ଓ୍ବାଶିଂଟନ: ମାସାଚ୍ୟୁସେଟସ ଇନ୍ଷ୍ଟିଚ୍ୟୁଟସ ଅଫ୍ ଟେକନୋଲୋଜି(ଏମ୍ଆଇଟି)ର ଗବେଷକମାନେ ବିକାଶ କରିଛନ୍ତି ଏକ ରୋବୋଟିକ ଥ୍ରେଡ୍। ଏହା ଚୁମ୍ବକୀୟ ଶକ୍ତି ଦ୍ୱାରା ସଞ୍ଚାଳିତ ହୋଇପାରୁଛି। ଏହା ଅତି ସରୁ ଓ କ୍ଷୁଦ୍ର ବ୍ଲଡ୍ ଭେସେଲସ୍ ବା ରକ୍ତ ବାହିକା ମଧ୍ୟରେ ଗତି କରି ବ୍ଲକେଜ୍ ଦୂର କରିପାରିବ ବୋଲି କୁହାଯାଇଛି। ଏହା ଦ୍ୱାରା ଷ୍ଟ୍ରୋକ୍ର କାରଣ ହେଉଥିବା ବ୍ଲକେଜ୍ ଓ ବ୍ରେନ୍ ବ୍ଲକେଜ୍ର ଚିକିତ୍ସା ସହଜ ହୋଇପାରିବ । ଷ୍ଟ୍ରୋକ୍ର ଚିକିତ୍ସା ୯୦ ମିନିଟ୍ ମଧ୍ୟରେ କରାଯାଇ ଅଧିକ ପୀଡ଼ିତଙ୍କୁ ବଞ୍ଚାଇ ହେବ ବୋଲି ଏମଆଇଟିର ସହକାରୀ ପ୍ରାଧ୍ୟାପକ ଜୁହାଁଇ ଝାଓ କହିଛନ୍ତି। ଏବେ ବ୍ରେନ୍ରେ ରକ୍ତ ଜମାଟ ବାନ୍ଧିଲେ ଏକ ଅତି ସରୁ ତାର ପୀଡ଼ିତଙ୍କ ମୁଖ୍ୟ ଧମନୀରେ ପ୍ରବେଶ କରାଯାଇ ତା’ମାଧ୍ୟମରେ ବ୍ଲକେଜ ଦୂର କରାଯାଉଛି। ଏହାକୁ ଫ୍ଲରୋସ୍କୋପ୍ ମାଧ୍ୟମରେ କରାଯାଉଛି। ଏହି ରୋବୋଟିକ ଥ୍ରେଡ୍କୁ ନିକେଲ-ଟିଟାନିୟମ ଆଲଏରେ କରାଯାଇଛି। ଏହା ଉପରେ ଏକ ମ୍ୟାଗ୍ନେଟିକ ପେଷ୍ଟ୍ ମଧ୍ୟ ଦିଆଯାଇଛି। ଅତି କ୍ଷୁଦ୍ର ସିଲିକନ୍ ନିର୍ମିତ ବ୍ରେନ୍ ପ୍ରତିକୃତିରେ ଏହାର ପରୀକ୍ଷା କରାଯାଇଛି ଓ ସଫଳତା ମଧ୍ୟ ମିଳିଛି।
