କଣିହାଁ,୧୫ା୬(ଡି.ଏନ.ଏ.)- ଢେଙ୍କାନାଳ ଜିଲା ଅଞ୍ଚଳର ଜଣେ କରୋନା ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂରୁ ସେ ଅନୁଗୋଳ ଜିଲା କଣିହାଁ ବ୍ଲକ ଏନ୍ଟିପିସି ବଜାର ଅଞ୍ଚଳର ଭଉଣୀ ଘରକୁ ଗତ ୧୧ ତାରିଖରେ ରଜଭାର ନେଇ ଆସିଥିବା ଜଣାପଡ଼ିଛି। ଏହି ଖବର ମିଳିବା ପରେ କଣିହାଁ ବ୍ଲକ ପ୍ରଶାସନ ତୁରନ୍ତ ପଦକ୍ଷେପ ନେବା ଆରମ୍ଭ କରିଛି। ସମ୍ପୃକ୍ତ ବ୍ୟକ୍ତିଙ୍କ ସଂସ୍ପର୍ଶରେ ଯେଉଁମାନେ ଆସିଥିଲେ ସେମାନଙ୍କୁ ଖୋଜି କ୍ୱାରାଣ୍ଟାଇନ କରାଯାଇଛି।
କଣିହାଁ ବିଡିଓ ରମେଶ କୁମାର ଜେନା, ଏନ୍ଟିପିସି ଟାଉନ ଥାନା ଆଇଆଇସି ଦୀପିକା ଦେବୀ ରାୟ କହିଛନ୍ତି, ଢେଙ୍କାନାଳ ଜିଲାର ଯୁବକ ଜଣକ ବାହାର ରାଜ୍ୟରୁ ଫେରିଥିଲେ। ୭ ଦିନ କ୍ୱାରାଣ୍ଟାଇନରେ ରହିବା ପରେ ତାଙ୍କୁ ଘରକୁ ପଠାଇ ଦିଆଯାଇଥିଲା। ପରେ ସେ ରଜ ଭାର ନେଇ କଣିହଁା ବ୍ଲକ ଅଞ୍ଚଳର ଭଉଣୀ ଘରକୁ ଆସିଥିଲେ। ଏଠାରେ ୨ ଦିନ ରହି ଶନିବାର ଫେରିଯାଇଥିଲେ। ପୂର୍ବରୁ ତାଙ୍କ ସ୍ବାବ୍ ଟେଷ୍ଟ ପାଇଁ ଯାଇଥିବା ବେଳେ ଶନିବାର ପଜିଟିଭ୍ ରିପୋର୍ଟ ଆସିଥିଲା। ସମ୍ପୃକ୍ତ ବ୍ୟକ୍ତିଙ୍କ ଭିଣୋଇ ଏନ୍ଟିପିସି ବଜାରରେ ବ୍ୟବସାୟ କରୁଥିବାରୁ ତାଙ୍କ ଦୋକାନ ସିଲ୍ କରାଯିବା ସହ ପୂରା ପରିବାରକୁ କ୍ୱାରାଣ୍ଟାଇନ୍ରେ ରଖାଯାଇଛି। ସୋମବାର ମୋଟ୍ ୩୨ଜଣଙ୍କ ସ୍ବାବ୍ ସଂଗ୍ରହ କରାଯାଇ ଟେଷ୍ଟ ପାଇଁ ପଠାଯିବ। ଏହି ଘଟଣା ପରେ ଏନ୍ଟିପିସି ପକ୍ଷରୁ ସତର୍କତା ପଦକ୍ଷେପ ସମ୍ପର୍କରେ କର୍ମଚାରୀଙ୍କ ପାଇଁ ସୋସିଆଲ ମିଡିଆରେ ନୋଟିସ୍ ଜାରି କରାଯାଇଛି। ଏନ୍ଟିପିସି କଣିହାଁ ଟାଉନଶିପ୍ ଓ ଆଖପାଖ ଅଞ୍ଚଳରେ କରୋନା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ଲୋକଙ୍କ ଚିହ୍ନଟ ପ୍ରକ୍ରିୟା ଚାଲୁଥିବାରୁ ଟାଉନଶିପ୍ରେ ରହୁଥିବା ଲୋକଙ୍କୁ ଅତି ଜରୁରୀ କାମ ନ ଥିଲେ ବାହାରକୁ ଯିବାକୁ ବାରଣ କରାଯାଇଛି। ଏଥିସହ ପ୍ରକଳ୍ପର ପିଟିଏସ୍ ଗେଟ୍କୁ ବନ୍ଦ କରାଯାଇଛି। ତେଣୁ କର୍ମଚାରୀମାନେ ଡ୍ୟୁଟି କରିବାକୁ ବିକାଶ ଦ୍ୱାର ପ୍ଲାଣ୍ଟ ଗେଟ୍ ଦେଇ ଯିବାକୁ ସୂଚନା ଦିଆଯାଇଛି। ଯଦି କୌଣସି କର୍ମଚାରୀ ଗତ ୧୦ ତାରିଖରୁ କ୍ୱାରାଣ୍ଟାଇନରେ ଥିବା ସେହି ପରିବାର ସଦସ୍ୟଙ୍କ ସଂସ୍ପର୍ଶରେ ଆସିଥିବେ କିମ୍ବା ତାଙ୍କ ଗ୍ରାମକୁ ଯାଇଥିବେ ତା’ହେଲେ ସେମାନେ ତୁରନ୍ତ ଡିଜିଏମ୍(ଏଚ୍ଆର୍) ଜାକିର ଖାନ୍ କିମ୍ବା ସରକାରଙ୍କୁ ସୂଚନା ଦେବାକୁ ନୋଟିସରେ କୁହାଯାଇଛି।
