ଭୁବନେଶ୍ୱର, ୨୭ା୬(ବ୍ୟୁରୋ)- ରାଜଧାନୀ ରାସ୍ତାରେ ଟଙ୍କା ଲୁଟିବାକୁ ଲୁଟେରା ଚାହିଁ ରହିଛନ୍ତି। କିଛି ଲୋଭି ମଣିଷ ଅଛନ୍ତି ରାତାରାତି ଧନୀ ହେବାକୁ ଭଗବାନଙ୍କୁ ଡାକିଥାନ୍ତି। ରାସ୍ତାରେ ଟଙ୍କା ଥଳି ମିଳିଯାଆନ୍ତା କି, କାହା ପକେଟରୁ ପର୍ସ ଗଳିପଡ଼ନ୍ତା କି, ଏମିତି ଅନେକ ସୁଯୋଗ ଖୋଜିଥାନ୍ତି। ହେଲେ ସମାଜରେ ଅନେକ ନିଆରା ମଣିଷ ଅଛନ୍ତି, ଯେଉଁମାନେ ଟଙ୍କା ପାଇଲେବି ତାହାକୁ ଫେରାଇବାକୁ ବହୁ ପରିଶ୍ରମ କରନ୍ତି। ଏମିତି ଜଣେ ସଚ୍ଚୋଟ ଭଲ ମଣିଷଟିଏ ହେଉଛନ୍ତି ବିଶ୍ୱନାଥ ଖୁଣ୍ଟିଆ। ବିଶ୍ୱନାଥ ହେଉଛନ୍ତି ‘ମୋ ବସ୍’ ଡ୍ରାଇଭର। ସେ ବସ୍ରୁ ପାଇଥିବା ଜଣେ ଯାତ୍ରୀଙ୍କ ଟଙ୍କା ବ୍ୟାଗ୍ ଫେରାଇ ଆଜି ଉଦାହରଣ ପାଲଟିଛନ୍ତି।
ମିଳିଥିବା ସୂଚନାନୁସାରେ, ରାଜ୍ୟ ସରକାରଙ୍କ ପକ୍ଷରୁ ‘ମୋ ବସ୍’ ଚାଲୁଛି। କ୍ୟାପିଟାଲ ରିଜିଅନ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ଏହାର ପରିଚାଳନା କରୁଛି। ଟ୍ରାଭେଲ ଟାଇମ୍ ସଂସ୍ଥା ଅଧୀନରେ ବିଶ୍ୱନାଥ ରୁଟ୍ ନଂ.୨୫ରେ ଚାଲୁଥିବା ମୋ ବସ୍ର ଡ୍ରାଇଭର ଭାବେ କାର୍ଯ୍ୟ କରୁଛନ୍ତି। ଗତ ବୁଧବାର ସକାଳେ ବସ୍ଟି ମଞ୍ଚେଶ୍ୱରରୁ ଡୁମୁଡୁମା ଯାଇ ଫେରିଥିଲା। ଯାତ୍ରୀମାନେ ଓହ୍ଲାଇଯିବା ପରେ ବିଶ୍ୱନାଥ ବସ୍ଟିକୁ ମଞ୍ଚେଶ୍ୱର ଡିପୋକୁ ନେଉଥିଲେ। ତେବେ ବସ୍ର ସିଟ୍ ଉପରେ ଏକ ବ୍ୟାଗ୍ ଦେଖିଥିଲେ। ସେଥିରେ ନଗଦ ୪୯ହଜାର ୫ଶହ ଟଙ୍କା ଥିଲା। ହେଲେ ଟଙ୍କା ଦେଖି ତାଙ୍କର ଲୋଭ ହୋଇ ନ ଥିଲା। ବରଂ କିଏ କେଉଁ ଜରୁରୀ କାର୍ଯ୍ୟରେ ଟଙ୍କା ନେଉଥିବ ଭାବି ଫେରାଇବାକୁ ତାଙ୍କ ମନ ବ୍ୟାକୁଳ ହୋଇଥିଲା। ଯାଉଥିବା ରୁଟ୍ରେ ବସ୍ ଅଟକୁଥିବା ସ୍ଥାନରେ ଜଣଜଣ କରି ଲୋକଙ୍କୁ ପଚାରୁଥିଲେ। ହେଲେ କେହି କିଛି ବ୍ୟାଗ୍ ଛାଡ଼ିଥିବା କହି ନ ଥିଲେ। ଅଢ଼େଇ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଖୋଜାଖୋଜି ପରେ ବିଶ୍ୱନାଥ ଉକ୍ତ ଟଙ୍କା ବ୍ୟାଗକୁ ନିଜ ଅଫିସ୍ରେ ଫେରାଇଥିଲେ। ଗୁରୁବାର ସକାଳେ ପହଞ୍ଚତ୍ବା ପରେ ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ଟଙ୍କା ବ୍ୟାଗ୍ ଛାଡିଥିବା ଲୋକଙ୍କ ସନ୍ଧାନ ପାଇବାରେ ଲାଗିପଡିଲେ। ଶେଷରେ ପ୍ରକୃତ ବ୍ୟକ୍ତିଙ୍କୁ ଟଙ୍କା ବ୍ୟାଗ୍ ଫେରାଇ ମହାନତାର ପରିଚୟ ଦେଇଥିଲେ। ବିଶ୍ୱନାଥଙ୍କର ଏପରି ମାନବିକତା ଓ ସଚ୍ଚୋଟତା ପାଇଁ କ୍ରୁଟ ତରଫରୁ ତାଙ୍କୁ ସମ୍ବର୍ଦ୍ଧିତ କରାଯାଇଥିଲା।
