କଟକ ଅଫିସ,୨୮ା୧-
ଟାଙ୍ଗୀସ୍ଥିତ ଡ୍ରିମ୍ସ ଗ୍ରାଉଣ୍ଡରେ ସୋମବାର୍ଠାରୁ ଓଡ଼ିଶା-ଆସାମ ରଣ୍ଜୀ ଟ୍ରଫି କ୍ରିକେଟ ମ୍ୟାଚ୍ ଆରମ୍ଭ ହୋଇଛି। ପ୍ରଥମେ ବ୍ୟାଟିଂ କରିଥିବା ଓଡ଼ିଶା ପ୍ରଥମ ଦିବସ ଷ୍ଟମ୍ପ ଅପସାରଣ ବେଳକୁ ୩ ଉଇକେଟ ହରାଇ ୨୧୫ରନ କରିଛି। ଶାନ୍ତନୁ ମିଶ୍ର ଓ ଅନୁରାଗ ଷଡ଼ଙ୍ଗୀ ଅର୍ଦ୍ଧଶତକୀୟ ଇନିଂସ ଖେଳି ଆଉଟ ହୋଇଥିବା ବେଳେ ଗୋବିନ୍ଦ ପୋଦ୍ଦାର ୫୪ ଓ ବିପ୍ଳବ ସାମନ୍ତରାୟ ୩୨ରନରେ ଅପରାଜିତ ଅଛନ୍ତି।
ଏହି ମ୍ୟାଚ୍ରେ ଅଭିଜ୍ଞ ଅଲରାଉଣ୍ଡର ଅଭିଷେକ ରାଉତଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା। ଉଇକେଟ କିପର ସୁଜିତ ଲେଙ୍କାଙ୍କୁ ବିଶ୍ରାମ ଦିଆଯାଇ ରାଜେଶ ଧୂପରଙ୍କୁ ନିଆ ଯାଇଥିଲା। ଗୋକୁଳ ଶର୍ମାଙ୍କ ନେତୃତ୍ୱାଧୀନ ଆସାମ ଟସ୍ ଜିତି ଓଡ଼ିଶାକୁ ବ୍ୟାଟିଂ ଆମନ୍ତ୍ରଣ କରିଥିଲା। ପ୍ରଥମ ଉଇକେଟରେ ଦୁଇ ଓପନର ଅନୁରାଗ ଓ ଶାନ୍ତନୁ ଦମ୍ଦାର ବ୍ୟାଟିଂ କରିଥିଲେ। ଓପନିଂ ଯୋଡ଼ିରେ ଓଡ଼ିଶା ୯୬ରନ ସଂଗ୍ରହ କରିଥିଲା। ୧୧୨ବଲରୁ ୧୦ଟି ଚୌକା ଓ ୧ ଛକା ବଳରେ ୫୮ରନ କରି ଅନୁରାଗ ଡାହାଣହାତୀ ପେସ୍ ବୋଲର ରଞ୍ଜିତ ମାଲିଙ୍କ ପ୍ରଥମ ଶିକାର ହୋଇଥିଲେ। ପରେ କ୍ରିଜକୁ ଆସିଥିବା ଅଧିନାୟକ ଶୁଭ୍ରାଂଶୁ ସେନାପତି ଖାତା ଖୋଲିବା ପୂର୍ବରୁ ରଞ୍ଜିତଙ୍କ ବଲ୍ରେ ଉଇକେଟ କିପର କୁନାଲ ସାଇକିଆଙ୍କ ହାତରେ ଧରାପଡ଼ି ପ୍ୟାଭିଲିୟନ ଫେରିଥିଲେ। ୯୬ରନରେ ଓଡ଼ିଶାର ୨ଟି ଉଇକେଟ ପତନ ଘଟିଥିଲା। ଶାନ୍ତନୁ ଓ ଗୋବିନ୍ଦ ପୋଦ୍ଦାର ସତର୍କତାର ସହ ବ୍ୟାଟିଂ କରି ୩ୟ ଉଇକେଟ ଭାଗିଦାରୀରେ ୫୪ରନ ସଂଗ୍ରହ କରିଥିଲେ। ଯାହା ଫଳରେ ଓଡ଼ିଶାର ସ୍ଥିତି ସୁଦୃଢ଼ ହୋଇଥିଲା। ୧୮୨ବଲରୁ ୬୬ରନ କରିଥିବା ଶାନ୍ତନୁ ପ୍ରିତମ ଦାସଙ୍କ ବଲରେ କ୍ୟାଚ୍ ଆଉଟ ହୋଇଥିଲେ। ୧୪୮ରନରେ ଓଡ଼ିଶାର ୩ୟ ଉଇକେଟ ପତନ ଘଟିଥିଲା। ପରେ ଓଡ଼ିଶାର ଦୁଇ ଭେଟେରାନ ଖେଳାଳି ବିପ୍ଳବ ସାମନ୍ତରାୟ ଓ ଗୋବିନ୍ଦ ଆସାମର ବୋଲିଂ ଆକ୍ରମଣକୁ ଧୈର୍ଯ୍ୟର ସହ ସମ୍ମୁଖୀନ କରିଥିଲେ। ଗୋବିନ୍ଦ ୧୪୩ବଲରୁ ୫୪ ଓ ବିପ୍ଳବ ୮୨ବଲରେ ୩୨ରନ କରି ଅପରାଜିତ ଅଛନ୍ତି। ଏହି ଦୁଇ ଖେଳାଳି ମଙ୍ଗଳବାର ଅଧିକ ସମୟ କ୍ରିଜରେ ରହିଲେ ଓଡ଼ିଶା ପ୍ରଥମ ଇନିଂସରେ ବିଶାଳ ସ୍କୋର କରିବ ବୋଲି ଆଶା କରାଯାଉଛି। ଆସାମ ପକ୍ଷରୁ ରଞ୍ଜିତ ମାଲି ୨ଟି ଓ ପ୍ରିତମ ଦାସଙ୍କୁ ଗୋଟିଏ ଉଇକେଟ ମିଳିଛି।
