ଯାଜପୁର ଅଫିସ,୫ା୨: ସମ୍ପ୍ରତି ପାର୍ଲାମେଣ୍ଟରେ ୨୦୨୦-୨୧ ପାଇଁ ଆଗତ ବଜେଟରେ ଯାଜପୁରରୋଡ-ଧାମରା(ଭାୟା ଯାଜପୁର ଟାଉନ ଓ ଆରଡି) ରେଳପଥ ନିର୍ମାଣ ପାଇଁ ଘୋଷଣା କରାଯାଇ ନ ଥିବାରୁ ଉଦ୍ବେଗ ପ୍ରକାଶ ପାଇଛି। ବଜେଟରେ ସଂଶୋଧନ ଆଣି ଏହି ରେଳପଥ ନିର୍ମାଣକୁ ସେଥିରେ ଅନ୍ତର୍ଭୁକ୍ତ କରିବା ପାଇଁ ଯାଜପୁରରୋଡ-ଧାମରା ରେଳପଥ ସଂଗ୍ରାମ ସମିତି ପକ୍ଷରୁ ରେଳମନ୍ତ୍ରୀଙ୍କ ଉଦ୍ଦେଶ୍ୟରେ ମଙ୍ଗଳବାର ପୂର୍ବତଟ ରେଳପଥର ଜେନେରାଲ ମ୍ୟାନେଜରଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଏଥିରେ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଘଡ଼େଇ, ସମିତିର ଆବାହକ ସନ୍ତୋଷ ଦାସ, ବ୍ୟାସନଗର ପୌର ପରିଷଦର ପୂର୍ବତନ କାଉନସିଲର ପ୍ରଫୁଲ୍ଲ ନାୟକ, ଆଡ୍ଭୋକେଟ ସତ୍ୟପ୍ରକାଶ ବେଉରିଆ, ଦିଗାମ୍ବର ସାହୁ, ରଜତ ପତି, କାମାକ୍ଷା ପ୍ରସାଦ ନାୟକ, ଅରମାନ କୁମାର ଜେନା, କ୍ଷୀରସିନ୍ଧୁ ମେହେର, ଅଭିମନ୍ୟୁ ବେହେରା, ଅବିନାଶ ଆଚାର୍ଯ୍ୟ ପ୍ରମୁଖ ସାମିଲ ହୋଇଥିଲେ। ୨୦୧୨-୧୩ ରେଳବଜେଟରେ ନିଷ୍ପତ୍ତିକ୍ରମେ ଯାଜପୁରରୋଡ-ଧାମରା ରେଳପଥର ନିର୍ମାଣ ପାଇଁ ପୂର୍ବତନ ରେଳପଥ ପକ୍ଷରୁ ଏହାର ସର୍ଭେ କରାଯାଇଥିଲା। ୨୦୧୫ ଏପ୍ରିଲରୁ ଏହା ରେଳବାଇ ବୋର୍ଡ ପାଖକୁ ପ୍ରେରଣ କରାଯାଇଥିଲେ ମଧ୍ୟ ଦୁର୍ଭାଗ୍ୟଜନକ ଭାବେ ଏହି ପ୍ରକଳ୍ପକୁ ମଞ୍ଜୁରୀ ପ୍ରଦାନ କରାଯାଇନାହିଁ। କେନ୍ଦ୍ର ବଜେଟରେ ମଧ୍ୟ ଏହାକୁ ଅନ୍ତର୍ଭୁକ୍ତ କରାଯାଇନାହିଁ। ତେଣୁ ବଜେଟରେ ବ୍ୟୟବରାଦ ସମେତ ନିତି ଆୟୋଗ ଓ ଅର୍ଥନୈତିକ ବ୍ୟାପାର ସଂକ୍ରାନ୍ତୀୟ ମନ୍ତ୍ରୀମଣ୍ଡଳ କମିଟୀ(ସିସିଇଏ)ର ଅନୁମୋଦନ ପାଇଁ ସଂଗ୍ରାମ ସମିତି ପକ୍ଷରୁ ଦାବି କରାଯାଇଛି। ଏହି ୯୨ କିମି ଦୀର୍ଘ ରେଳପଥ ନିର୍ମାଣ ହେଲେ କଳିଙ୍ଗନଗର ଶିଳ୍ପନଗରୀ ସହ ଅତ୍ୟାଧୁନିକ ଧାମରା ବନ୍ଦର ସଂଯୁକ୍ତ ହୋଇ ପାରିବ। ଏହାବାଦ ସ୍ମାରକପତ୍ରରେ ଯାଜପୁରରୋଡରେ ଏକ ରେଳଡିଭିଜନ ପ୍ରତିଷ୍ଠା ଓ ଫ୍ଲାଏଓଭର ନିର୍ମାଣ ପାଇଁ ଦାବି ହୋଇଛି।
