ବଡ଼ବିଲ,୨୯ା୬(ସ୍ବ.ପ୍ର.) : କେନ୍ଦୁଝର ଜିଲାର ନାଲଦା ୧୦ ନମ୍ବର ରାଜ୍ୟ ରାଜପଥରେ ଶନିବାର ଅପରାହ୍ନରେ ଏକ ଟ୍ରକର କ୍ୟାବିନ୍ ଜଳିଯାଇଛି। ମିଳିଥିବା ସୂଚନା ଅନୁଯାୟୀ, ବେଲକୁଣ୍ଡିଠାରେ ଠିଆ ହୋଇଥିବା ସିଜି ୦୪ ଏମ୍କ୍ୟୁ ୬୩୦୧ ନମ୍ବର ବିଶିଷ୍ଟ ଏକ ୧୪ ଚକିଆ ଟ୍ରକ କ୍ୟାବିନ୍ରେ ଶନିବାର ଅପରାହ୍ନରେ ହଠାତ୍ ନିଆଁ ଲାଗିଯାଇଥିଲା। ଖବରପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ହେଁ ସେତେବେଳକୁ ଟ୍ରକର କ୍ୟାବିନ୍ ସମ୍ପୂର୍ଣ୍ଣ ଜଳିଯାଇଥିଲା। ଅଗ୍ନିକାଣ୍ଡର କାରଣ ଜଣାପଡ଼ିନାହିଁ। ଟ୍ରକଟି ଝାଡ଼ଖଣ୍ଡ ରାଜ୍ୟର ରାଞ୍ଚିରୁ କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ଟଣ୍ଟୋସ୍ଥିତ କେଏନ ରାମ ଖଣିରୁ ଲୌହପଥର ବୋଝେଇ ନିମନ୍ତେ ଆସିଥିଲା। ତେବେ ରାସ୍ତାରେ ଟ୍ରକ ରଖି ଡ୍ରାଇଭର ଓ ହେଲପର ବାହାରେ ବୁଲୁଥିବାରୁ ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଥିବା ଜଣାପଡ଼ିଛି। ବଡ଼ବିଲ ସହରାଞ୍ଚଳ ମଧ୍ୟ ଦେଇ ଭାରୀଯାନ ଯାତାୟାତ ଉପରେ ନୋ-ଏଣ୍ଟ୍ରି ଲାଗିଥିବାବେଳେ ରାସ୍ତା ଉପରେ ଅନେକ ଭାରୀଯାନ ଅଟକି ରହୁଛନ୍ତି। ଫଳରେ ଅଧିକାଂଶ ସମୟରେ ଏପରି ଅଘଟଣମାନ ଘଟୁଛି।
