ନୂଆଦିଲ୍ଲୀ, ୨୬ା୩ (ପି.ଟି.): କରୋନା ଭାଇରସ୍ ବ୍ୟାପିବା ଆଶଙ୍କା ଯୋଗୁ ଟୋକିଓ ଅଲିମ୍ପିକ୍ସକୁ ୨୦୨୧କୁ ଘୁଞ୍ଚାଇ ଦିଆଯାଇଛି। ଫଳ ସ୍ବରୂପ ବିଶ୍ୱ ର଼୍ୟାଙ୍କିଙ୍ଗ ବ୍ୟବସ୍ଥାକୁ ବର୍ତ୍ତମାନ ପାଇଁ ସ୍ଥିର ରଖିବା ଲାଗି ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ବିଚାର କରିପାରେ। ବିଡବ୍ଲ୍ୟୁଏଫ୍ ଆହୁରି ମଧ୍ୟ ଅଲିମ୍ପିକ କ୍ୱାଲିଫିକେଶନ ବ୍ୟବସ୍ଥାର ସମୀକ୍ଷା କରିବ। ବର୍ତ୍ତମାନର ପରିସ୍ଥିତରେ କ୍ରୀଡ଼ା କ୍ୟାଲେଣ୍ଡର ଅନ୍ତର୍ଗତ କେତେକ ଟୁର୍ନାମେଣ୍ଟ ବାତିଲ କରାଯାଇଥିବାରୁ ଅଲିମ୍ପିକ ଯୋଗ୍ୟତା ହାସଲ ଦିଗରେ ସମସ୍ୟା ସୃଷ୍ଟି କରିଛି। ଏନେଇ ଭାରତୀୟ ବ୍ୟାଡ୍ମିଣ୍ଟନ ଖେଳାଳି ସାଇନା ନେହ୍ବାଲ, ବି. ସାଇ ପ୍ରଣୀଥ, ପାରୁପାଲ୍ଲୀ କାଶ୍ୟପ ଓ ଏଚ୍.ଏସ୍. ପ୍ରଣୟ ପ୍ରମୁଖ ଉଦ୍ବେଗ ପ୍ରକାଶ କରିଛନ୍ତି। ଅଲିମ୍ପିକ ଓ ପାରା ଅଲିମ୍ପିକ କ୍ୱାଲିଫିକେଶନ ବ୍ୟବସ୍ଥାରେ ଆମ ଆଥ୍ଲେଟମାନେ ଯେପରି କୌଣସି ସମସ୍ୟା ନ ପଡ଼ନ୍ତି ସେ ଦିଗରେ ଧ୍ୟାନ ଦିଆଯିବ ବୋଲି ବିଡବ୍ଲ୍ୟୁଏଫ୍ ଏକ ବିବୃତ୍ତିରେ ପ୍ରକାଶ କରିଛି। ଅନ୍ତର୍ଜାତୀୟ ଟୁର୍ନାମେଣ୍ଟଗୁଡ଼ିକ ପୁନର୍ବାର ଆରମ୍ଭ ନ ହେଲା ପର୍ଯ୍ୟନ୍ତ ବିଶ୍ୱ ର଼୍ୟାଙ୍କିଙ୍ଗକୁ ସ୍ଥିର ରଖାଯିବା ସମ୍ଭାବନା ରହିଛି ବୋଲି ବିଡବ୍ଲ୍ୟୁଏଫ୍ କହିଛି। ତେବେ କୌଣସି ନିଷ୍ପତ୍ତି ପୂର୍ବରୁ ଏହି ସମସ୍ୟାର ବୈଷୟିକ ସମାଧାନ ଦୃଷ୍ଟିକୋଣରୁ ବିଚାର କରାଯିବ। ନିୟମାନୁସାରେ ସିଙ୍ଗଲ୍ସ ପ୍ରତିଯୋଗିତ ପାଇଁ ବିଶ୍ୱ ର଼୍ୟାଙ୍କିଙ୍ଗର ଶୀର୍ଷ ୧୬ ଜଣ ଖେଳାଳି ଯୋଗ୍ୟତା ଅର୍ଜନ କରିବେ। ଡବଲ୍ସରେ ମଧ୍ୟ ଶ୍ରେଷ୍ଠ ୧୬ଯୋଡ଼ି ଅଲିମ୍ପିକ ଟିକେଟ ପାଇବେ। ଚଳିତ ମାସ ଆରମ୍ଭରେ ଅଲ୍ ଇଂଲଣ୍ଡ ଚାମ୍ପିୟନଶିପ୍ ପରଠାରୁ ଅନ୍ତର୍ଜାତୀୟ କ୍ୟାଲେଣ୍ଡର ଅଟକି ରହିଛି।
