ନ୍ୟୁୟର୍କ,୩୦।୧୦: ଆସନ୍ତା ୩୦ ବର୍ଷ ମଧ୍ୟରେ ମୁମ୍ବାଇ ଭଳି ପୃଥିବୀର ବହୁ ସହର ସମୁଦ୍ର ଆଁରେ ଲୀନ ହେବ। ଏନେଇ ନ୍ୟୁଜର୍ସି ସ୍ଥିତ ସଂସ୍ଥା କ୍ଲାଇମେଟ୍ ସେଣ୍ଟ୍ରାଲ୍ ପକ୍ଷରୁ ପ୍ରକାଶିତ ନେଚର କମ୍ୟୁନିକେଶନ୍ରେ ପତ୍ରିକାରେ ପ୍ରକାଶ ପାଇଛି। ବହୁ ପରିବେଶ ବିଜ୍ଞାନୀ ଏସମ୍ପର୍କରେ ନିଜର ମତାମତ ଦେଇଛନ୍ତି। ଏଥିରେ କୁହାଯାଇଛି ଯେ, ବିଶ୍ୱ ତାପମାନ ପ୍ରତିବର୍ଷ ୨ ଡିଗ୍ରୀ ସେଲସିୟସ୍ ବୃଦ୍ଧି ପାଉଛି। ଏହା ଯୋଗୁ ଜଳବାୟୁ ପରିବର୍ତ୍ତନ ହେବାରେ ଲାଗିଛି। ଫଳରେ ଆଣ୍ଟାର୍କଟିକାଠାରେ ଥିବା ହିମ ପାହାଡ଼ ଧୀରେ ଧୀରେ ତରଳୁଛି। ଫଳରେ ଗତ କିଛି ଦଶନ୍ଧି ଧରି ସମୁଦ୍ରରେ ବର୍ଷ ପିଛା ୪୩୦ ଶହ କୋଟି ଟନ୍ ହିମଖଣ୍ଡ ପ୍ରବେଶ କରୁଛି। ଏହା ଯୋଗୁ ପ୍ରତିବର୍ଷ ସମୁଦ୍ର ଜଳସ୍ତର ବଢ଼ିବାରେ ଲାଗିଛି। ୨୧୦୦୦ ବେଳକୁ ଏହା ଅଧା ମିଟର ବୃଦ୍ଧି ପାଇବ ବୋଲି ଅନୁମାନ କରାଯାଉଛି। ଏପରି ହେଲେ ୨୦୫୦ ସୁଦ୍ଧା ସମୁଦ୍ର କୂଳରେ ଥିବା ଅଞ୍ଚଳରେ ପାଣି ମାଡ଼ିଯିବ। ପ୍ରତିବର୍ଷ ଏଠାରେ ବନ୍ୟା ସ୍ଥିତି ମଧ୍ୟ ସୃଷ୍ଟି ହେବ ବୋଲି ପତ୍ରିକାରେ ପ୍ରକାଶ ପାଇଥିବା ରିପୋର୍ଟରେ ଦର୍ଶାଯାଇଛି। ଏହାଦ୍ୱାରା ୩ ଶହ ନିୟୁତ ଲୋକ ପ୍ରଭାବିତ ହେବାର ଆଶଙ୍କା ରହିଛି। ଉପକୂଳ ଓଡ଼ିଶା ଓ ପଶ୍ଚିମବଙ୍ଗର କୋଲକାତା ସମେତ ଅନେକ ଅଞ୍ଚଳ ବନ୍ୟା କବଳିତ ହେବ। ଚାଇନା, ବାଂଲାଦେଶ, ଭାରତ, ଭିଏତ୍ନାମ, ଇଣ୍ଡୋନେସିଆ ଓ ଥାଇଲାଣ୍ଡର ଅଧିକାଂଶ ଭୂଭାଗ ସମୁଦ୍ର ପତ୍ତନ ତଥା ଉପକୂଳ ବନ୍ୟାସ୍ତରଠାରୁ ନିମ୍ନରେ ରହିଥିବାରୁ ଏହି ଅଞ୍ଚଳଗୁଡ଼ିକ ବିଶେଷ ପ୍ରଭାବିତ ହେବ। ସମ୍ପ୍ରତି ଉପକୂଳ ଅଞ୍ଚଳରେ ୧୫୦ ନିୟୁତରୁ ଅଧିକ ଲୋକ ବସବାସ କରୁଛନ୍ତି। ଏହି ସଂଖ୍ୟା ଆସନ୍ତା ୩୦ ବର୍ଷ ମଧ୍ୟରେ ୩ ଶହ ନିୟୁତ ଛୁଇଁବ ବୋଲି ରିପୋର୍ଟରେ କୁହାଯାଇଛି।
