କଟକ,୩ା୩: ଦେଶର ପ୍ରମୁଖ ରାଜ୍ୟଗୁଡ଼ିକ ମଧ୍ୟରେ ଓଡ଼ିଶାର ଜିଏସ୍ଟି ଅଭିବୃଦ୍ଧି ହାର ସର୍ବାଧିକ ରହିଛି। ଚଳିତ ବର୍ଷ ଫେବୃୟାରୀରେ ରାଜ୍ୟର ସାମଗ୍ରିକ ଜିଏସ୍ଟି ସଂଗ୍ରହ ୪୧୦୧.୦୯ କୋଟି ହୋଇଥିବା ବେଳେ ରାଜ୍ୟ ଜିଏସ୍ଟି ବାବଦରେ ୧୧୫୨.୩୭ କୋଟି ଟଙ୍କା ସଂଗ୍ରହ ହୋଇଛି। ଫଳରେ ୨୦୨୧ ଫେବୃୟାରୀରେ ସାମଗ୍ରିକ ଜିଏସ୍ଟି ସଂଗ୍ରହ ୩୩୪୦.୫୬ କୋଟି ଥିବା ବେଳେ ଚଳିତ ବର୍ଷ ସେଥିରେ ୨୩% ଅଭିବୃଦ୍ଧି ଘଟିଛି। ସେହିପରି ଗତବର୍ଷ ଫେବୃୟାରୀରେ ଓଡ଼ିଶାର ରାଜ୍ୟ ଜିଏସ୍ଟି ସଂଗ୍ରହ ୭୮୧.୦୬ କୋଟି ଟଙ୍କା ଥିବା ବେଳେ ଚଳିତ ବର୍ଷ ଏଥିରେ ୪୭% ବୃଦ୍ଧି ଘଟିଛି। ଜିଏସ୍ଟି ପ୍ରଚଳନ ହେବା ପରଠାରୁ ଏହା ହେଉଛି ଦ୍ୱିତୀୟ ସର୍ବାଧିକ ରାଜ୍ୟ ଜିଏସ୍ଟି ସଂଗ୍ରହ। ୨୦୨୧ ଫେବୃୟାରୀ ପର୍ଯ୍ୟନ୍ତ ସଂଗୃହୀତ ସାମଗ୍ରିକ ଜିଏସ୍ଟି ୨୬୫୬୭.୪୭ କୋଟି ଟଙ୍କା ଥିବା ବେଳେ ଚଳିତ ଆର୍ଥିକ ବର୍ଷ ସେଥିରେ ୫୧.୩୫% ବୃଦ୍ଧି ଘଟି ଫେବୃୟାରୀ ପର୍ଯ୍ୟନ୍ତ ମୋଟ୍ ଜିଏସ୍ଟି ସଂଗ୍ରହ ୪୦୨୧୦.୦୧ କୋଟି ଟଙ୍କା ରହିଛି। ସେହିଭଳି ୨୦୨୦ ଫେବୃୟାରୀ ସୁଦ୍ଧା ୨୭୦୪୪.୩୭ କୋଟି ଟଙ୍କା ସଂଗୃହୀତ ହୋଇଥିଲା। ଏହାଛଡା ଚଳିତ ଆର୍ଥିକ ବର୍ଷର ଫେବୃୟାରୀ ପର୍ଯ୍ୟନ୍ତ ରାଜ୍ୟର ମୋଟ୍ ଜିଏସ୍ଟି ସଂଗ୍ରହ ୧୧୩୯୧.୭୬ କୋଟି ଥିବାବେଳେ ଗତବର୍ଷ ଫେବୃୟାରୀ ପର୍ଯ୍ୟନ୍ତ ଏହା ୭୩୩୭.୫୩ କୋଟି ଟଙ୍କା ରହିଥିଲା। ଫଳରେ ଏ କ୍ଷେତ୍ରରେ ୫୫.୨୫% ବୃଦ୍ଧି ଘଟିଛି। ୨୦୨୨ ଫେବୃୟାରୀୟରେ କେନ୍ଦ୍ରୀୟ ଜିଏସ୍ଟି (ସିଜିଏସ୍ଟି), ସମନ୍ବିତ ଜିଏସ୍ଟି (ଆଇଜିଏସ୍ଟି) ଓ ଅତିରିକ୍ତ ଟିକସ (ସେସ୍) ବାବଦକୁ ଯଥାକ୍ରମେ ୯୮୯.୪୯ କୋଟି, ୧୨୨୩.୯୨ କୋଟି ଓ ୭୩୫.୭୧କୋଟି ଟଙ୍କା ସଂଗୃହୀତ ହୋଇଛି। ଏଥିସହିତ ରିଟର୍ନ ଦାଖଲ ଖିଲାପୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ, ନିୟମିତ ରିଟର୍ନ ଯାଞ୍ଚ ତଥା ଏନ୍ଫୋର୍ସମେଣ୍ଟ କାର୍ଯ୍ୟକଳାପ ଯୋଗୁ ମଧ୍ୟ ଚଳିତବର୍ଷ ଜିଏସ୍ଟିରେ ବୃଦ୍ଧି ଘଟିଛି। ଚଳିତ ଆର୍ଥିକ ବର୍ଷରେ ମୋଟ୍ ୪୩,୫୪୨ ଜଣ ଟିକସଦାତାଙ୍କୁ ଜିଏସ୍ଟି ପରିସରଭୁକ୍ତ କରାଯାଇଛି। ଯୋଗ୍ୟ ଜିଏସ୍ଟି ଏବଂ ବୃତ୍ତିଗତ ଟିକସଦାତାଙ୍କୁ ପଞ୍ଜୀକୃତ କରିବା ଉଦ୍ଦେଶ୍ୟରେ ୨ମାସ ବ୍ୟାପୀ ସର୍ଭେ ଓ ପଞ୍ଜୀକରଣ କାର୍ଯ୍ୟ ଶେଷ ହୋଇଛି। ନିର୍ଦ୍ଧାରିତ ସମୟସୀମା ମଧ୍ୟରେ ଅତିକମ୍ରେ ୯୦% ରିଟର୍ନ ଦାଖଲ ସୁନିଶ୍ଚିତ କରିବା ପାଇଁ ସମସ୍ତ ସର୍କଲକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ଜିଏସ୍ଟି ଆଇନର ଧାରା ୬୨ ଅନ୍ତର୍ଗତ ରିଟର୍ନ ଖିଲାପୀଙ୍କ ବିରୋଧରେ ଚଳିତ ବର୍ଷ ୧୭,୦୧୫ ଗୋଟି ଆସେସ୍ମେଣ୍ଟ ହାତକୁ ନିଆଯାଇଛି।
୨୦୨୨ ଫେବୃୟାରୀରେ ୧୫.୯୭ ସଂଖ୍ୟକ ଇ-ଓ୍ବେବିଲ୍ ନିର୍ଗମନ କରାଯାଇଥିବା ବେଳେ ୨୦୨୧ ଫେବୃୟାରୀରେ ଏହା ଥିଲା ୧୪.୪୨ ଲକ୍ଷ। ଏ କ୍ଷେତ୍ରରେ ୧୦.୭୨% ଅଭିବୃଦ୍ଧି ଘଟିଛି। ଅତିକମ୍ରେ ୯୦% ରିଟର୍ନ ଦାଖଲ ସୁନିଶ୍ଚିତ କରିବା ପାଇଁ ରାଜ୍ୟ ବାଣିଜ୍ୟକର ଓ ଜିଏସ୍ଟି ଆୟୁକ୍ତ ସୁଶୀଲ କୁମାର ଲୋହାନି ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସହ ସନ୍ଦିଗ୍ଧ ଏବଂ ବୃହତ୍ ଟିକସଦାତାଙ୍କ ରିଟର୍ନ ଯାଞ୍ଚ କରି ସେଥିରେ ତ୍ରୁଟି ପରିଲକ୍ଷିତ ହେଲେ ତୁରନ୍ତ ଡିମାଣ୍ଡ ଓ ଆଦାୟ କାର୍ଯ୍ୟ ଆରମ୍ଭ କରିବାକୁ ମଧ୍ୟ ସେ ପରାମର୍ଶ ଦେଇଛନ୍ତି। ୫-ଟି ନିୟମ ପାଳନ ପୂର୍ବକ ସଚ୍ଚୋଟ ବ୍ୟବସାୟୀଙ୍କୁ ସାହାଯ୍ୟ କରିବା ପାଇଁ ମଧ୍ୟ ସେ ଗୁରୁତ୍ୱ ଦେଇଛନ୍ତି।
