ନୟାଗଡ଼ ଅଫିସ,୧୮ା୧୦: ରାଜ୍ୟ ସରକାରଙ୍କ କୃଷିନୀତି ୨୦୧୩ ଅନୁଯାୟୀ ଚାଷୀଙ୍କ ଜମିର ମାଟି ପରୀକ୍ଷା ପାଇଁ ପ୍ରତି ଜିଲାରେ ମୃତ୍ତିକା ପରୀକ୍ଷା କେନ୍ଦ୍ର ରହିଛି। ଚାଷୀମାନେ ସେମାନଙ୍କ ଜମିରେ ଫସଲ ନ ହେଲେ ମାଟିର ସ୍ବାସ୍ଥ୍ୟ ପରୀକ୍ଷା ପାଇଁ ପରୀକ୍ଷା କେନ୍ଦ୍ରକୁ ଆଣନ୍ତି। ପରୀକ୍ଷା ପରେ ଜମିରେ କିପରି ଭଲ ଫସଲ ହୋଇପାରିବ ସେ ନେଇ ପରୀକ୍ଷାଗାରରେ ଥିବା ଅଧିକାରୀମାନେ ଚାଷୀଙ୍କୁ ପରାମର୍ଶ ଦେଇଥାନ୍ତି। ହେଲେ ନୟାଗଡ଼ ଜିଲାରେ ଥିବା ମୃତ୍ତିକା ପରୀକ୍ଷାଗାରରେ ଠିକ୍ ଭାବେ ଚାଷଜମିର ମାଟି ପରୀକ୍ଷା କରାଯାଉ ନ ଥିବା ଦେଖିବାକୁ ମିଳିଛି। ୨୦୧୯-୨୦ ବର୍ଷରେ ୧୩,୧୦୪ ଜଣ ଚାଷୀଙ୍କ ମୃତ୍ତିକା ପରୀକ୍ଷା କରାଯିବା ପାଇଁ ଲକ୍ଷ୍ୟଧାର୍ଯ୍ୟ ହୋଇଥିବା ବେଳେ ବର୍ତ୍ତମାନ ସୁଦ୍ଧା ମାତ୍ର ୩୪୯୫ ଜଣ ଚାଷୀଙ୍କ ଏହି ପରୀକ୍ଷା ହୋଇଥିବା ସୂଚନା ମିଳିଛି। ଫଳରେ ମୃତ୍ତିକା ପରୀକ୍ଷା କାର୍ଯ୍ୟକ୍ରମ ଜିଲାରେ ବାଟବଣା ହୋଇଥିବା କୁହାଯାଉଛି।
ଜିଲାର ନୟାଗଡ଼ ଓ ଦଶପଲ୍ଲାଠାରେ ଦୁଇଟି କୃଷିଜିଲା କାର୍ଯ୍ୟାଳୟ ରହିଛି। ନୟାଗଡ଼ ସର୍କଲରେ ନୟାଗଡ଼, ଭାପୁର, ଓଡ଼ଗାଁ, ରଣପୁର ଓ ଖଣ୍ଡପଡ଼ା ବ୍ଲକର ୯୨୬୪ ଚାଷୀଙ୍କ ଜମିର ମୃତ୍ତିକା ପରୀକ୍ଷା ପାଇଁ ଲକ୍ଷ୍ୟଧାର୍ଯ୍ୟ କରାଯାଇଥିଲା। ହେଲେ ମାତ୍ର ୨୩୬୨ ଚାଷୀଙ୍କ ଜମିରୁ ମୃତ୍ତିକା ସଂଗ୍ରହ କରାଯାଇଛି। ସେହିଭଳି ଦଶପଲ୍ଲା କୃଷିଜିଲା କାର୍ଯ୍ୟାଳୟ ଅଧୀନରେ ଗଣିଆ, ଦଶପଲ୍ଲା, ନୂଆଗାଁ ବ୍ଲକର ୩୮୪୦ ଚାଷୀଙ୍କ ମୃତ୍ତିକା ପରୀକ୍ଷା କରି ସେମାନଙ୍କୁ ମୃତ୍ତିକା କାର୍ଡ଼ ଦେବା ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ହେଲେ ସେଥିରୁ ମାତ୍ର ୧୧୩୩ ଚାଷୀଙ୍କ ଜମିରୁ ମୃତ୍ତିକା ପରୀକ୍ଷା ପାଇଁ ସଂଗ୍ରହ କରାଯାଇଛି। ନୟାଗଡ଼ ଓ ଗଣିଆ ବ୍ଲକରେ କୌଣସି ଚାଷୀଙ୍କ ଜମିରୁ ମୃତ୍ତିକା ସଂଗହ କରାଯାଇ ନ ଥିବା ଦେଖିବାକୁ ମିଳିଛି। ନୟାଗଡ଼ ବ୍ଲକରେ ୧୮୮୨ରୁ ୦, ଭାପୁରରେ ୭୨୮ରୁ ୩୦୦, ଓଡ଼ଗାଁରେ ୨୯୫୦ରୁ ୫୦୨, ରଣପୁରରେ ୨୦୧୮ରୁ ୧୦୦୯, ଖଣ୍ଡପଡ଼ାରେ ୧୬୮୬ରୁ ୫୫୧, ଗଣିଆରେ ୫୦୨ରୁ ୦, ଦଶପଲ୍ଲ୍ଲାରେ ୨୦୧୨ରୁ ୬୯୩, ନୂଆଗାଁରେ ୧୩୨୬ରୁ ମାତ୍ର ୪୪୦ ଚାଷୀଙ୍କ ଜମିରୁ ମୃତ୍ତିକା ସଂଗ୍ରହ କରାଯାଇଛି। ପୁଣି ମୃତ୍ତିକା ସଂଗ୍ରହ ହୋଇଥିବା ୩୪୯୫ ଚାଷୀଙ୍କ ମଧ୍ୟରୁ ମାତ୍ର ୫୦୨ ଜଣଙ୍କ ନାମ ପରୀକ୍ଷା କେନ୍ଦ୍ରରେ ପଞ୍ଜୀକୃତ ହୋଇଛି। ଏହାକୁ ଜିଲା ମୃତ୍ତିକା ପରୀକ୍ଷାଗାର କର୍ମଚାରୀ ଓ ଅଧିକାରୀଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ସୂଚନାଯୋଗ୍ୟ ଜିଲାରେ ୧ ଲକ୍ଷ ୪୪ ହଜାର ୮୩ ଜଣ ଚାଷୀ ଥିବାବେଳେ ସେମାନଙ୍କ ମଧ୍ୟରୁ ପାଖାପାଖି ୩୨ ହଜାର ଚାଷୀ ମୃତ୍ତିକା କାର୍ଡ଼ ପାଇଛନ୍ତି। ଏ ନେଇ ଦାୟିତ୍ୱରେ ଥିବା କୃଷି ଉପନିର୍ଦ୍ଦେଶକ ଲକ୍ଷ୍ମୀ ନାରାୟଣ ଦାସଙ୍କୁ ଯୋଗାଯୋଗ କରାଯାଇଥିଲେ ତାଙ୍କ ମୋବାଇଲ୍ ସୁଇଚ୍ ଅଫ ଥିବାରୁ କୌଣସି ମତାମତ ମିଳିପାରି ନାହିଁ। ମୃତ୍ତିକା ପରୀକ୍ଷାଗାରରେ କିପରି ଠିକ୍ ଭାବେ ପରୀକ୍ଷା କରାଯାଇ ଚାଷୀମାନଙ୍କୁ ସୁବିଧା ମିଳିବ ସେ ଦିଗପ୍ରତି ପ୍ରଶାସନ ଧ୍ୟାନ ଦେବା ପାଇଁ ଚାଷୀ ମହଲରେ ଦାବି ହେଉଛି।
