ଧର୍ମଶାଳା/ଚଢେଇଧରା.୨୨ା୧୧(ଡି.ଏନ୍.ଏ.): ଧର୍ମଶାଳା ତହସିଲ ଅନ୍ତର୍ଗତ ରାହାଡପୁର କଳାପଥର ପାହାଡରୁ ବେଆଇନ ପଥର ଉତ୍ତୋଳନ ରୋକିବା ନେଇ ଗୁରୁବାର ତହସିଲ ପକ୍ଷରୁ ଚଢ଼ାଉ କରାଯାଇଛି। ଏହି ପାହାଡରେ ବେଆଇନ ପଥର ଉତ୍ତୋଳନ ରୋକିବାକୁ ଯାଇ ୧୪୪ ଧାରା ଜାରି କରାଯାଇଛି। ହେଲେ ଏହାକୁ ଉଲ୍ଲଘଂନ କରି ପଥର ମାଫିଆମାନେ ବେଆଇନଭାବେ ପଥର ଉତ୍ତୋଳନ କରୁଥିବା ଖବର ପାଇ ଧର୍ମଶାଳା ତହସିଲଦାର ସରୋଜ କୁମାର ପଣ୍ଡା, ଅତିରିକ୍ତ ତହସିଲଦାର ଦେବୀ ପ୍ରସନ୍ନ ମହାନ୍ତି ଓ ଜେନାପୁର ଥାନାଧିକାରୀ ଶୁସାନ୍ତ କୁମାର ଦାସ ସଦଳବଳେ ଚଢ଼ାଉ କରିଥିଲେ। ଚଢ଼ାଉବେଳେ ୧ ହାଇୱା ସହ ୨ ଟ୍ରକ୍ ଜବତ କରିଥିଲେ। ପରେ ରାହାଡପୁର ଓ ବହୁଚର୍ଚ୍ଚିତ ଡଙ୍କାରୀ ପାହାଡ ଦେଇ ଆସିଥିବା ୨ ରାସ୍ତାରୁ ଗୋଟିଏକୁ ଜେସିବି ଦ୍ୱାରା ଖୋଳି ବିଚ୍ଛିନ୍ନ କରିଥିଲେ। ସେହିପରି ଅନ୍ୟ ୨୦ ଖାଦାନକୁ ସଂଯୋଗ କରୁଥିବା ରାସ୍ତାକୁ ମଧ୍ୟ ଖୋଳାଯାଇଥିବା ତହସିଲଦାର ପଣ୍ଡା ସୂଚନା ଦେଇଛନ୍ତି। ଏଥିସହ ଆଗାମୀ ଦିନରେ ଆଇନ ଉଲ୍ଲଘଂନକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି। ଜବତ ଗାଡିଗୁଡିକ ଚଢେଇଧରା ଆଉଟପୋଷ୍ଟରେ ରଖାଯାଇଥିବା ଥାନାଧିକାରୀ ଦାସ କହିଛନ୍ତି। ତେବେ ପୂର୍ବରୁ ରାହାଡପୁର ପରି ଡଙ୍କାରୀ, ବାଘୁଆ, ଆରୁହା, ଯାବରା ଓ ବିଛାଖଣ୍ଡି ଆଦି ପାହାଡରେ ୧୪୪ ଧାରା ଜାରି କରାଯାଇଥିଲେ ମଧ୍ୟ ମାଫିଆମାନେ ପଥର ଉତ୍ତୋଳନ କରୁଥିବା ଅଭିଯୋଗ ହେଉଛି। ଏହି ପାହାଡଗୁଡିକରେ ଯଦି ତହସିଲ ପକ୍ଷରୁ ଚଢାଉ ଜାରି ରୁହେ ତାହାଲେ ବେଆଇନ ଲୁଟ୍ ରୋକାଯାଇପାରିବା ନେଇ ସ୍ଥାନୀୟ ବୁଦ୍ଧିଜୀବୀ ଆଶା ପ୍ରକଟ କରିଛନ୍ତି।
