ଜାମଟିକ୍ରା, ୧୭।୪ (ଡି.ଏନ.ଏ): କେହେନ୍ସି ଗାଁର ବିକାଶ କଥା ଚିନ୍ତା କଲେ ସରକାର ପହେଲା ସେ ଗଁାକେ ରାସ୍ତାଘାଟର ସୁବିଧା କରସନ୍। ରାସ୍ତାଘାଟ, ବିଜଲି, ପିଇଲା ପାଏନ୍, ସୁଆସ୍ତିଅ ସେବା, ଶିକ୍ଷା ସମକର ମଉଲିକ୍ ଅଧିକାର ଆଏ। ହେଲେ ଇ ସବୁ ଭିତରୁ ରାସ୍ତାଘାଟ ସୁବିଧାଟା ମୁଖିଆ ଆଏ। କାରନ୍ ରାସ୍ତାଘାଟ ନାଇଁହେଲେ ବାକି ମଉଲିକ ସୁବିଧା ବି ସହଜେ ନାଇଁ ମିଲିପାରେ। ହେଲେ ଆଏଜ୍ ବି ଆମର ରାଏଜେ ଏନ୍ତା ବହୁତ୍ଟେ ଗଁାଗଁଡ଼ା ଅଛେ ଯେନ୍କେ ଯିବଆର ଆଏବାର ଲାଗି ଫିଦିନିଅଁା ରାସ୍ତା ଖଁଡ଼େ ନଁାଇଁନ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ବୁଗବୁଗା ପଁଚେତ୍ର କଣ୍ଟାତଲ ଗଁାରେ। ସୂଚନା ଅନ୍ସାରେ ଅତାବିରା ବ୍ଲକ ବୁଗବୁଗା ପଁଚେତ୍ର କଣ୍ଟାତଲ ଗଁା ବ୍ଲକ୍ ସଦରନୁ ୧୦ କି.ମି. ଦୂରେ ରହିଛେ। ଗଁାର ଲୋକ୍ ସଂଖ୍ୟା ପାଖାପାଖି ୩ଶହ ହେଇଥିଲାବେଲେ ସଭେ ଆଦିବାସୀ ସମାଜର। ସବୁ ପରିବାର ନିହାତି ଗରିବ୍ ଆର ପରହର କାମବୁତା କରି କୁଟୁମ ପୁଷୁଛନ୍। ଇ ଗଁାକେ ଯାଆସ ଲାଗି ଫିଦିନିଅଁା ରାସ୍ତା ନଁାଇଁନ। ଯେନ୍ଥିରଲାଗି ଗଁାବାସୀ ଅନେକ ସମିଆରେ ଜରୁରୀକାଲିନ ସେବାରୁ ବଁଚିତ ହେଉଛନ୍। ସେନ୍ତା ରାସ୍ତାଗାଟ ଅଭାବୁ ବାକି ସବୁ ମଉଲିକ ସୁବିଧାର ଲାଗି ହଇରାନ ହରକତ୍ ହେଉଛନ୍। ଗଁାର ପିଲାମାନେ ଉନିଅଁା ଗଁାକେ ପାଠ୍ ପଢ଼ିଯାଉଛନ୍। ହେଲେ ରାସ୍ତା ଅଭାବୁ ବର୍ଷା ଦିନେ ଛାତ୍ରୀଛାତ୍ର ଅଁାଠେ କାଦୋ ଲହଁକି ପାଠ୍ ପଢ଼ି ଯାଏସନ୍। ଗଁାରେ ପିଇଲା ପାଏନ୍ ସୁବିଧା, ସ୍କୁଲ, ଅଙ୍ଗନଓ୍ବାଡି କେନ୍ଦ୍ର ନଁାଇଁନ। ରାଶନ ସାମାନ ଲାଗି ଗଁାବାସୀକୁ ପାଖାପାଖି ୩ କି.ମି. ଯିବାକେ ପଡ଼ୁଛେ। ‘ଆମ ଗଁା ଆମ ବିକାଶ’ ଯୋଜନାରେ ଗଁାକେ ଟଁକାଟେ ନାଇଁଆସି। ଖାଲି ନିରବାଚନ ସମିଆରେ ଗଁାକେ ନେତା, ମନ୍ତ୍ରୀକର ଧାର ଲମୁଛେ, ସଭେ ପରତିଶୁରତି ଉପରେ ପରତିଶୁରତି ଦେଉଛନ୍। ହେଲେ ଭୋଟ ସଏଲେ କିଏ କାହାକେ ଚିନ୍ହୁଁଛେ। ଗଁାକେ ଫିଦିନିଅଁା ରାସ୍ତା ଖଁଡ଼େ ଲାଗି ଗଁାବାସୀ ନେତା, ମନ୍ତ୍ରୀନୁ ମୂଲ କରି ଥାନୀୟ ପରଶାସନକେ ଗୁହାରି କରି ନିରାଶ ହେଇଛନ୍। ଇ ବାବ୍ଦେ ବୁଗବୁଗା ସରପଁଚ୍ ପୁଷ୍ପକାନ୍ତି ସେଠକୁଁ ପଚରାଲାରୁ ସମସିଆର ସମାଧାନ କରାଯିବା ବଲି ସେ କହିଥିଲେ।
