ନୂଆଦିଲ୍ଲୀ,୨୧।୨: ଭାରତୀୟ କ୍ରିକେଟ ଦଳର ପୂର୍ବତନ ବିସ୍ଫୋରକ ଓପନର୍ ଶିଖର ଧାଓ୍ବନ ନିଜ ଜୀବନର ଏକ ନୂଆ ଇନିଂସ ଆରମ୍ଭ କରିଛନ୍ତି। ଶନିବାର ୨୧ ଫେବୃଆରୀରେ ସେ ନିଜର ବାନ୍ଧବୀ ସୋଫି ଶାଇନ (Sophie Shine)ଙ୍କ ସହ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ସମ୍ପୂର୍ଣ୍ଣ ଭାରତୀୟ ରୀତିନୀତି ଅନୁଯାୟୀ ଏହି ବିବାହ ସମ୍ପନ୍ନ ହୋଇଛି।
ସୋଫି ଶାଇନ ଜଣେ ଆଇରିସ ନାଗରିକ ଏବଂ ବୃତ୍ତିରେ ଜଣେ ମାର୍କେଟିଂ ପ୍ରଫେସନାଲ। ଶିଖର ଏବଂ ସୋଫି ପ୍ରାୟ ଦେଢ଼ ବର୍ଷ ଧରି ପରସ୍ପରକୁ ଡେଟ କରୁଥିଲେ। ଗତ ମାସରେ ଉଭୟଙ୍କର ର୍ନିବନ୍ଧ (Sangeet/Engagement) ହୋଇଥିଲା ଏବଂ ଏହାର ୪୦ ଦିନ ପରେ ସେମାନେ ବିବାହ କରିଛନ୍ତି। ଆଇରିସ ମହିଳା ହୋଇଥିଲେ ମଧ୍ୟ ସୋଫି ହଳଦୀ ଏବଂ ମେହେନ୍ଦୀ ଭଳି ସମସ୍ତ ଭାରତୀୟ ପରମ୍ପରାକୁ ବହୁତ ଉତ୍ସାହର ସହ ପାଳନ କରିଥିବା ଦେଖିବାକୁ ମିଳିଛି।
ଏହି ବିବାହ ଉତ୍ସବରେ କେବଳ ପରିବାର ଲୋକ ଏବଂ ଅତି ନିକଟତର ବନ୍ଧୁମାନେ ସାମିଲ ହୋଇଥିଲେ। ତେବେ ଧାଓ୍ବନଙ୍କ ଘନିଷ୍ଠ ବନ୍ଧୁ ତଥା ଷ୍ଟାର୍ ସ୍ପିନର ୟୁଜବେନ୍ଦ୍ର ଚହଲ ଏହି ବିବାହରେ ଯୋଗ ଦେଇଥିଲେ। ସେ ସୋସିଆଲ ମିଡିଆରେ ବରଯାତ୍ରୀ ସମୟର କିଛି ଫଟୋ ଶେୟାର କରି ନୂଆ ଦମ୍ପତିଙ୍କୁ ଶୁଭେଚ୍ଛା ଜଣାଇଛନ୍ତି।
ପୁଣି ପ୍ରେମରେ ଉବୁଟୁବୁ ମଲାଇକା? ରୋମ୍ରୁ ଭାଇରାଲ ହେଲା ଡାଇମଣ୍ଡ ମର୍ଚ୍ଚାଣ୍ଟଙ୍କ ସହ ରୋମାଣ୍ଟିକ୍ ଫଟୋ
କହିରଖୁଛୁ, ଏହା ଶିଖର ଧାଓ୍ବନଙ୍କର ଦ୍ୱିତୀୟ ବିବାହ। ସେ ୨୦୧୨ ମସିହାରେ ଆୟେଶା ମୁଖାର୍ଜୀଙ୍କୁ ପ୍ରଥମ ବିବାହ କରିଥିଲେ। ୨୦୨୧ରେ ସେମାନଙ୍କ ମଧ୍ୟରେ ବିବାଦ ଦେଖାଦେବା ପରେ ସେମାନେ ଅଲଗା ହୋଇଯାଇଥିଲେ ଏବଂ ୨୦୨୩ରେ ଆନୁଷ୍ଠାନିକ ଭାବେ ଛାଡ଼ପତ୍ର ହୋଇଥିଲା।
ଶିଖର ଧାଓ୍ବନ ନିକଟରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିସାରିଛନ୍ତି। ଏବେ ନୂଆ ଜୀବନସାଥୀଙ୍କ ସହ ତାଙ୍କର ଏହି ନୂଆ ଯାତ୍ରା ପାଇଁ ପ୍ରଶଂସକମାନେ ତାଙ୍କୁ ସୋସିଆଲ ମିଡିଆରେ ଅଭିନନ୍ଦନର ସୁଅ ଛୁଟାଉଛନ୍ତି।
