ନୟାଗଡ଼ ଅଫିସ,୨।୧୧: ନୟାଗଡ଼ ଜିଲା ଏସ୍ପିଙ୍କ କାର୍ଯ୍ୟାଳୟଠାରୁ ମାତ୍ର ୨ କିଲୋମିଟର ଦୂର ଭାଟସାହି ଗ୍ରାମରେ ଶୁକ୍ରବାର ଗ୍ରାମବାସୀ ଚୋର ଧରିବା ପାଇଁ ଖଟ ବୁଲାଇଥିଲେ। ଖବର ପାଇ ପୋଲିସ ଉକ୍ତ ଗ୍ରାମକୁ ଯାଇ ଲୋକଙ୍କୁ ମନା କରି ଫେରି ଆସିବା ପରେ ପୁଣି ଗ୍ରାମରେ ଖଟ ବୁଲାଯାଇଥିଲା। ୩ଥର କରି ପୋଲିସ ଉକ୍ତ ଗ୍ରାମକୁ ଯାଇଥିଲେ ମଧ୍ୟ ଚତୁରତାର ସହ ଖଟବୁଲାଳି ଲୁଚି ଯାଉଥିଲେ। ଦିନତମାମ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଛକାପଞ୍ଝା ଚାଲିଥିଲା।
ବ୍ଲକ ଭାଟସାହି ଗ୍ରାମର ତୋଟାସାହିରେ ରହୁଥିବା ଜଣେ ବ୍ୟକ୍ତିଙ୍କ ଘରୁ ୨ ସପ୍ତାହ ତଳେ ୨୦ ହଜାର ଟଙ୍କା ଚୋରି ହୋଇଥିଲା। ସମ୍ପୃକ୍ତ ବ୍ୟକ୍ତି ଏ ନେଇ ଗ୍ରାମ କମିଟିକୁ ଜଣାଇଥିଲେ। ପରେ ଗ୍ରାମରେ ବୈଠକ ବସି ଚୋର ଧରିବା ପାଇଁ ଖଟ ବୁଲାଇବାକୁ ନିଷ୍ପତ୍ତି ହୋଇଥିଲା। ନିଷ୍ପତ୍ତିରେ ଗ୍ରାମର କୌଣସି ବ୍ୟକ୍ତି ଖଟବୁଲା ଖବର ବାହାରେ କାହାକୁ ନ କହିବା ପାଇଁ ତାଗିଦ୍ କରାଯାଇଥିଲା। ଯିଏ ଏ ବିଷୟରେ ବାହାରେ କହିବ ତାଙ୍କୁ ୨ ଲକ୍ଷ ଟଙ୍କା ଜରିମାନା ହେବ ବୋଲି ବୈଠକରେ ନିଷ୍ପତ୍ତି ହୋଇଥିଲା। ଶୁକ୍ରବାର ଗ୍ରାମକୁ ଗୁଣିଆ ଆସି ଖଟ ବୁଲାଇବା ପାଇଁ ପୂଜାପାଠ କରୁଥିବା ବେଳେ କୌଣସି ସୂତ୍ରରୁ ଖବର ପାଇ ଟାଉନ ପୋଲିସ ଘଟଣାସ୍ଥଳକୁ ଯାଇଥିଲା। ପୋଲିସ ଭ୍ୟାନ୍ ଦେଖି ଗୁଣିଆ ଜଣଙ୍କ ପଳାଇ ଯାଇଥିଲେ। ଏହା ପରେ ଟାଉନ ଥାନା ଅଧିକାରୀ ଜୟଦୀପ ମହାନ୍ତି ଗ୍ରାମରେ ଲୋକମାନଙ୍କୁ ଖଟ ନ ବୁଲାଇବା ପାଇଁ କହି ଚାଲି ଆସିଥିଲେ। ପୁନର୍ବାର ଗ୍ରାମରେ ଖଟ ବୁଲିଥିଲା। ଖବର ପାଇ ମଧ୍ୟାହ୍ନ ୧୨ଟାରେ ପୁନର୍ବାର ଟାଉନ ପୋଲିସ ଗ୍ରାମରେ ପହଞ୍ଚତ୍ ଥିଲା। ହେଲେ ସେହି ସମୟରେ ଗ୍ରାମବାସୀ ଖଟ ଛାଡ଼ି ଚାଲି ଯାଇଥିଲେ। ପୋଲିସ ଫେରି ଆସିଥିଲା। ପରେ ଗ୍ରାମବାସୀ ପୁଣି ଖଟ ବୁଲାଇଥିଲେ। ହେଲେ ସୁଫଳ ପାଇ ନ ଥିଲେ। ଖବର ପାଇ ପୋଲିସ ତୃତୀୟ ଥର ଗ୍ରାମରେ ପହଞ୍ଚତ୍ଥିଲେ ମଧ୍ୟ କାହାକୁ ଧରି ପାରି ନ ଥିଲା।
