ମାଲକାନଗିରି,୨୧ା୫ (ଡି.ଏନ୍.ଏ.)- ମଙ୍ଗଳବାର ପ୍ରକାଶ ପାଇଛି ମାଟ୍ରିକ ପରୀକ୍ଷା ଫଳ। ମାଲକାନଗିରି ଜିଲାରେ ଶତକଡ଼ା ୫୮.୩୯ ପ୍ରତିଶତ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ମୋଟ ୫୪୧ ନମ୍ବର ଅର୍ଥାତ୍ ଶତକଡ଼ା ୯୦.୧୬ ପ୍ରତିଶତ ନମ୍ବର ରଖି ଜିଲାରେ ଶକ୍ତିପ୍ରସାଦ ରାଉତ ଟପ୍ପର ହୋଇଛନ୍ତି। ଚଳିତବର୍ଷ ଜିଲାରେ ୩୧ଟି ପରୀକ୍ଷା କେନ୍ଦ୍ରରେ ୧୦୯ଟି ବିଦ୍ୟାଳୟର ଛାତ୍ରୀଛାତ୍ର ପରୀକ୍ଷା ଦେଇଥିଲେ ା ଜଣେ ମାଲ ପ୍ରାକ୍ଟିସରେ ଧରା ପଡ଼ିଥିଲେ ା ଜିଲାରେ ପରୀକ୍ଷା ଦେବାକୁ ୫୬୯୯ ଜଣ ଫର୍ମପୂରଣ କରଥିବା ବେଳେ ପରୀକ୍ଷା ବେଳେ ୧୮୩ ଜଣ ଅନୁପସ୍ଥିତ ଥିଲେ। ତେବେ ୫୫୧୫ ପରୀକ୍ଷାର୍ଥୀଙ୍କ ମଧ୍ୟରୁ ୧୭୧୨ ଜଣ ଛାତ୍ର ଓ ୧୫୦୮ ଜଣ ଛାତ୍ରୀଙ୍କ ସମେତ ମୋଟ ୩୨୨୦ ଜଣ ଛାତୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ଏ ୱାନ ଗ୍ରେଡରେ ବାଲିମେଳା ଉଚ୍ଚ ବିଦ୍ୟାଳୟର ଛାତ୍ର ଶକ୍ତି ପ୍ରସାଦ ରାଉତ, ଏଟୁ ଗ୍ରେଡରେ ୧୮ ଜଣ, ବି-ୱାନ ଗ୍ରେଡରେ ୫୬ ଜଣ, ବିଟୁ ଗ୍ରେଡରେ ୧୩୪ ଜଣ, ୩୮୫ ଜଣ ସି, ୯୭୬ ଜଣ ଡି , ୧୬୫୦ ଜଣ ଇ ଗ୍ରେଡରେ ଉତ୍ତୀର୍ଣ୍ଣ ହୋଇଥିବା ଜଣାପଡିଛି। ୨୨୯୫ ଜଣ ଫେଲ ହୋଇଛନ୍ତି। ଜିଲାରେ ଟପ୍ପର ହୋଇଥିବା ଶକ୍ତି ପ୍ରସାଦ ତାଙ୍କର ଏହି ସଫଳତା ପାଇଁ ମାଆବାପା ଓ ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକଙ୍କୁ ଶ୍ରେୟ ଦେଇଛନ୍ତି। ଜଣେ ମେଧାବୀ ଛାତ୍ର ରୂପେ ଶକ୍ତିପ୍ରସାଦ ପାଠପଢ଼ା ସହ ବିଭିନ୍ନ ସମୟରେ ଅନେକ ପ୍ରତିଯୋଗିତାରେ ଅଂଶଗ୍ରହଣ କରି ସଫଳତା ପାଇଆସୁଥିଲେ ବୋଲି ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକମାନେ ପ୍ରକାଶ କରିଛନ୍ତି।
