ଯାଜପୁର ଟାଉନ,୨।୨(ଡିଏନଏ): ଯାଜପୁର ପୌରାଞ୍ଚଳ ରାଜ୍ୟର ଏକ ଆଦର୍ଶ ଓ ଅତ୍ୟାଧୁନିକ ପୌରାଞ୍ଚଳରେ ପରିଣତ କରାଯିବ ବୋଲି ଜିଲାପାଳ ରଞ୍ଜନ କୁମାର ଦାସ ମତବ୍ୟକ୍ତ କରିଛନ୍ତି। ଯାଜପୁର ପୌରାଞ୍ଚଳକୁ ରାଜ୍ୟର ସର୍ବଶ୍ରେଷ୍ଠ ପୌରାଞ୍ଚଳ କରିବା ପାଇଁ ସମସ୍ତଙ୍କ ସହଯୋଗ ଆବଶ୍ୟକ ବୋଲି ଦାସ ମତବ୍ୟକ୍ତି କରିଛନ୍ତି। ଯାଜପୁର ରାଜ୍ୟର ପୁରାତନ ରାଜଧାନୀ ଥିବାବେଳେ ଏହାର ଐତିହ୍ୟ, ସଂସ୍କୃତି ଓ ଭାଇଚାରା ସାରା ରାଜ୍ୟରେ ସମ୍ପୂର୍ଣ୍ଣ ଭିନ୍ନ। ଶନିବାର ପୌରପରିଷଦ କାର୍ଯ୍ୟାଳୟରେ ବିବିଧ ଉନ୍ନୟନ କାର୍ଯ୍ୟ, ବିଭିନ୍ନ ଟ୍ୟାକ୍ସ ସଂଗ୍ରହ, ସାଧାରଣ ଲୋକଙ୍କୁ ପ୍ରଦାନ କରାଯାଉଥିବା ମୌଳିକ ସେବା ସମ୍ପର୍କରେ ଜିଲାପାଳ ସମୀକ୍ଷା କରିଥିଲେ। ସହରବାସୀଙ୍କୁ ସୁସ୍ଥ ପରିବେଶରେ ରଖିବା ସହ ବିଦ୍ୟୁତ, ପାନୀୟ ଜଳ, ସ୍ବଚ୍ଛ ପରିବେଶ ଯୋଗାଇବା ଉପରେ ସେ ଗୁରୁତ୍ୱ ଦେଇଥିଲେ। ମେଡିକାଲ ଛକ ଓ ଅନ୍ୟାନ୍ୟ ସ୍ଥାନରେ ପ୍ରାୟ ୩୦ଟି ଭେଣ୍ଡିଂ ଜୋନର ବ୍ୟବସ୍ଥା କରି ଛୋଟ ବ୍ୟବସାୟୀଙ୍କୁ ଥଇଥାନ କରିବାକୁ ସେ ପରାମର୍ଶ ଦେଇଥିଲେ। ସମସ୍ତ ୱାର୍ଡରେ ୱାର୍ଡ ଅଫିସ କାର୍ଯ୍ୟ କରିବା ସହ ଲୋକମାନେ ସେହି ଅଫିସ ମାଧ୍ୟମରେ ସେମାନଙ୍କର ସମସ୍ତ ସୁବିଧା ଅସୁବିଧାକୁ ଅବଗତ କରାଇବାକୁ ନିର୍ଦ୍ଦେଶ େଇଥିଲେ। ୱାର୍ଡ ଅଫିସ ମାଧ୍ୟମରେ ମଧ୍ୟ ଟ୍ୟାକ୍ସ ସଂଗ୍ରହ କରାଯାଇ ପାରିବ ଓ ସବିଶେଷ ବିବିଧ ସୂଚନାକୁ ପ୍ରଦାନ କରାଯିବ। ସମ୍ପୃକ୍ତ ୱାର୍ଡର ବାସିନ୍ଦା ଅଯଥା ଖର୍ଚ୍ଚାନ୍ତ ହୋଇ ପୌର କାର୍ଯ୍ୟାଳୟକୁ ଆଉ ଆସିବାକୁ ପଡିବ ନାହିଁ। ସମସ୍ତ ୱାର୍ଡର ଆଲୋକୀକରଣ ହୋଇଥିବାବେଳେ ବକେୟା ୪ଟି ଲେନର ଆଲୋକ ବ୍ୟବସ୍ଥାକୁ ତ୍ୱରାନ୍ବିତ ଭାବେ ଲଗାଯିବ। ସେହିପରି ଆବର୍ଜନାର ଠିକ ପରିଚାଳନା ପାଇଁ ନିଆଯାଇଥିବା ପଦକ୍ଷେପ ଆଧାରରେ ଏହାକୁ ଅଧିକ କ୍ରିୟାଶୀଳ କରାଯିବ। ବିଶେଷଭାବେ ସହରବାସୀଙ୍କୁ ସେମାନଙ୍କ ସାମାଜିକ ଦାୟିତ୍ୱ ଓ କର୍ତ୍ତବ୍ୟ ସମ୍ପର୍କରେ ସଚେତନ କରାଯିବ। ଫଳରେ ସହରକୁ ସ୍ବଚ୍ଛ ଓ ସୁନ୍ଦର ରଖିବାରେ ସେମାନଙ୍କ ଅବଦାନ ଗୁରୁତ୍ୱପୂର୍ଣ୍ଣ ହୋଇପାରିବ ବୋଲି ଜିଲାପାଳ କହିଥିଲେ। ଏହି ସମୀକ୍ଷାରେ ପ୍ରକଳ୍ପ ନିର୍ଦ୍ଦେଶକ ଇନ୍ଦ୍ରମଣି ନାୟକ, ପୌର ନିର୍ବାହୀ ଅଧିକାରୀ ଅଜୟ କୁମାର ମହାନ୍ତି, ପୌର ପରିଷଦର ସ୍ବତନ୍ତ୍ର ଅଧିକାରୀ ସୁଦର୍ଶନ ମିଶ୍ର ଓ ସମସ୍ତ କର୍ମଚାରୀ ଉପସ୍ଥିତ ଥିଲେ।
