ମନାମା,୨୫।୮: ଗୋଟିଏ ପଟେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶନିବାର କ୍ରାଉନ୍ ପ୍ରିନ୍ସ ଶେଖ୍ ମହମ୍ମଦ ବିନ ଜାୟଦ ଅଲ ନାହୟନ ୟୁଏଇର ସର୍ବୋଚ୍ଚ ନାଗରିକ ସମ୍ମାନ ‘ଅର୍ଡର ଅଫ୍ ଜାୟଦ’ରେ ସମ୍ମାନୀତ କରିଥିବା ବେଳେ, ଅନ୍ୟ ପଟେ ବାହାରିନରେ ଥିବା ପ୍ରାୟ ୨୫୦ ଭାରତୀୟ କଏଦୀଙ୍କୁ ବାହାରିନ ସରକାର ସଜା ମୁକ୍ତ କରିବାକୁ ଘୋଷଣା କରିଛନ୍ତି। ଏହା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ଟୁଇଟ୍ କରି କୁହାଯାଇଛି। ବାହାରିନ ସରକାରଙ୍କ ଏଭଳି ନିଷ୍ପତ୍ତି ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ ଧନ୍ୟବାଦ ଜଣାଇଛନ୍ତି। ସୂଚନାଯୋଗ୍ୟ, ବିଭିନ୍ନ ମାମଲାରେ ବିଦେଶରେ ପାଖାପାଖି ୮ହଜାର ୧୮୯ ଭାରତୀୟ କଏଦୀ ସଜା କାଟୁଛନ୍ତି। ତେବେ ସେଥିମଧ୍ୟରୁ ପ୍ରାୟ ୧ହଜାର ୮୧୧ ଜଣ ୟୁଏଇରେ ରହିଛନ୍ତି। ତେବେ ବାହାରିନରେ କେତେଜଣ ଭାରତୀୟ କଏଦୀ ରହିଛନ୍ତି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
