ଯାତ୍ରାକୁ ସମସ୍ତେ ଭଲପାଆନ୍ତି। ମାତ୍ର ଏମାନଙ୍କ ପରି ଯାତ୍ରାକୁ କେହି ଭଲ ପାଇ ପାରିବେ ନାହିଁ। ଏମାନେ ବର୍ଷସାରା ଯାତ୍ରା ଦେଖନ୍ତି। ରିହର୍ସାଲ ଠାରୁ ଆରମ୍ଭ ହୁଏ ଏମାନଙ୍କ ଯାତ୍ରାର ଯାତ୍ରା। ସୋସିଆଲ ମିଡିଆ ମାଧ୍ୟମରେ ଏମାନେ ଯାତ୍ରାର ଟିକିନିଖି ବିବରଣୀ ଯୋଗେଇ ଦିଅନ୍ତି ଯାତ୍ରାପ୍ରେମୀ ଦର୍ଶକମାନଙ୍କୁ। କେହିକେହି ଏମାନଙ୍କୁ ପାଗଳ କହନ୍ତି। ତ ଆଉ କେହିକେହି କହନ୍ତି ଯାତ୍ରାପ୍ରେମୀ। ଏହି ଦୁଇ ଯାତ୍ରାପ୍ରେମୀ ହେଉଛନ୍ତି ବଳରାମ ଦାସ ଓ ମାଇକେଲ୍।
ମାଇକେଲ୍ଙ୍କ ପ୍ରକୃତ ନାମ ହେଉଛି ବିନୋଦ ବେହେରା। ତେବେ ସେ ସମଗ୍ର ଯାତ୍ରା ଇଣ୍ଡଷ୍ଟ୍ରିରେ ମାଇକେଲ୍ ନାମରେ ପ୍ରସିଦ୍ଧ। ମାଇକେଲ୍ଙ୍କ ଘର ବାଙ୍କୀ ବ୍ଲକ୍ର ବଳଭଦ୍ର ପଞ୍ଚାୟତ ମାନପୁରସାହି। ମାଟ୍ରିକ୍ ପଢ଼ିବା ପରଠୁ ତାଙ୍କର ଯାତ୍ରା ପ୍ରତି ପ୍ରେମ। ୟା ଭିତରେ ୧୦/୧୫ବର୍ଷ ବିତିଗଲାଣି। ମାଇକେଲ୍ କହନ୍ତି, ଯାତ୍ରା ହେଉଛି ଆମର ନିଜର। ତାକୁ ଘରେଘରେ ପହଞ୍ଚାଇବା ମୋର ଲକ୍ଷ୍ୟ। ମୁଁ ସେଥିଲାଗି ପ୍ରତ୍ୟେକ କଳାକାରଙ୍କୁ ନେଇ ଲାଇଭ୍ କରେ। ସିନ୍ ସବୁକୁ ଲାଇଭ୍ କରେ। ଫଳରେ ଲୋକମାନେ ଘରେ ବସି ମଧ୍ୟ ମାଇକେଲ୍ ଲାଇଭ୍ରୁ ଯାତ୍ରାକୁ ଦେଖିପାରନ୍ତି। ଆଉ ଯାତ୍ରା ମଞ୍ଚ ଆଡ଼କୁ ଆକର୍ଷିତ ହୁଅନ୍ତି। ମୁଁ ଯେ କେବଳ ଯାତ୍ରା ଆର୍ଟିଷ୍ଟଙ୍କୁ ଭଲପାଏ ତାହା ନୁହେଁ; ସେମାନଙ୍କର ପରିବାର ସହିତ ମଧ୍ୟ ମିଳାମିଶା କରେ। କାରଣ ସେମାନେ ବହୁ କଷ୍ଟ ସହି ଗୋଟିଏ ଗୋଟିଏ କଳାକାର ଉପହାର ଦେଇଛନ୍ତି ଯାତ୍ରାଜଗତକୁ।
ବଳରାମ ଦାସଙ୍କୁ ଯାତ୍ରାପ୍ରେମୀଙ୍କ ନିକଟରେ ଆଉ ପରିଚିତ କରେଇବାର ଆବଶ୍ୟକତା ନାହିଁ। ପ୍ରତ୍ୟେକ ଯାତ୍ରା କଳାକାର, ଯାତ୍ରା ଦର୍ଶକ, ଯାତ୍ରା ମାଲିକ, ଯାତ୍ରା ପରିଚାଳକ ସମସ୍ତଙ୍କ ପାଖରେ ଏକ ଅତି ପରିଚିତ ନଁା ବଳରାମ ଦାସ। ବୃତ୍ତିରେ ଇଞ୍ଜିନିୟର। ତଥାପି ସିଫ୍ଟ ବଦଳେଇ ରାତିରେ ସେ ଧାଇଁ ଆସନ୍ତି ଯାତ୍ରାକୁ। ନିଜ ଖର୍ଚ୍ଚରେ ଘରଭଡ଼ା ନେଇ ରହନ୍ତି। ଖୁସିରେ ହୁଏତ କେବେ କେହି ତାଙ୍କୁ କିଛି ଦେଇ ପାରିଥାଏ, ହେଲେ ଯାତ୍ରାକୁ ନେଇ, ଯାତ୍ରାର କଳାକାରଙ୍କୁ ଘରେ ଘରେ ପରିଚିତ କରିବା ନେଇ ବଳରାମ ଯାହା କରିଛନ୍ତି ତାହାର ମୂଲ୍ୟ କେବେ କେହି ଦେଇପାରିବ ନାହିଁ। ଆଜି ଯଦି ଯାତ୍ରା କଳାକାରଙ୍କ ଠୁ ଆରମ୍ଭ କରି ମଞ୍ଚ ପଛରେ ଥିବା ମଣିଷଙ୍କୁ ପ୍ରତ୍ୟେକ ଲୋକ ଜାଣିଛନ୍ତି ତାହା ପଛରେ ରହିଛି ବଳରାମ ଦାସଙ୍କର ହାତ।
ଯାତ୍ରାର ପ୍ରଚାର ପ୍ରସାର ପାଇଁ ବଳରାମ କିମ୍ବା ମାଇକେଲ୍ଙ୍କୁ କେହି ଦାୟିତ୍ୱ ଦେଇନି। ମାତ୍ର ଏହାକୁ ସେମାନେ ନିଜର ଦାୟିତ୍ୱ ବୋଲି ମାନି ନେଇଛନ୍ତି। ସେମାନେ ଜାଣିଛନ୍ତି – ଯାତ୍ରାର ପ୍ରଚାର ପ୍ରସାର କଲେ ପ୍ରଶଂସା ହୁଏ ତ ମିଳି ନ ପାରେ। ଲୋକେ ନାକଟେକି ପାରନ୍ତି। ସେମାନଙ୍କୁ ପାଗଳ କହି ଘୃଣା ବି କରିପାରିନ୍ତି। ତଥାପି ସେମାନେ ତାହା କରୁଛନ୍ତି। କାରଣ ଯାତ୍ରା ହେଉଛି ଏ ଦୁଇ ଜଣଙ୍କର ପ୍ରଥମ ପ୍ରେମ। ସେମାନଙ୍କ ପାଇଁ କଳା ହେଉଛି ପୂଜା। ଆଉ କଳାକାର ହେଉଛନ୍ତି ଜଣେଜଣେ ଭଗବାନ। ସେହି କଳା ଆଉ କଳାକାରଙ୍କ ପୂଜା କରିବା ଉଭୟ ମାଇକେଲ ଓ ବଳରାମଙ୍କ ପାଇଁ ପାଲଟିଛି ପ୍ରାଥମିକ କାର୍ଯ୍ୟ।
