ଭୁବନେଶ୍ୱର,୧୯।୪(ବ୍ୟୁରୋ): ରଥଯାତ୍ରା ସହ ଓଡ଼ିଆଙ୍କ ଭାବଗତ ସମ୍ପର୍କ ରହିଛି। ବହୁ ପ୍ରାଚୀନ କାଳରୁ ଏହି ପରମ୍ପରା ଚଳି ଆସୁଛି। ହେଲେ ବର୍ତ୍ତମାନ କରୋନା ମୁକାବିଲା ଜାରି ରହିଛି। କେତେକ ଗଣମାଧ୍ୟମ ରିପୋର୍ଟରେ ରଥଯାତ୍ରା ସମ୍ପର୍କିତ ଅନିଶ୍ଚିତତା ନେଇ ଖବର ପ୍ରକାଶ ପାଉଛି। ଏହି ରିପୋର୍ଟ କୋଟି କୋଟି ଭକ୍ତଙ୍କ ଭାବାବେଗକୁ ଆନ୍ଦୋଳିତ କରୁଥିବା କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀ କହିଛନ୍ତି। ଏଥିସହିତ ଏ ସମ୍ପର୍କରେ ଦୃଷ୍ଟି ଆକର୍ଷଣ କରି କେନ୍ଦ୍ରମନ୍ତ୍ରୀ ଷଡ଼ଙ୍ଗୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି।
ଏଥିରେ କେନ୍ଦ୍ରମନ୍ତ୍ରୀ ଉଲ୍ଲେଖ କରିଛନ୍ତି ଯେ, ଚଳିତ ବର୍ଷ ଜୁନ୍ ୨୩ରେ ଘୋଷଯାତ୍ରା ପଡୁଅଛି। ଏଥିରେ ବହୁ ସଂଖ୍ୟାକ ଲୋକ ଭାଗ ନେଇଥାନ୍ତି। ବର୍ତ୍ତମାନ କରୋନା ମୁକାବିଲା ପାଇଁ ସାମାଜିକ ଦୂରତାକୁ ବ୍ୟାପକ ଗୁରୁତ୍ୱ ଦିଆଯାଉଛି। ତେଣୁ ପ୍ରଶାସନ ଏହି ବିଶେଷ ପରିସ୍ଥିତିରେ ସର୍ବନିମ୍ନ ଆବଶ୍ୟକତାକୁ ଦୃଷ୍ଟିରେ ରଖି ଯାତ୍ରା ସମ୍ପନ୍ନ କରିବାକୁ ପ୍ରତାପ ପ୍ରସ୍ତାବ ଦେଇଛନ୍ତି। ସେହିପରି ରଥଯାତ୍ରା ସମ୍ପର୍କିତ ଜନସାଧାରଣରେ ସୃଷ୍ଟି ହୋଇଥିବା ଗୁଜବକୁ ପ୍ରତିହତ କରାଯାଉ। ତୁରନ୍ତ ପୁରୀସ୍ଥିତ ଶ୍ରୀମନ୍ଦିର ପ୍ରଶାସନ ରଥଯାତ୍ରା ସମ୍ପର୍କିତ ସବିଶେଷ ନିଷ୍ପତ୍ତି ଗ୍ରହଣ ପୂର୍ବରୁ ଗୋବର୍ଦ୍ଧନ ପୀଠର ଶଙ୍କରାଚାର୍ଯ୍ୟ, ପୁରୀ ଗଜପତି ଦିବ୍ୟସିଂହଦେବ, ମୁକ୍ତିମଣ୍ଡପ ବିଜ୍ଞମଣ୍ଡଳୀ, ଦଇତାପତି ଏବଂ ମନ୍ଦିର ସେବକଙ୍କ ପରାମର୍ଶ ନେବା ପାଇଁ କେନ୍ଦ୍ରମନ୍ତ୍ରୀ କହିଛନ୍ତି।
