ପୋଲସରା,୨୧ା୫(ଡି.ଏନ.ଏ.)-ଗଞ୍ଜାମ ଜିଲା ପୋଲସରା ବ୍ଲକ ମାଳତେନ୍ତୁଳିଆ ପଞ୍ଚାୟତରେ ବିଭିନ୍ନ ଯୋଜନାରେ ଆସୁଥିବା ଟଙ୍କାକୁ ନେଇ ବ୍ୟାପକ ଦୁର୍ନୀତି ହେଉଥିବା ଅଭିଯୋଗ ହୋଇଛି। ସୋମବାର ପୂର୍ବତନ ସରପଞ୍ଚ ତଥା ବର୍ତ୍ତମାନର ସମିତିସଭ୍ୟଙ୍କ ପ୍ରତିନିଧି ଲକ୍ଷ୍ମୀ ଚରଣ ପ୍ରଧାନଙ୍କ ସମେତ ପଞ୍ଚାୟତର ୬୦ରୁ ଊର୍ଦ୍ଧ୍ୱ ଲୋକ ପଞ୍ଚାୟତ କାର୍ଯ୍ୟାଳୟରେ ବସି ସରପଞ୍ଚଙ୍କୁ ଡ଼କାଇଥିଲେ। କିନ୍ତୁ ସରପଞ୍ଚ ଆସି ନ ଥିଲେ। ସରପଞ୍ଚଙ୍କ ଅନୁପସ୍ଥିତି ହେତୁ ଗ୍ରାମ ରୋଜଗାର ସେବକ (ଜିଆରଏସ)ଙ୍କୁ ପଞ୍ଚାୟତ କାର୍ଯ୍ୟାଳୟରେ ବସାଇ ସମସ୍ତ କାର୍ଯ୍ୟର ତଥ୍ୟ ମାଗିଥିଲେ। ଗ୍ରାମ ରୋଜଗାର ସେବକ ମିଥୁନ କୁମାର ସାହୁଙ୍କୁ ଏମଜିଏନଆରଇଜିଏସ୍ରେ ଜଗନ୍ନାଥ ବନ୍ଧଠାରୁ ଉଚ୍ଚ ପ୍ରାଥମିକ ବିଦ୍ୟାଳୟ କାର୍ଯ୍ୟ ବ୍ୟୟ ଅଟକଳ ୭ ଲକ୍ଷ ଟଙ୍କା ରହିଛି। କିନ୍ତୁ ଏହି କାମ ଠିକ ଭାବେ ହୋଇ ନ ଥିବା ଅଭିଯୋଗ ଆଣିଥିଲେ। ଏଥିସହିତ ଖଇରଛଟାଠାରୁ ପଲ୍ଲୀଦଣ୍ଡା ରାସ୍ତା, ଯାହା ବ୍ୟୟ ଅଟକଳ ୫ ଲକ୍ଷ ଟଙ୍କା ରହିଛି। ଉକ୍ତ ରାସ୍ତାରେ କେହି କାମ ନ କରି ୧ ଲକ୍ଷ ୩୨ ହଜାର ଟଙ୍କା ବିଲ୍ ହୋଇଥିବା ଉକ୍ତ ପଞ୍ଚାୟତ ଖଇରଛଟା ଗ୍ରାମର ସତ୍ୟବାଦୀ ଗୌଡ଼, ତେନ୍ତୁଳିଆର ହରିହର ଦାସ, ତୋଫାନ ପ୍ରଧାନ, ଲକ୍ଷ୍ମୀ ଚରଣ ପ୍ରଧାନ, କେ. ଦିଲୀପ କୁମାର ମହାପାତ୍ର ଓ ସୁକାନ୍ତ ରାଉତ ପ୍ରମୁଖଙ୍କ ସମେତ ବହୁ ବ୍ୟକ୍ତି ଅଭିଯୋଗ ଆଣିଥିଲେ।
ସେହିପରି ଖଇରଛଟା ଗ୍ରାମରେ ଶିବ ମନ୍ଦିର କଙ୍କ୍ରିଟ ରାସ୍ତା ନିର୍ମାଣରେ ବ୍ୟାପକ ଦୁର୍ନୀତି, ସରକାରୀ ନିର୍ଦ୍ଦେଶ ପ୍ରକାରେ ଯେଉଁ ପରିମାଣରେ ନିର୍ମାଣ ହେବା କଥା ତାହା ନ ହୋଇ ଅତି ନିମ୍ନମାନର କାର୍ଯ୍ୟ ହୋଇଥିବା, ଆମ ଗଁା ଆମ ବିକାଶ ଯୋଜନାରେ ପାଠାଗାର ନିର୍ମାଣ ଲାଗି ୫ ଲକ୍ଷ ଟଙ୍କା ଆସିଥିବା ବେଳେ ତାହା ବଳାସୀ ସମାଜ କୋଠଘର ବୋଲି କହି ନିର୍ମାଣ କରାଯାଇଥିବା ଅଭିଯୋଗ ଆଣିଥିଲେ। ଗ୍ରାମ ରୋଜଗାର ସେବକ ଠିକ୍ ହିସାବ ବା ତଥ୍ୟ ପ୍ରଦାନ ନ କରିବା ଯୋଗୁ କନିଷ୍ଠ ଯନ୍ତ୍ରୀ ପ୍ରମୋଦ କୁମାର ଶତପଥୀଙ୍କୁ ଡ଼କାଇ ଆଲୋଚନା କରିଥିଲେ। ଦୁଇଦିନ ପରେ ସମସ୍ତ କାର୍ଯ୍ୟର ତଦାରଖ କରି ଯାଞ୍ଚ କରିବା ପାଇଁ ଉପସ୍ଥିତ ପଞ୍ଚାୟତବାସୀଙ୍କୁ କନିଷ୍ଠ ଯନ୍ତ୍ରୀ ଶତପଥୀ ପ୍ରତିଶ୍ରୁତି ଦେଇଥିଲେ। ଉକ୍ତ ଦୁର୍ନୀତି ପ୍ରସଙ୍ଗରେ ସରପଞ୍ଚ ପ୍ରତିନିଧି ନରହରି ପ୍ରଧାନ ପଞ୍ଚାୟତରେ ଠିକ୍ କାମ ହୋଇଥିବା କହିଥିଲେ। ଆଲୋଚନା ବେଳେ ତେନ୍ତୁଳିଆ ପଞ୍ଚାୟତର ବହୁ ଜନସାଧାରଣ ଉପସ୍ଥିତ ଥିଲେ। ଯେଉଁ ଦୁର୍ନୀତି ହୋଇଛି ଏହାର ଭରଣା କରା ନ ଗଲେ ଆଗାମୀ ଦିନରେ ବ୍ୟାପକ ଜନ ଆନ୍ଦୋଳନ ହେବ ବୋଲି ପଞ୍ଚାୟତବାସୀ କହିଥିଲେ।