ରଣପୁର,୨୧।୧୨(ସ୍ବ.ପ୍ର.)-ରଣପୁର ପଞ୍ଚାୟତ ସମିତି ବୈଠକ ସ୍ଥାନୀୟ ସମ୍ମିଳନୀ କକ୍ଷରେ ଶୁକ୍ରବାର ଚେୟାରମ୍ୟାନ ନିରୁପମା ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇ ଯାଇଛି । ସମିତି ବୈଠକ ଶାନ୍ତିଶୃଙ୍ଖଳାର ସହ ଚାଲୁ ରହିଥିବାବେଳେ ଜିଓ ଟ୍ୟାଗ୍ରୁ ବାଦ୍ ପଡିଥିବା ରଣପୁର ବ୍ଲକ ଅଞ୍ଚଳର ପ୍ରାୟ ୫୦୦ରୁ ଊର୍ଦ୍ଧ୍ୱ ମହିଳାପୁରୁଷ ସଭାଗୃହକୁ ଧସେଇ ପଶି ଆସିଥିଲେ । ସେମାନଙ୍କର ନଁା ପୂର୍ବେ ଜିଓ ଟ୍ୟାଗ୍ରେ ଥିବାବେଳେ ପରବର୍ତ୍ତୀ ସମୟରେ କେଉଁଥିପାଇଁ କଟାଗଲା ତା’ର ପ୍ରତିବାଦ କରି ପାଟିତୁଣ୍ଡ କରିଥିଲେ । ହଠାତ୍ ଏତେ ସଂଖ୍ୟକ ଲୋକ କାହିଁକି ସଭାଗୃହକୁ ପଶି ଆସିଲେ କେହି କିଛି ବୁଝି ପାରି ନ ଥିଲେ । ବାହାରେ ପୋଲିସ ମୁତୟନ ନ ଥିବାରୁ ପରିସ୍ଥିତି ବିଗିଡିବା ଆରମ୍ଭ ହୋଇଥିଲା । ଲୋକ ପ୍ରତିନିଧି, ସରକାରୀ କର୍ମଚାରୀଙ୍କ ସହ ଲୋକଙ୍କ ମଧ୍ୟରେ ଠେଲାପେଲା, କଥାକଟାକଟି, ଯୁକ୍ତିତର୍କ ଆରମ୍ଭ ହୋଇ ଯାଇଥିଲା। ଏପରି କି ପ୍ରାୟ ଅଧ ଘଣ୍ଟାଏ ଧରି ସେଠାରେ ଉତ୍ତେଜନା ଲାଗିରହିଥିଲା । ବିଡିଓ ରଶ୍ମିରେଖା ଦାସ, ରଣପୁର ବିଧାୟକଙ୍କ ପ୍ରତିନିଧି ପ୍ରଭାତ ଦଳବେହେରା ହିତାଧିକାରୀଙ୍କୁ ବୁଝାଶୁଝା କରି ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ । ଏହା ପରେ ଗୃହରେ ପୁଣି ବୈଠକ ଆରମ୍ଭ ହୋଇଥିଲା। ଲୋକେ ଧସେଇ ପଶି ଆସିବା ଘଟଣାରେ ନିନ୍ଦା ପ୍ରସ୍ତାବ ଆଗତ କରାଯାଇଥିଲା । ଆଗକୁ ଯେପରି ଏପରି ପରିସ୍ଥିତି ସୃଷ୍ଟି ନ ହେବ ସେଥିପ୍ରତି ଦୃଷ୍ଟି ଦେବାକୁ ପ୍ରଶାସନକୁ ସଭ୍ୟମାନେ ଅବଗତ କରାଇଛନ୍ତି ।
ସୂଚନା ଅନୁସାରେ, ପ୍ରଧାନମନ୍ତ୍ରୀ ଆବାସ ଯୋଜନାରେ କାର୍ଯ୍ୟାଦେଶ ଦେବାକୁ ଜିଓ ଟ୍ୟାଗ୍ କରାଯାଇଥିଲା । ତେବେ ୧୨ ହଜାର ଲୋକଙ୍କ ନାମ ଟ୍ୟାଗ ହୋଇଥିବାବେଳେ ସେଥିରୁ ୩ହଜାର ଲୋକଙ୍କୁ ବାଦ୍ ଦିଆ ଯାଇଥିଲା । ଜିଓ ଟ୍ୟାଗରୁ ବାଦ୍ ପଡିଥିବା ହିତାଧିକାରୀ ଶୁକ୍ରବାର ବିଡିଓଙ୍କୁ ଭେଟି ଅଭିଯୋଗ କରିବାକୁ ଆସିଥିଲେ । ହେଲେ ରଣପୁର ବିଡିଓ ସେମାନଙ୍କୁ ଦେଖା ଦେଇ ନ ଥିଲେ । ୪ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଅପେକ୍ଷାରତ ଲୋକ କ୍ଷୋଭ ପ୍ରକାଶ କରି ସମିତି ସଭାଗୃହକୁ ଧସେଇ ପଶିଥିଲେ ।
