ଭୁବନେଶ୍ୱର,୫ା୩(ବ୍ୟୁରୋ): ଆସନ୍ତା ମେ ପହିଲାରୁ ରାଜ୍ୟର ୧୦୬ ସହରାଞ୍ଚଳରେ ଓ୍ବାନ୍ ନେଶନ, ଓ୍ବାନ୍ ରାଶନ ବ୍ୟବସ୍ଥା ଲାଗୁ ହେବ। ଜାତୀୟ ଖାଦ୍ୟ ସୁରକ୍ଷା ଆଇନ(ଏନ୍ଏଫଏସ୍ଏ) ଅଧୀନରେ ରାଶନ ପାଉଥିବା ସହରାଞ୍ଚଳ ହିତାଧିକାରୀ ଯେକୌଣସି ସହରରୁ ରାଶନ କାର୍ଡ ଦେଖାଇ ଚାଉଳ ଓ ଗହମ ନେଇପାରିବ। ଯେଉଁ ସହରରେ ହିତାଧିକାରୀମାନେ କାମ କରୁଥିବେ କିମ୍ବା ସ୍ଥାନାନ୍ତର ହୋଇଥିବେ ସେମାନେ ସେଠାରେ ଥିବା ଯେକୌଣସି ରାଶନ ଦୋକାନରୁ ଖାଦ୍ୟ ସାମଗ୍ରୀ ନେଇପାରିବେ। ସହରାଞ୍ଚଳଗୁଡିକରେ ୧୦୦ ପ୍ରତିଶତ ଆଧାର ଲିଙ୍କ୍ କାର୍ଯ୍ୟ ଶେଷ ହୋଇଛି। ଆସନ୍ତା ମେ ପହିଲାରୁ ହିତାଧିକାରୀଙ୍କୁ ୨ ମାସର (ମାର୍ଚ୍ଚ ଓ ଏପ୍ରିଲ) ଖାଦ୍ୟ ସାମଗ୍ରୀ ପ୍ରଦାନ କରାଯିବ। ମାର୍ଚ୍ଚରୁ ଡିଲରମାନଙ୍କର ଲାଇସେନ୍ସ ନବୀକରଣ କରାଯାଉଥିବାରୁ ଏପ୍ରିଲରେ ରାଶନ ନ ଦେଇ ମେ ମାସରେ ଦିଆଯିବ ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
ସମସ୍ତ ଯୋଗ୍ୟ ହିତାଧିକାରୀଙ୍କ ଆଧାରକାର୍ଡ ସଂଯୋଗକୁ ବାଧ୍ୟତାମୂଳକ କରିବାକୁ ଯୋଗାଣ ବିଭାଗ ପକ୍ଷରୁ ସହରାଞ୍ଚଳର ଡିଲରମାନଙ୍କୁ ନିର୍ଦ୍ଦେଶ ଦିଆଯାଇଛି। ଆଧାର ପଞ୍ଜୀକୃତ ହୋଇଥିବା ସମସ୍ତ ହିତାଧିକାରୀ କାର୍ଡ ଦେଖାଇ ନିକଟସ୍ଥ ଡିଲରଙ୍କ ନିକଟରୁ ରାଶନ ନେଇପାରିବେ। ସହରାଞ୍ଚଳଗୁଡିକରେ ମୋଟ ୧୯୪୬ ଡିଲର ରହିଛନ୍ତି। ସେମାନଙ୍କୁ ଆଇଆରଆଇଏସ୍ ସ୍କାନର ମେଶିନ ଯୋଗାଇ ଦିଆଯାଇଛି। ଆଙ୍ଗୁଠି ଛାପ ସମସ୍ୟା ହେଲେ ଆଇଆରଆଇଏସ ମେଶିନ ଜରିଆରେ ହିତାଧିକାରୀଙ୍କ ଆଖିକୁ ଯାଞ୍ଚ କରି ରାଶନ ଦେବାକୁ ବ୍ୟବସ୍ଥା କରାଯାଇଥିବା ଯୋଗାଣ ବିଭାଗ ପକ୍ଷରୁ କୁହାଯାଇଛି।
କନ୍ଧମାଳ, କୋରାପୁଟ, ରାୟଗଡ଼ା, ମାଲକାନଗିରି ଜିଲାର କେତେକ ଦୁର୍ଗମ ଅଞ୍ଚଳ ଏବଂ ମାଓବାଦୀ ପ୍ରବଣ ଅଞ୍ଚଳରେ ଇଣ୍ଟରନେଟ ସୁବିଧା ନାହିଁ। ସେମାନେ ଓ୍ବାନ୍ ନେଶନ, ଓ୍ବାନ୍ ରାଶନ ବ୍ୟବସ୍ଥାରୁ ବାଦ୍ ପଡିବେ। ସେଠାରେ ହିତାଧିକାରୀଙ୍କୁ କେବଳ ନିଜ ଅଞ୍ଚଳର ସରକାରୀ ପାଇକାରୀ ଦୋକାନରୁ ରାଶନ ନେବାକୁ ଅନୁମତି ଦିଆଯିବ। ଇଣ୍ଟରନେଟ ସୁବିଧା ନ ହେବା ଯାଏ ସେହି ହିତାଧିକାରୀ କେବଳ ଗୋଟିଏ ସ୍ଥାନରୁ ରାଶନ ନେବେ। ରାଜ୍ୟର ସମସ୍ତ ଅଞ୍ଚଳରେ ଓ୍ବାନ୍ ନେଶନ, ଓ୍ବାନ୍ ରାଶନ ବ୍ୟବସ୍ଥା ହୋଇଗଲେ ଓଡିଶାକୁ ଅନ୍ୟ ରାଜ୍ୟ ସହ ସଂଯୋଗ କରାଯିବ। ଫଳରେ ରାଜ୍ୟ ବାହାରେ ରହୁଥିବା ହିତାଧିକାରୀମାନେ ଦେଶର ଯେ କୌଣସି ସ୍ଥାନରୁ ଖାଦ୍ୟ ସାମଗ୍ରୀ ନେଇ ପାରିବେ। କେନ୍ଦ୍ର ସରକାର ମଧ୍ୟ ତୁରନ୍ତ ଆଧାର ଲିଙ୍କ କରିବାକୁ ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି। ରାଜ୍ୟରେ ମୋଟ ୩ କୋଟି ୨୬ ଲକ୍ଷ ଏନଏଫ୍ଏସଏ ହିତାଧିକାରୀ ରହିଛନ୍ତି।
ସୂଚନାଯୋଗ୍ୟ ଯେ, ୨୦୧୯ ସେପ୍ଟେମ୍ବର ପହିଲାରୁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଅଞ୍ଚଳରେ ପାଇଲଟ ପ୍ରକଳ୍ପ ଭାବେ ଓ୍ବାନ୍ ନେଶନ, ଓ୍ବାନ୍ ରାଶନ ବ୍ୟବସ୍ଥା ଲାଗୁ କରାଯାଇଛି। ବିଏମ୍ସି ଅଞ୍ଚଳର ୧୨୭ ସରକାରୀ ପାଇକାରୀ ଦୋକାନରେ ଏହି ବ୍ୟବସ୍ଥା କାର୍ଯ୍ୟକାରୀ କରାଯାଇଛି। ଅନ୍ଲାଇନ ଜରିଆରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଏହାକୁ ନିୟମିତ ତଦାରଖ କରାଯାଉଛି। ବିଏମ୍ସି ଅଞ୍ଚଳରେ ଇଣ୍ଟରନେଟ ସୁବିଧା ଥିବାରୁ ଏଠାରୁ ପାଇଲଟ୍ ପ୍ରକଳ୍ପ ଆରମ୍ଭ କରାଯାଇଛି। ଅଙ୍ଗୁଳି ଛାପ କିମ୍ବା ଆଖି ସଙ୍କେତ ମାଧ୍ୟମରେ ହିତାଧିକାରୀଙ୍କୁ ରାଶନ ଯୋଗାଇ ଦିଆଯାଉଛି। ତେବେ ଯେଉଁମାନଙ୍କର ଆଙ୍ଗୁଠି ଚିହ୍ନ ନେଉ ନ ଥିବ କିମ୍ବା ହିତାଧିକାରୀ ବୟସ୍କ, ଦୁରାରୋଗ୍ୟରେ ପୀଡ଼ିତ, କୁଷ୍ଠରୋଗୀମାନଙ୍କୁ ବିନା ଆଧାରକାର୍ଡରେ ରାଶନ ଯୋଗାଇ ଦିଆଯାଉଛି।
