ବାଲିଆ,୭।୬: ଖୋର୍ଦ୍ଧା ରେଳ ଡିଭିଜନ ଅଧୀନ କଟକ-ପାରାଦୀପ ରେଳପଥର ଗୋଠପଦାଠାରେ ୧୪ନଂ. ଫାଟକ ଠାରୁ ୧୫ନଂ. ଫାଟକ ପର୍ଯ୍ୟନ୍ତ ଜନସାଧାରଣଙ୍କ ଯାତାୟାତ ନିମନ୍ତେ ରେଲଓ୍ବେ ପକ୍ଷରୁ ନୂତନ ରାସ୍ତା ନିର୍ମାଣ କରାଯାଉଛି। ତେବେ ଏହି ରାସ୍ତା କାର୍ଯ୍ୟ ନିମ୍ନମାନର ହେଉଥିବା ସ୍ଥାନୀୟ ଗୋଠପଦା ଗ୍ରାମର କୈଳାସ ଚନ୍ଦ୍ର ଭୂୟଁ।, ଯୁଧିଷ୍ଠିର ଖଣ୍ଡୁଆଳ, ଦୀନବନ୍ଧୁ ମିଶ୍ର, ଅରକ୍ଷିତ ବେହେରା, ଜୟନ୍ତ ଭୁୟାଁ, ରାମଚନ୍ଦ୍ର ବେହେରା, ହରେକୃଷ୍ଣ ବେହେରା, ଶିବ କୁମାର ଖଣ୍ଡୁଆଳ, ସୁରେନ୍ଦ୍ରନାଥ ଖଣ୍ଡୁଆଳ, ବିକ୍ରମ ମହାନ୍ତି ପ୍ରମୁଖ ଅଭିଯୋଗ କରିଛନ୍ତି। ଏ ସମ୍ପର୍କରେ ସେମାନେ ରେଲଓ୍ବେ ଡିଭିଜନାଲ ମ୍ୟାନେଜରଙ୍କୁ ପତ୍ର ଯୋଗେ ଜଣାଇଛନ୍ତି। ଏହି ରାସ୍ତାରେ ମାଟି କାମ କରିବା ବେଳେ ଶୁଖିଲା ମାଟି ନ ପକାଇ ଓଦା ମାଯି ପକାଯାଇଛି। ଫଳରେ ତାହା ଧିରେ ଧିରେ ଦବିବାରେ ଲାଗିଛି। ଠିକାଦାର ରାସ୍ତାଟିକୁ ଅଣଓସାରିଆ କରିଦେଇଛନ୍ତି। ତେଣୁ ସେହି ରାସ୍ତାରେ ଆଖୁ ଗାଡ଼ି, ବିଲକୁ ଟ୍ରାକ୍ଟର କିମ୍ବା ଅନ୍ୟ କୌଣସି ଭାରିଯାନ ଚଳାଚଳ କରିବାରେ ଅସୁବିଧା ହେବ। ସେହିପରି ରାସ୍ତାରେ ଉପଯୁକ୍ତ ପରିମାଣର ଡଷ୍ଟ ପକାଯାଉନାହିଁ। ତେଣୁ ରାସ୍ତାର ସ୍ଥାୟିତ୍ୱକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସେହିପରି ରାସ୍ତାର ଏକ ସ୍ଥାନରେ ଜଳ ନିଷ୍କାସନ ପାଇଁ ବସାଯାଇଥିବା ହୋମ୍ପାଇପ୍ ନିମ୍ନମାନର ବୋଲି ଅଭିଯୋଗ ହୋଇଛି। ଉକ୍ତ କଲଭର୍ଟ ମଧ୍ୟ ଅଣଓସାରିଆ ହୋଇଛି। ଆବଶ୍ୟକ ଅନୁଯାୟୀ ସିମେଣ୍ଟ ଓ ରଡ୍ ଦିଆଯାଇ ନ ଥିବାରୁ ଉକ୍ତ କଲ୍ଭର୍ଟର ସ୍ଥାୟିତ୍ୱକୁ ନେଇ ମଧ୍ୟ ଗ୍ରାମବାସୀ ଅଭିଯୋଗ ଉଠାଇଛନ୍ତି। ସୂଚନାଯୋଗ୍ୟ, କଟକ ପାରାଦୀପ ରେଳପଥର ୧୪ ନଂ ଗେଟ ଗୋଠପଦା ଗ୍ରାମ ନିକଟରେ ଲୋକେ ଦୀର୍ଘବର୍ଷ ଧରି ଲେବୁଲ କ୍ରସିଂ ଦେଇ ଯାତାୟାତ କରୁଥିଲେ। ଏହାର ଅପରପାର୍ଶ୍ୱରେ ଥିବା ଚାଷ ଜମିକୁ ସ୍ଥାନୀୟ ଚାଷୀମାନେ ଯାଇଥାନ୍ତି। ୨ ବର୍ଷ ତଳେ ରେଲଓ୍ବେ ପକ୍ଷରୁ ସେହି ଗେଟ୍ ସମ୍ପୂର୍ଣ୍ଣ ବନ୍ଦ କରିଦେବାକୁ ଯୋଜନା ହୋଇଥିଲା। କିନ୍ତୁ ଏହାକୁ ଗ୍ରାମବାସୀ ବିରୋଧ କରିବାରୁ ବାଧ୍ୟହୋଇ ରେଲଓ୍ବେ ପକ୍ଷରୁ ରେଳପଥର ଦକ୍ଷିଣ ପାର୍ଶ୍ୱରେ ଏକ ରାସ୍ତା ନିର୍ମାଣ କରିବାକୁ ନିଷ୍ପତ୍ତି ହୋଇଥିଲା।
