କେସିଙ୍ଗା,୮।୧୨(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ଅନ୍ତର୍ଗତ କୁଣ୍ଡାବନ୍ଦ ପଞ୍ଚାୟତ ହରିଜନପଡ଼ାରେ ରବିବାର ଜଣେ ମଦ୍ୟପ ସ୍ବାମୀଙ୍କ ଟାଙ୍ଗିଆ ଚୋଟରେ ସ୍ତ୍ରୀଙ୍କ ମୃତ୍ୟୁ ଘଟିଛି। ମୃତ ମହିଳା ଜଣକ ହେଲେ ମଦନା ଦୀପ (୪୫)।
ସୂଚନାଯୋଗ୍ୟ, ମଦନାଙ୍କ ସ୍ବାମୀ ମହନ ଦୀପ (୫୬) ଦୀର୍ଘ ଦିନରୁ ମାନସିକ ରୋଗରେ ଆକ୍ରାନ୍ତ ଥିଲେ। ତେବେ କିଛିଦିନ ହେବ ସେ ମଦପିଇ ଘରେ ଝଗଡ଼ା ସୃଷ୍ଟି କରୁଥିଲେ। ସକାଳେ ବଡ଼ପୁଅ ଗଣପତି ବାପାଙ୍କୁ ମେଡିକାଲ ନେବାକୁ ପଡୋଶୀଙ୍କ ଘରକୁ ଗାଡି ଆଣିବାକୁ ଯାଇଥିଲେ। ଏହି ସମୟରେ ମଦନା ଗାଧୋଇବାକୁ ଯାଉଥିବା ବେଳେ ମହନ ତାଙ୍କୁ ଟାଙ୍ଗିଆରେ ହାଣିଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଖବରପାଇ ଗଣପତି ପହଞ୍ଚି ପୋଲିସକୁ ଖବର ଦେଇଥିଲେ। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଥିବା ବେଳେ ଭବାନିପାଟଣାରୁ ସାଇଣ୍ଟଫିକ୍ ଟିମ୍ ପହଞ୍ଚିଛନ୍ତି। ମୃତଦେହ ବ୍ୟବଚ୍ଛେଦ ଲାଗି କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଛି।
