ବେଙ୍ଗାଲୁରୁ, ୨।୬- ହୁବ୍ଲୀସ୍ଥିତ ନେହେରୁ ଷ୍ଟାଡିୟମରେ ଭ୍ରମଣକାରୀ ଶ୍ରୀଲଙ୍କା-ଏ ବିପକ୍ଷରେ ଚାଲିଥିବା ଅନ୍ତିମ ତଥା ୨ୟ ଅନ୍ଅଫିସିଆଲ ଟେଷ୍ଟ ମ୍ୟାଚ୍ରେ ଭାରତ-ଏ ଦୃଢ଼ସ୍ଥିତିରେ ରହିଛି। ଶନିବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ଭାରତ ୨ୟ ଇନିଂସରେ ୪୬ ଓଭରରେ ୬ ଉଇକେଟ୍ ହରାଇ ମୋଟ୍ ୨୧୬ ରନ ସଂଗ୍ରହ କରିଛି। ଭାରତ-ଏ ପକ୍ଷରୁ ଅନ୍ମୋଲପ୍ରୀତ୍ ସିଂ (୬୦), ସିଦ୍ଦେଶ ଲାଡ୍ (୫୮) ଓ ଉଇକେଟ୍କିପର ଶ୍ରୀକର ଭରତ (୬୦) ଅର୍ଦ୍ଧଶତକ ହାସଲ କରିଛନ୍ତି। ଦୁଇ ଓପନର୍ ଅଭିମନ୍ୟୁ ଇଶ୍ୱରନ ୩ ଓ ଅଧିନାୟକ ପ୍ରିୟଙ୍କ ପଞ୍ଚଲ ୧୫ ରନ କରି ଆଉଟ୍ ହୋଇଥିବାବେଳେ ଶିଭମ ଦୁବେ (୫) ଓ ରାହୁଲ ଚହର (୫) ଅପରାଜିତ ରହିଛନ୍ତି। ଶ୍ରୀଲଙ୍କା-ଏ ପକ୍ଷରୁ ବିଶ୍ୱ ଫର୍ନାଣ୍ଡୋ ଓ ଲକ୍ଷନ ସନ୍ଦାକନ ୨ଟି ଲେଖାଏ ଉଇକେଟ୍ ନେଇଛନ୍ତି। ପ୍ରଥମ ଇନିଂସରେ ୫୭ ରନର ଅଗ୍ରଣୀ ନେଇଥିବା ଭାରତ ଏଥିସହ ମୋଟ୍ ଉପରେ ୨୭୩ ରନରେ ଆଗୁଆ ରହିଛି।
ଭାରତ-ଏ’ର ପ୍ରଥମ ଇନିଂସ ସ୍କୋର ୨୬୯ ରନ ଜବାବରେ ଶ୍ରୀଲଙ୍କା-ଏ ଶୁକ୍ରବାର ସୁଦ୍ଧା ୪ ଉଇକେଟ୍ରେ ୮୭ ରନ କରିଥିଲା। ଶନିବାର ଦଳ ପୂର୍ବ ଦିନର ସ୍କୋରରେ ଆଉ ୧୧୫ ରନ ଯୋଡ଼ି ବଳକା ଉଇକେଟ୍ ହରାଇଥିଲା। ଶ୍ରୀଲଙ୍କା-ଏ ପକ୍ଷରୁ କାମିନ୍ଦୁ ମେଣ୍ଡିସ ୬୮, ନିରୋଶାନ ଡିକ୍ଓ୍ବେଲା ୩୯, ପ୍ରିୟମଲ ପେରେରା ୩୬, ଅଧିନାୟକ ଅସନ ପ୍ରିୟଞ୍ଜନ ୧୯ ରନ କରିଥିଲେ। ଭାରତ-ଏ ପକ୍ଷରୁ ଜୟନ୍ତ ଯାଦବ ୩ ଏବଂ ସନ୍ଦୀ ଓ୍ବାରିୟର ଓ ଦୁବେ ୨ଟି ଲେଖାଏ ଉଇକେଟ୍ ନେଇଥିଲେ। ମଙ୍ଗଳବାର ମ୍ୟାଚ୍ର ଅନ୍ତିମ ଦିବସ ହୋଇଥିବାରୁ ଫଳାଫଳ ବାହାରିବା ଏକପ୍ରକାର ସ୍ପଷ୍ଟ ହୋଇଛି।
