ଆଇନ ମନ୍ତ୍ରୀ ପ୍ରତାପ ଜେନାଙ୍କ ଉପସ୍ଥିତିରେ ଜର୍ମାନୀର ଜିଆଇଜେଡ ପ୍ରତିଷ୍ଠାନ ଏବଂ ଓଡିଶା ସରକାରଙ୍କ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ମଧ୍ୟରେ ସୋମବାର ରାଜିନାମା ସ୍ବାକ୍ଷର ହୋଇଛି। ବୁଝାମଣା ସ୍ବାକ୍ଷରିତ ପରେ ରାଜ୍ୟର ସହରାଞ୍ଚଳ ବିକାଶ କ୍ଷେତ୍ରରେ ବଳିଷ୍ଠ ପ୍ରକଳ୍ପକୁ ଏହା ଉତ୍ସାହିତ କରିବ ବୋଲି ମନ୍ତ୍ରୀ ଆଶାପ୍ରକାଶ କରିଛନ୍ତି। ସେ କହିଛନ୍ତି, ୨୦୧୮ରେ ଜର୍ମାନ ଓ ଭାରତ ସରକାରଙ୍କ ଗୃହ ଓ ନଗର ଉନ୍ନୟନ ମନ୍ତ୍ରାଳୟ ମଧ୍ୟରେ ହୋଇଥିବା ରାଜିନାମା ଅନୁଯାୟୀ ସ୍ମାର୍ଟସିଟିଗୁଡିକରେ ବିଭିନ୍ନ ବିକାଶ ଓ ଜଳବାୟୁ ପରିବର୍ତ୍ତନ ଆଧାରିତ କାର୍ଯ୍ୟକ୍ରମ ଉପରେ କାର୍ଯ୍ୟାନୁଷ୍ଠାନ ରୂପାୟିତ ହେଉଥିବା ପରିପ୍ରେକ୍ଷୀରେ ଏହି ବୁଝାମଣା ଓଡ଼ିଶା ପାଇଁ ବିଶେଷ ଫଳପ୍ରଦ ହେବ। ଜର୍ମାନର ଏହି ସଂସ୍ଥା ଏବଂ ରାଜ୍ୟର ଗୃହ ଓ ନଗର ଉନ୍ନୟନ ବିଭାଗ ମିଳିତ ଭାବେ ସହରାଞ୍ଚଳରେ ଗରିବଙ୍କ ପାଇଁ ଗୃହ ନିର୍ମାଣ, ମୌଳିକ ସହରୀ ଭିତ୍ତିଭୂମି ଓ ଜଳବାୟୁ ପ୍ରତିରୋଧକ ନିର୍ଘଣ୍ଟକୁ ଗୁରୁତ୍ୱ ଦେଇ କାର୍ଯ୍ୟ କରିବ। ରାଜ୍ୟରେ ୧୭ପ୍ରତିଶତ ଅଞ୍ଚଳର ସହରୀକରଣ ହୋଇଥିବାବେଳେ ପରବର୍ତ୍ତୀ ସମୟରେ ଅଧିକ ଲୋକ ସହରୀ ସୁବିଧା ପାଇବାକୁ ଆଗ୍ରହୀ ହେବେ ଓ ସେମାନଙ୍କୁ ଏହି ସୁବିଧା ଉପଲବ୍ଧ କରାଇବା ପାଇଁ ଏହି ରାଜିନାମା ସହାୟକ ହେବ। ମୁଖ୍ୟମନ୍ତ୍ରୀଙ୍କ ଦିଗଦର୍ଶନ ବଳରେ ଗୃହ ଓ ନଗର ଉନ୍ନୟନ ବିଭାଗ ରାଜ୍ୟରେ ସହରାଞ୍ଚଳ ବିକାଶ ପାଇଁ ଉଦ୍ୟମ ଅବ୍ୟାହତ ରହିବ ଓ ସେଥିରେ ୫-ଟି ମନ୍ତ୍ର ମଧ୍ୟ ପ୍ରତିଫଳିତ ହେବ ବୋଲି ସେ କହିଛନ୍ତି। ବିଭାଗୀୟ ଶାସନ ସଚିବ ଜି. ମାଥିଭାଥନନଙ୍କ ଉପସ୍ଥିତିରେ ଗୃହ ନଗର ଉନ୍ନୟନ ବିଭାଗର ସ୍ବତନ୍ତ୍ର ସଚିବ ପ୍ରେମ କୁମାର ଝା, ବିଏମ୍ସିର ଅତିରିକ୍ତ କମିଶନର ସୁରଥ ଚନ୍ଦ୍ର ମଲ୍ଲିକ, ସ୍ମାର୍ଟ ସିଟିର ସରୋଜ କୁମାର ସ୍ବାଇଁ ଏହି ରାଜିନାମାରେ ସ୍ବାକ୍ଷର କରିଥିଲେ। ଜର୍ମାନ ପକ୍ଷରୁ ଜିଆଇଜେଡର ପ୍ରକଳ୍ପ ନିର୍ଦ୍ଦେଶକ ସୁଶ୍ରୀ ଟାଞ୍ଜା ଫେଲ୍ଡମ୍ୟାନ ସ୍ବାକ୍ଷର କରିଛନ୍ତି।