ଜେନେଭା,୧୨।୩: ପୃଥିବୀରେ ଶରଣାର୍ଥୀଙ୍କ ସମସ୍ୟା ଏବେ ବଢ଼ିବାରେ ଲାଗିଛି। ସମ୍ପ୍ରତି ବିଭିନ୍ନ ଦେଶରେ ୭ କୋଟିରୁ ଅଧିକ ଶରଣାର୍ଥୀ ରହିଛନ୍ତି। ଗୃହଯୁଦ୍ଧ, ଆତଙ୍କବାଦ ଅବା ଅନ୍ୟ ରାଜନୈତିକ କାରଣରୁ ସେମାନେ ନିଜ ଭିଟାମାଟିର ମୋହ ପଛରେ ପକାଇ ଅନ୍ୟ ଦେଶରେ ଶରଣ ନେଇଛନ୍ତି। ଅଧିକାଂଶ ଶରଣାର୍ଥୀ ସିରିଆ, ଆଫଗାନିସ୍ତାନ, ଦକ୍ଷିଣ ସୁଦାନ, ମ୍ୟାନମାର୍ ଏବଂ ସୋମାଲିଆ ଆଦି ଦେଶରୁ ଆସି ଅନ୍ୟ ଦେଶରେ ଆଶ୍ରୟ ନେଇଛନ୍ତି। ଜାତିସଂଘ ରିପୋର୍ଟ ଅନୁସାରେ ୨୦୧୮ରେ ନିଜ ଦେଶ ଛାଡ଼ି ପଳାୟନ କରିଥିବା ଲୋକଙ୍କ ସଂଖ୍ୟା ୧୧୩ କୋଟି ଥିଲା। ୨୦୧୭ ତୁଳନାରେ ଏହି ସଂଖ୍ୟା ୨୭ ଲକ୍ଷ ଅଧିକ ରହିଥିଲା। ଏବେ ତୁର୍କୀରେ ସର୍ବାଧିକ ୩୭ରୁ ଅଧିକ ଶରଣାର୍ଥୀ ଆଶ୍ରୟ ନେଇଛନ୍ତି। ରିପୋର୍ଟ ଅନୁସାରେ ୨୦୧୭ରେ ୬,୬୭,୪୦୦ ଲୋକ ଭିଟାମାଟିକୁ ଫେରିଥିବାବେଳେ ୨୦୧୮ରେ ଏହାର ସଂଖ୍ୟା ୫,୯୩, ୮୦୦ଥିଲା। ସିରିଆରେ ଗୃହଯୁଦ୍ଧ ଯୋଗୁ ପଳାୟନ କରିଥିବା ଲୋକଙ୍କ ମଧ୍ୟରୁ ୨,୧୦,୦୦୦ ଲୋକ ଜୀବନ ଭୟରେ ସ୍ବଦେଶ ଫେରିବାକୁ ଅମଙ୍ଗ ହୋଇଥିଲେ। ଶରଣାର୍ଥୀଙ୍କ ମଧ୍ୟରେ ୧୮ ବର୍ଷରୁ କମ୍ ବୟସ୍କ ପ୍ରାୟ ୨୭,୬୦୦ ବାଳିକା ଅଛନ୍ତି। ସେମାନେ ନିଜ ପରିବାରଠାରୁ ଅଲଗା ହୋଇ ଏକାଏକା ରହୁଛନ୍ତି। ସେମାନଙ୍କୁ ଚୋରା ଚାଲାଣ କରାଯିବାର ଯଥେଷ୍ଟ ଆଶଙ୍କା ରହିଥିବା ଜାତିସଂଘ ରିପୋର୍ଟରେ କୁହାଯାଇଛି। ସେମାନଙ୍କୁ ବାଧ୍ୟ କରି ଦେହଜୀବୀ କରାଯିବାର ଆଶଙ୍କା ଦେକାଦେଇଛି। ସୂଚନାଯୋଗ୍ୟ, ସୋଭିଏତ୍ ରୁଷ୍ ବିଭାଜନ ସମୟରେ ୧୯୯୭ରେ ୧୭୫,୦୦୦ କମ୍ ବୟସ୍କ ବାଳିକାଙ୍କୁ ବାଧ୍ୟ କରି ଦେହ ବ୍ୟବସାୟରେ ଲଗାଯାଇଥିଲା। ରିପୋର୍ଟ ଅନୁସାରେ ପ୍ରତିବର୍ଷ ୪୦ ଲକ୍ଷରୁ ଅଧିକଙ୍କୁ ନିଜ ଇଛା ବିରୋଧରେ ବିଭିନ୍ନ ବ୍ୟବସାୟରେ ଲଗାଯାଉଛି।
