ଭୁବନେଶ୍ୱର,୧୨ା୧୨(ବ୍ୟୁରୋ): ରାଜ୍ୟ ସରକାର ଚାଷୀମାନଙ୍କର ଆର୍ଥିକ ସଶକ୍ତୀକରଣ ପ୍ରସଙ୍ଗରେ କୁମ୍ଭୀରକାନ୍ଦଣା ଛଡ଼ା ଅନ୍ୟ କୌଣସି ଆଖିଦୃଶିଆ ପଦକ୍ଷେପ ନେଇନାହାନ୍ତି। ଓଡ଼ିଶାରେ ଧାନର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ପ୍ରସଙ୍ଗରେ ରାଜ୍ୟ ସରକାର ନିଜ ମୁଣ୍ଡରୁ ଦାୟିତ୍ୱ ହଟାଇ କେବଳ ଦାୟିତ୍ୱହୀନ ମନ୍ତବ୍ୟ ଦେଇ କର୍ତ୍ତବ୍ୟ ଶେଷ କରିଦେଇଛନ୍ତି। ଓଡ଼ିଶା ସରକାର କ୍ୟାବିନେଟ୍ ବୈଠକ ଜରିଆରେ ଧାନର ଏମ୍ଏସ୍ପି ୨ଗୁଣ ବର୍ଦ୍ଧିତ କରିବା ପାଇଁ ସଂକଳ୍ପ ନେବା ଓ କେନ୍ଦ୍ରକୁ ଚିଠି ଲେଖିବା ଶାସକ ଦଳର ଆଉ ଏକ ଭାଣ୍ଡାମି ବୋଲି ଭାଜପା କୃଷକ ମୋର୍ଚ୍ଚା ରାଜ୍ୟ ସଭାପତି ପ୍ରଦୀପ ପୁରୋହିତ କହିଛନ୍ତି।
ମଣ୍ଡି ଜରିଆରେ ଚାଷୀମାନେ ଧାନ ବିକ୍ରି କରୁଛନ୍ତି। କେନ୍ଦ୍ର ସରକାର ଧାନର ଏମ୍ଏସ୍ପି କୁଇଣ୍ଟାଲ ପ୍ରତି ୧୮୬୮ ଟଙ୍କା ରାଜ୍ୟକୁ ପଠାଉଛନ୍ତି। କିନ୍ତୁ ଦୁର୍ଭାଗ୍ୟର ବିଷୟ, ମଣ୍ଡିଗୁଡ଼ିକରେ ଧାନ ପ୍ରତି କୁଇଣ୍ଟାଲ ପିଛା ୬/୮ କେ.ଜି. କଟ୍ନିଛଟ୍ନି କରାଯାଇ ଚାଷୀମାନଙ୍କୁ ଶୋଷଣ କରାଯାଉଛି। ଟୋକନ୍ ବ୍ୟବସ୍ଥାରେ ବ୍ୟାପକ ଅନିୟମିତତା ଯୋଗୁ ଛୋଟ ଓ ମଧ୍ୟମ ବର୍ଗ ଚାଷୀମାନେ ମାତ୍ର ୧୨୦୦ରୁ ୧୪୦୦ ଟଙ୍କାରେ ମଧ୍ୟସ୍ଥମାନଙ୍କୁ ଧାନ ବିକ୍ରି କରୁଛନ୍ତି ବୋଲି ସେ କହିଛନ୍ତି। ୭୦% କୃଷକମାନଙ୍କ ଭୋଟରେ ମୁଖ୍ୟମନ୍ତ୍ରୀ ଚୌକିରେ ବସିଥିବା ନବୀନବାବୁ ଓଡ଼ିଶାର ମଣ୍ଡି ବ୍ୟବସ୍ଥାକୁ କାହିଁକି ସମୀକ୍ଷା କରୁନାହାନ୍ତି। ଯଦି ବାସ୍ତବରେ ମୁଖ୍ୟମନ୍ତ୍ରୀଙ୍କ ଚାଷୀମାନଙ୍କ ପ୍ରତି ଦରଦ ଥିବ, ତା’ହେଲେ ଯେକୌଣସି ଏକ ମଣ୍ଡିକୁ ଯାଇ କୃଷକମାନଙ୍କ ସମସ୍ୟା ସମ୍ପର୍କରେ ଅବଗତ ହୁଅନ୍ତୁ ବୋଲି ପୁରୋହିତ ଆହ୍ବାନ ଦେଇଛନ୍ତି। ଛତିଶଗଡ଼, ମଧ୍ୟପ୍ରଦେଶ ଭଳି ଅନ୍ୟ ରାଜ୍ୟ ନିଜସ୍ବ ପାଣ୍ଠିରୁ ଚାଷୀମାନଙ୍କୁ ବୋନସ୍ ପ୍ରଦାନ କରୁଛନ୍ତି। ୨୦୧୫ ନଭେମ୍ବର ୧୫ରେ ମୁଖ୍ୟମନ୍ତ୍ରୀ ବରଗଡ ଜିଲା ସୋହେଲା ଚାଷୀ ସମାବେଶରେ ଧାନ କୁଇଣ୍ଟାଲ ପିଛା ୧୦୦ ଟଙ୍କାର ବୋନସ ଘୋଷଣା କରିଥିଲେ। ଆଜି ପର୍ଯ୍ୟନ୍ତ ତାହା କାହିଁକି କାର୍ଯ୍ୟକାରୀ କରାଗଲା ନାହିଁ ବୋଲି ପୁରୋହିତ ପ୍ରଶ୍ନ କରିଛନ୍ତି। ଏପରିକି କୃଷି କ୍ଷେତ୍ରର ବିକାଶ ପାଇଁ (ଜଳସେଚନ) ୩୫ ହଜାର କୋଟି ଟଙ୍କା ୫ ବର୍ଷ ଭିତରେ ଖର୍ଚ୍ଚ କରାଯିବ ବୋଲି ଘୋଷଣା କରିଥିଲେ ହେଁ ଏ ପର୍ଯ୍ୟନ୍ତ ଟଙ୍କାଟିଏ ଖର୍ଚ୍ଚ ହୋଇନାହିଁ ବୋଲି ସେ ଅଭିଯୋଗ କରିଛନ୍ତି।
