କାମାକ୍ଷାନଗର, ୧୨।୬(ଡି.ଏନ୍.ଏ.)-କୋଠା ଉପରେ ବ୍ୟାଙ୍କ। ଆଉ ଏହାର ଠିକ୍ ତଳେ ଖୋଲିଛି ସରକାରୀ ବିଦେଶୀ ମଦ ଦୋକାନ। ମଦ ପିଇ ମାତାଲ ହୋଇ ଗଡୁଛନ୍ତି ମଦ୍ୟପ। ଅଶ୍ଳୀଳ ଇଙ୍ଗିତର ଶିକାର ହେଉଛନ୍ତି ବ୍ୟାଙ୍କକୁ ଆସୁଥିବା ଛାତ୍ରୀ, ଯୁବତୀ, ମହିଳା। ଏଭଳି ବିଚିତ୍ର ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜିଲା କାମାକ୍ଷାନଗରସ୍ଥିତ ଅନୁଗୋଳ କେନ୍ଦ୍ର ସଂଯୁକ୍ତ ସମବାୟ ବ୍ୟାଙ୍କ ଚାଲିଥିବା କୋଠାରେ। ବ୍ୟାଙ୍କ ପରିସର ମଦ୍ୟପଙ୍କ ଆଡ୍ଡାସ୍ଥଳୀ ପାଲଟିଥିବାବେଳେ ମୁହଁ ମୋଡୁଛନ୍ତି ଗ୍ରାହକ। ଏପରି ସମସ୍ୟାରେ ଅତିଷ୍ଠ ହୋଇପଡ଼ିଥିବା ବୁଦ୍ଧିଜୀବୀମାନେ ଏବେ ବ୍ୟାଙ୍କକୁ ଅନ୍ୟତ୍ର ସ୍ଥାନାନ୍ତର କରିବାକୁ ଦାବି କରିଛନ୍ତି।
ଅନୁଗୋଳ କେନ୍ଦ୍ର ସଂଯୁକ୍ତ ସମବାୟ ବ୍ୟାଙ୍କ ପୂର୍ବରୁ ଲକ୍ଷ୍ମୀବଜାରରେ କାର୍ଯ୍ୟ କରୁଥିଲା। ବ୍ୟାଙ୍କ ଘର ଅତ୍ୟନ୍ତ ବିପଦସଙ୍କୁଳ ହୋଇପଡ଼ିବାରୁ ୨୦୧୬ ସେପ୍ଟେମ୍ବର ୧୯ରେ ଢେଙ୍କାନାଳ-କାମାକ୍ଷାନଗର ମୁଖ୍ୟରାସ୍ତାର ଦାସୀପୋଖରୀ ପେଟ୍ରୋଲ ପମ୍ପ ପାଖରେ ଥିବା ଏକ ପକ୍କା ଘରର ପ୍ରଥମ ମହଲାକୁ ସ୍ଥାନାନ୍ତର କରାଯାଇଥିଲା। ସେବେଠାରୁ ବ୍ୟାଙ୍କ ଉକ୍ତ ଭଡ଼ାଘରେ ଚାଲିଛି। ପରବର୍ତ୍ତୀ ସମୟରେ ଉକ୍ତ ଘର ତଳ ମହଲାରେ ସରକାରୀ ବିଦେଶୀ ମଦ ଦୋକାନ ଖୋଲିବାକୁ ଅନୁମତି ମିଳିଥିଲା। ଫଳରେ ବ୍ୟାଙ୍କ କାର୍ଯ୍ୟାଳୟ ଆଖପାଖ ଅଞ୍ଚଳ ଏବେ ମଦ୍ୟପଙ୍କ ଆଡ୍ଡାସ୍ଥଳୀ ପାଲଟିଛି। ସେମାନେ ମଦ୍ୟପାନ କରି ବ୍ୟାଙ୍କ ନିକଟରେ ଅସାମାଜିକ କାର୍ଯ୍ୟରେ ଲିପ୍ତ ରହୁଛନ୍ତି। ବ୍ୟାଙ୍କକୁ ଆସୁଥିବା ମହିଳାମାନେ ନିଜକୁ ସୁରକ୍ଷିତ ମଣୁନାହାନ୍ତି। ମଦ୍ୟପଙ୍କ ଲାଗି ପଥଚାରୀ ଦୁର୍ଘଟଣାର ଶିକାର ହେଉଥିବା ଅଭିଯୋଗ ହେଉଛି। ବ୍ୟାଙ୍କ ନିକଟରେ ଥିବା ମଦଦୋକାନ ପାଇଁ ଦୈନିକ ଅପ୍ରୀତିକର ପରିସ୍ଥିତି ସୃଷ୍ଟି ହେଉଥିବାରୁ ତୁରନ୍ତ ଏହାକୁ ଅନ୍ୟତ୍ର ସ୍ଥାନାନ୍ତର କରିବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
ଏ ନେଇ ବ୍ୟାଙ୍କ ଶାଖା ପରିଚାଳକ ମନୋରଞ୍ଜନ ସିଂ, ବ୍ୟାଙ୍କ ସ୍ଥାନାନ୍ତର କରାଯିବା ସମୟରେ ଏହାର ତଳ ମହଲାରେ ମଦ ଦୋକାନ ଖୋଲିବା ବିଷୟ ଘର ମାଲିକ କହି ନ ଥିଲେ। ସେଠାରେ ଗୋଦାମ ହେବ ବୋଲି କହିଥିଲେ। ଏଗ୍ରିମେଣ୍ଟ ସରିବା ପରେ ବ୍ୟବସାୟିକ ମନୋବୃତ୍ତି ରଖି ମଦ ଦୋକାନ ଲାଗି ଘର ଭଡ଼ା ଦେଇଥିଲେ। ଏ ନେଇ ଜିଲାପାଳ, ଅବକାରୀ ବିଭାଗକୁ ବାରମ୍ବାର ଚିଠି ଲେଖାଯାଇଥିଲେ ମଧ୍ୟ ସୁଫଳ ମିଳୁନାହିଁ। ଏପରି କି ତୁରନ୍ତ ବ୍ୟାଙ୍କ ସ୍ଥାନାନ୍ତର କରିବାକୁ ନାବାର୍ଡ କର୍ତ୍ତୃପକ୍ଷ ମଧ୍ୟ ରିପୋର୍ଟ ଦେଇସାରିଲେଣି। ଖୁବ୍ଶୀଘ୍ର ପୁରୁଣା କୋଠାକୁ ବ୍ୟାଙ୍କ ସ୍ଥାନାନ୍ତର ହେବା ନେଇ ପ୍ରକ୍ରିୟା ଆରମ୍ଭ ହେବ ବୋଲି ସେ ସୂଚନା ଦେଇଛନ୍ତି।
