ବାଲେଶ୍ୱର ଅଫିସ, ୨୭।୨-ଦିବ୍ୟାଙ୍ଗମାନଙ୍କ ପାଇଁ ସ୍ବତନ୍ତ୍ର ଭାବେ ରାଜ୍ୟ ଓ କେନ୍ଦ୍ର ସରକାରଙ୍କ କେତେକ ଯୋଜନା କାର୍ଯ୍ୟକାରୀ ହେଉଥିବା ବେଳେ ବାଲେଶ୍ୱର ଜିଲା ବାଲିଆପାଳ ବ୍ଲକ ଜଙ୍ଘରାଇ ପଞ୍ଚାୟତ ୨ନଂ. ୱାର୍ଡ଼ର ଦିବ୍ୟାଙ୍ଗ ସଞ୍ଜୟ ବୋର (୨୭) ଏଥିରୁ ବାଦ୍ ପଡ଼ିଛନ୍ତି। ସେ ଦିନସାରା ଭିକ୍ଷା ମାଗି ମିଳୁଥିବା ୫୦ରୁ ୧୦୦ ଟଙ୍କାରେ ପରିବାର ଭରଣପୋଷଣ କରୁଥିବା ଜଣାପଡ଼ିଛି। ବାରମ୍ବାର ଭିନ୍ନକ୍ଷମ ଭତ୍ତା, ଇନ୍ଦିରା ଆବାସ, ବିଜୁ ପକ୍କା ଘର ପାଇଁ ୪ବର୍ଷ ଧରି ଆବେଦନ କରୁଥିଲେ ମଧ୍ୟ କର୍ତ୍ତୃପକ୍ଷ ତାଙ୍କର ଗୁହାରିକୁ ଗୁରୁତ୍ୱ ଦେଉ ନ ଥିବା ସେ ଅଭିଯୋଗ କରିଛନ୍ତି।
୫ ବର୍ଷ ପୂର୍ବରୁ ସଞ୍ଜୟ ବାଡ଼ିରେ ଥିବା ଆମ୍ବଗଛରୁ ଆମ୍ବ ବିଛାଉଥିବା ବେଳେ ଆମ୍ବ ନଶି ଆଖିରେ ପଡ଼ିଯିବାରୁ ଆଖି ଦୁଇଟି ନଷ୍ଟ ହୋଇଥିଲା। ଜିଲା ମୁଖ୍ୟ ଚିକିତ୍ସାଳୟ ତଥା କଟକ ବଡ଼ ଡାକ୍ତରଖାନାର ଚକ୍ଷୁ ବିଭାଗରେ ବହୁ ଚିକିତ୍ସା କରିବା ପରେ ମଧ୍ୟ କିଛି ସୁଫଳ ମିଳିଲାନି। ପରେ ଜିଲା ମୁଖ୍ୟ ଚିକିତ୍ସାଳୟରେ ଆବେଦନ କରି ବିଭାଗୀୟ ଅଧିକାରୀଙ୍କ ଠାରୁ ୭୫ ପ୍ରତିଶତ ଦିବ୍ୟାଙ୍ଗ ପ୍ରମାଣପତ୍ର ପାଇଥିଲେ। ସେବେଠାରୁ ସେ ଭତ୍ତା ପାଇଁ ଲିଖିତ ଆବେଦନ କରିଆସୁଥିଲେ ମଧ୍ୟ ତାଙ୍କୁ ଅଦ୍ୟାବଧି ମିଳିପାରିନାହଁି। ଏପରିକି ଜିଲାପାଳ ଓ ଏସ୍ପିଙ୍କ ମିଳିତ ଜନଶୁଣାଣି ଶିବିରରେ ଲିଖିତ ଦେବା ପରେ ମଧ୍ୟ ବିଭାଗୀୟ ଅଧିକାରୀ କୌଣସି ପଦକ୍ଷେପ ଗ୍ରହଣ କରି ନ ଥିବା ଜଣାପଡ଼ିଛି। ସେହିପରି ସଞ୍ଜୟ ଇନ୍ଦିରା ଆବାସ, ବିଜୁ ପକ୍କାଘର, ମାଗଣା ବିଦ୍ୟୁତ୍ ସଂଯୋଗ ପାଇ ନ ଥିବାବେଳେ କେବଳ ଅନ୍ତ୍ୟୋଦୟ କାର୍ଡ଼ ମାଧ୍ୟମରେ ୩୫ କିଲୋଗ୍ରାମ୍ ଚାଉଳ ପାଉଥିଲେ। ଗତ ଜାନୁୟାରୀଠାରୁ ତାହା ବି ମିଳିବା ବନ୍ଦ ହୋଇଯାଇଛି। ପରିବାରରେ ଥିବା ବୃଦ୍ଧ ବାପା ଓ ସାନଭଉଣୀଙ୍କୁ ଚଳାଇବା ପାଇଁ କୌଣସି ଉପାୟ ନ ପାଇ ଭିକ୍ଷା ବୃତ୍ତିକୁ ଆପଣେଇ ନେଇଥିବା ପ୍ରକାଶ କରିଛନ୍ତି।
