ବାଲିଆପାଳ/ଜଳେଶ୍ୱର, ୨୩ା୧୦(ଡି.ଏନ.ଏ.)-ବାଲେଶ୍ୱର ଜିଲାର ବାଲିଆପାଳ ଓ ଜଳେଶ୍ୱର ବ୍ଲକରେ ଡେଙ୍ଗୁ ବ୍ୟାପିବାରେ ଲାଗିଛି। ବାଲିଆପାଳ ବ୍ଲକରେ ଡେଙ୍ଗୁରେ ଏଯାଏ ୩ଜଣଙ୍କ ମୃତ୍ୟୁ ହୋଇଥିବା ବେଳେ ଜଳେଶ୍ୱର ବ୍ଲକରେ ୭ଜଣ ଡେଙ୍ଗୁରେ ଆକ୍ରାନ୍ତ ହୋଇ ଚିକିତ୍ସାଧୀନ ଅଛନ୍ତି।
ବାଲିଆପାଳ ବ୍ଲକ ଚାନ୍ଦମଣି ଗ୍ରାମରେ ପ୍ରଥମେ ଡେଙ୍ଗୁରେ ଜଣକର ମୃତ୍ୟୁ ହୋଇଥିଲା। ଜାମକୁଣ୍ଡା ଗ୍ରାମରେ ୧୯ ତାରିଖରେ ମନ୍ମଥ ପାତ୍ର (୩୨)ଙ୍କ ମୃତ୍ୟୁ ହୋଇଛି। ସେ କଟକରେ ଚିକିତ୍ସାଧୀନ ଥିଲେ। ସେହିପରି ଘଣ୍ଟିଆଡି ଗ୍ରାମର କନକ ସେଠୀ (୪୨) ଡେଙ୍ଗୁରେ ଆକ୍ରାନ୍ତ ହୋଇ ୨୧ ତାରିଖରେ ପ୍ରାଣ ହରାଇଛନ୍ତି। ଚଳିତ ବର୍ଷ ଜାମକୁଣ୍ଡା, ବିଷ୍ଣୁପୁର ଓ ଘଣ୍ଟିଆଡି ଗ୍ରାମରେ ଡେଙ୍ଗୁ ଜ୍ୱରର ପ୍ରାଦୁର୍ଭାବ ବୃଦ୍ଧି ପାଇଛି ା ଏବେ ବିଷ୍ଣୁପୁର ଓ ଜାମକୁଣ୍ଡା ପଞ୍ଚାୟତର ଅଧିକାଂଶ ଲୋକଙ୍କୁ ଜ୍ୱର ହୋଇଥିବା ବେଳେ ସେମାନଙ୍କର ରକ୍ତରେ ଡେଙ୍ଗୁ ଭୂତାଣୁ ରହିଥିବା ଆଶଙ୍କା କରାଯାଉଛି। ଏହି ଦୁଇ ପଞ୍ଚାୟତର ଡେଙ୍ଗୁ ଆକ୍ରାନ୍ତ ରୋଗୀମାନେ ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ଚିକିସତ୍ିତ ହେଉଛନ୍ତି। ସ୍ବାସ୍ଥ୍ୟ ବିଭାଗର ସିଡିଏମ୍ଓ ଡେଙ୍ଗୁ ପ୍ରବଣ ଚାନ୍ଦମଣି ଗ୍ରାମକୁ ପରିଦର୍ଶନ କରିଥିବା ବେଳେ ଡାକ୍ତରୀ ଦଳ ଓ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର କର୍ମଚାରୀମାନେ ୫୦ରୁ ଊର୍ଦ୍ଧ୍ୱ ଜ୍ୱର ଆକ୍ରାନ୍ତଠୁ ରକ୍ତ ନମୁନା ସଂଗ୍ରହ କରିଥିଲେ ା ତେବେ ବିଷ୍ଣୁପୁର ଓ ଜାମକୁଣ୍ଡା ପଞ୍ଚାୟତରେ ଏବେ ଡେଙ୍ଗୁ ଆତଙ୍କ ଦେଖା ଦେଇଥିବାରୁ ସ୍ବାସ୍ଥ୍ୟ ବିଭାଗ ତୁରନ୍ତ ଦୁଇ ପଞ୍ଚାୟତକୁ ଡାକ୍ତରୀ ଦଳକୁ ପଠାଇବାକୁ ଗ୍ରାମବାସୀ ଦୃଢ ଦାବି କରିଛନ୍ତି ା ଏ ସମ୍ପର୍କରେ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିତ୍ସାଧିକାରୀ ଡାକ୍ତର ଭଗିରଥ ମୁର୍ମୁଙ୍କ ସହିତ ଯୋଗାଯୋଗ କରାଯିବାରୁ ଡେଙ୍ଗୁ ନିୟନ୍ତ୍ରଣରେ ରହିଛି ବୋଲି କହିଛନ୍ତି ା ଜଳେଶ୍ୱରରେ ଡେଙ୍ଗୁ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ସେହିପରି ଳେଶ୍ୱର ବ୍ଲକର ବିଭିନ୍ନ ଗ୍ରାମରେ ଡେଙ୍ଗୁ ରୋଗ ବ୍ୟାପିବାରେ ଲାଗିଛି। ମହମ୍ମଦନଗର ପାଟଣା ଗ୍ରାମରେ ସବୁଠାରୁ ଅଧିକ ଲୋକ ଏହି ରୋଗରେ ଆକ୍ରାନ୍ତ ହୋଇଛନ୍ତି। ଏବେ ପୁଣି ଶିଖରପୁର ପଞ୍ଚାୟତର ବେଲବାରିଆ ଓ ଶୁଖଦୁଃଖିଆ ଗ୍ରାମରେ ଡେଙ୍ଗୁ ରୋଗ ଦେଖାଦେଇଛି। ଗ୍ରାମବାସୀ ରୋଗ ଭୟରେ କାଳତିପାତ କରୁଛନ୍ତି।
ବର୍ତ୍ତମାନ ସୁଦ୍ଧା ୭ଜଣଙ୍କ ରକ୍ତ ନମୁନାରେ ଡେଙ୍ଗୁ ପଜିଟିଭ୍ ମିଳିଛି। ସେମାନେ ହେଲେ ଆରତୀ ଦାସ(୫୫), ଆରତୀ ଦାସ(୫୦), ବାସନ୍ତୀ ଦାସ(୫୩), ସୂର୍ଯ୍ୟକାନ୍ତ ଦାସ(୩୫), ଜଗନ୍ନାଥ ଦାସ(୪୦), ଶ୍ୟାମସୁନ୍ଦର ଦାସ(୫୦), କାହ୍ନୁଚରଣ ଦାସ (୫୨)। ସମସ୍ତଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି। ଶିଖରପୁର ଅଙ୍ଗନୱାଡ଼ି ସୁରଭାଇଜର ସ୍ନେହଲତା ଦାସଙ୍କ ନେତୃତ୍ୱରେ ଗ୍ରାମର ଅଙ୍ଗନୱାଡ଼ି କର୍ମୀମାନଙ୍କୁ ନେଇ ଏକ ଡେଙ୍ଗୁ ରୋଗ ସଚେତନତା କାର୍ଯ୍ୟକ୍ରମ କରାଯାଇଛି।
