ବ୍ରହ୍ମପୁର ଅଫିସ୍,୨୩ା୭-ବ୍ରହ୍ମପୁର, କୁକୁଡ଼ାଖଣ୍ଡି ଏବଂ କନିଷି ତହସିଲ୍ କାର୍ଯ୍ୟାଳୟରେ ମ୍ୟୁଟେଶନ୍ (ଜମି ଦାଖଲ ଖାରଜ)ମାମଲାଗୁଡ଼ିକର ଶୁଣାଣି ହେଉନି ବୋଲି ଅଭିଯୋଗ କରିଛି ଗଞ୍ଜାମ ଓକିଲ ସଂଘ। ସୋମବାର ଏ ନେଇ ସଂଘ ପକ୍ଷରୁ ଏକ ସ୍ମାରକପତ୍ର ଜିଲାପାଳ ବିଜୟ ଅମୃତା କୁଲାଙ୍ଗେଙ୍କୁ ଅଭିଯୋଗ ଶୁଣାଣି ଶିବିରରେ ପ୍ରଦାନ କରାଯାଇଛି। ସଂଘ ଅଭିଯୋଗ ପ୍ରକାରେ, ଅନେକ ମାସ ହେଲା ମ୍ୟୁଟେଶନ୍ ମାମଲାଗୁଡ଼ିକ ଦାଖଲ ହୋଇଥିଲେ ମଧ୍ୟ ସମ୍ପୃୃକ୍ତ ତହସିଲଦାର୍ମାନେ ତା’ର ଶୁଣାଣି କରୁନାହାନ୍ତି। ଫଳରେ ଲୋକମାନେ ହଇରାଣ ହେଉଛନ୍ତି। ଆଇନ୍ଜୀବୀମାନେ ଦାଖଲ କରିଥିବା ମାମଲାଗୁଡ଼ିକ ସେମାନଙ୍କର ଅଜାଣତରେ ଖାରଜ୍ କରି ଦିଆଯାଉଛି। କୌଣସି ପୂର୍ବ ସୂଚନା ପ୍ରଦାନ କରାଯାଉନାହିଁ। ଅନେକ ମ୍ୟୁଟେଶନ୍ ମାମଲାଗୁଡ଼ିକର ଦସ୍ତାବିଜ ଏବଂ ଆବଶ୍ୟକ ତଥ୍ୟ ନ ଥିବା ଦର୍ଶାଇ ଖାରଜ କରି ଦେଉଛନ୍ତି। ହେଲେ ଆବେଦନକାରୀଙ୍କୁ ପକ୍ଷ ରଖିବାର ସୁଯୋଗ ଦିଆଯାଉନାହିଁ। ସେଟେଲ୍ମେଣ୍ଟ ଆଣ୍ଡ କନ୍ସୋଲିଡେଶନ୍ର ଅତିରିକ୍ତ କମିଶନର୍ଙ୍କ କୋର୍ଟରେ ରୁଜୁ ହେଉଥିବା ମାମଲାଗୁଡ଼ିକରେ ତହସିଲଦାର ପକ୍ଷଭୁକ୍ତ। କିନ୍ତୁ ତହସିଲଦାରମାନେ କୋର୍ଟକୁ ଆସୁନାହାନ୍ତି କିମ୍ବା ସମ୍ପୃକ୍ତ ମାମଲାର କୌଣସି ରିପୋର୍ଟ ଦାଖଲ କରୁନାହାନ୍ତି। ଏପରିକି ଆଡିଶିନାଲ୍ କମିଶନର ଯେଉଁ ରାୟ ଶୁଣାଉଛନ୍ତି, ସେଗୁଡ଼ିକୁ ପାଳନ କରିବାରେ ତହସିଲଦାର୍ମାନେ ବହୁ ବିଳମ୍ବ କରୁଛନ୍ତି। ଏଣୁ ମ୍ୟୁଟେଶନ୍ ମାମଲାଗୁଡ଼ିକର ତ୍ୱରିତ ଶୁଣାଣି ପାଇଁ ତହସିଲଦାର୍ଙ୍କୁ ନିର୍ଦ୍ଦେଶ ଦେବାକୁ ଓକିଲ ସଂଘ ପକ୍ଷରୁ ଦାବି କରାଯାଇଛି। ତେବେ ଗତ ଫେବୃୟାରୀରୁ ସେଟେଲ୍ମେଣ୍ଟ ଆଣ୍ଡ କନ୍ସୋଲିଡେଶନ୍ର ଅତିରିକ୍ତ କମିଶନର୍ଙ୍କ କୋର୍ଟ ଠିକ୍ ଭାବେ କାର୍ଯ୍ୟ କରୁନାହିଁ। କାରଣ କେହି କମିଶନର୍ ନାହାନ୍ତି । ପୂର୍ବ କମିଶନର୍ ଅବସର ନେବା ପରେ କାହାକୁ ନିଯୁକ୍ତି ଦିଆଯାଇନାହିଁ। ଫଳରେ ଆବେଦନକାରୀମାନେ ହଇରାଣ ହେଉଛନ୍ତି। ଥରେ ଛତ୍ରପୁର ଅତିରିକ୍ତ ଜିଲାପାଳଙ୍କ ଦ୍ୱାରସ୍ଥ ହେବାକୁ କୁହାଯାଉଛି ତାପରେ ପୁଣି ବ୍ରହ୍ମପୁରରେ ଶୁଣାଣି ହେବ ବୋଲି କୁାହାଯାଉଛି । ଆଡିଶିନାଲ୍ କମିଶନର୍ଙ୍କ କୋର୍ଟରେ ମାମଲା ଦାଖଲ କଲେ, କେହି ଗ୍ରହଣ କରୁନାହାନ୍ତି। କୌଣସି ପ୍ରକାର ସୂଚନା ମଧ୍ୟ ଦିଆଯାଉନାହିଁ । ପ୍ରାୟ ୭ହଜାର ମାମଲା ଶୁଣାଣି ନ ହୋଇ ପଡ଼ିରହିଛି । ତୁରନ୍ତ ଏଦିଗରେ ପଦକ୍ଷେପ ନେବାକୁ ସଂଘ ପକ୍ଷରୁ ଦାବି କରାଯାଇଥିଲା। ତେବେ ଯେଉଁ ସବୁ ମାମଲା ଶୁଣାଣି ନ ହୋଇ ପଡ଼ିରହିଛି, ସେଗୁଡ଼ିକ ସମ୍ପର୍କରେ ଅବଗତ କରାଗଲେ ପଦକ୍ଷେପ ନିଆଯିବ ବୋଲି ଜିଲାପାଳ କୁଲାଙ୍ଗେ ପ୍ରତିଶ୍ରୁତି ଦେଇଥିଲେ। ଜିଲାପାଳଙ୍କ ସହ ଆଲୋଚନା ବେଳେ ସଂଘ ସମ୍ପାଦକ କୈଳାସ ଚନ୍ଦ୍ର ପାଣିଗ୍ରାହୀ, ଯୁଗ୍ମ ସମ୍ପାଦକ କିରଣ କୁମାର ମଣ୍ଡଳ, ଉପସଭାପତି ଚିତ୍ତରଞ୍ଜନ ଶତପଥୀଙ୍କ ସମେତ ବହୁ ସଦସ୍ୟ ଉପସ୍ଥିତ ଥିଲେ ।