ନୂଆଦିଲ୍ଲୀ: କେନ୍ଦ୍ର ସରକାର ଆଉ ଏକ ରାଷ୍ଟ୍ରାୟତ୍ତ ଉଦ୍ୟୋଗରୁ ଅଂଶଧନ ବିକ୍ରି କରିବାକୁ ଯୋଜନା ରଖିଛନ୍ତି। ପ୍ରତିରକ୍ଷା ରାଷ୍ଟ୍ରାୟତ୍ତ ଉଦ୍ୟୋଗ ମିଶ୍ର ଧାତୁ ନିଗମ ଲିମିଟେଡ(ମିଧାନୀ)ରୁ ୧୦% ଅଂଶଧନ ସରକାର ବିକ୍ରି କରିପାରନ୍ତି। ଏ ନେଇ ସରକାରଙ୍କ ଜଣେ ବରିଷ୍ଠ ଅଧିକାରୀ ପିଟିଆଇକୁ ସୂଚନା ଦେଇଛନ୍ତି। ୨୦୧୮ ଏପ୍ରିଲରେ ଏହି କମ୍ପାନୀକୁ ଶେୟାର ବଜାରରେ ସୂଚୀଭୁକ୍ତ କରାଯାଇଥିଲା। ଏଥିରେ ୨୬% ଅଂଶଧନ ବିକ୍ରି ଲାଗି ସରକାର ଏକ ଇନିସିଆଲ ପବ୍ଲିକ ଅଫରିଂ(ଆଇପିଓ) ଆଣିଥିଲେ। ଏଥିରୁ ୪୩୮ କୋଟି ଟଙ୍କା ସଂଗ୍ରହ କରାଯାଇଥିଲା। ବିଗତ ଦିନଗୁଡିକରେ ପ୍ରତିରକ୍ଷା କ୍ଷେତ୍ରରେ ସରକାର ଅଟୋମେଟିକ ରୁଟ୍ ବା ପ୍ରତ୍ୟକ୍ଷ ଭାବେ ୭୪% ଏଫ୍ଡିଆଇକୁ ମଞ୍ଜୁରୀ ଦେଇଛନ୍ତି। ଏଭଳି ସ୍ଥିତିରେ ମିଧାନୀର ଶେୟାର ନିବେଶକଙ୍କୁ ସୁହାଇବ ବୋଲି ଅଧିକାରୀ ପ୍ରକାଶ କରିଛନ୍ତି।
ସୂଚନାଯୋଗ୍ୟ, ମିଧାନୀ ସ୍ବତନ୍ତ୍ର ଷ୍ଟିଲ୍ ପ୍ରସ୍ତୁତ କରୁଛି। ପ୍ରତିରକ୍ଷା, ଆଣବିକ ଏବଂ ମହାକାଶ ଗବେଷଣା ଭଳି କ୍ଷେତ୍ରରେ ଏହା ବ୍ୟବହାର ହେଉଛି। ଉକ୍ତ କମ୍ପାନୀରୁ ଆଉ ୧୦% ଅଂଶଧନ ବିକ୍ରି କରିବା ନେଇ ସରକାର ଯୋଜନା ରଖିଛନ୍ତି। ଚଳିତ ସପ୍ତାହରେ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସେନସେକ୍ସରେ ଏହି କମ୍ପାନୀର ଶେୟାର ମୂଲ୍ୟ ୧୯୩.୫୦ ଟଙ୍କାରେ ବନ୍ଦ ହୋଇଥିବା ନଜରକୁ ଆସିଥିଲା। ଏହି ମୂଲ୍ୟରେ ସରକାର ଯଦି ଆଉ ୧୦% ଅଂଶଧନ ବିକ୍ରି କରନ୍ତି ତେବେ ୩୬୦ କୋଟି ଟଙ୍କା ଲାଭ କରିବେ।
